COVID-19
អន្តរជាតិ
COVID-19 លើស៤លានករណីហើយ ខណៈអ្នកស្លាប់សរុបជិតជាង២៧ម៉ឺននាក់
× ករណីឆ្លង COVID-19 នៅទូទាំងពិភពលោក បានកើនលើស៤លានករណីហើយ នៅថ្ងៃទី៩ ខែឧសភា។ នេះបើយោងលើការតាមដានរបស់ទីភ្នាក់ងារព័ត៌មាន AFP ដោយផ្អែកលើប្រភពផ្លូវការ។
គិតត្រឹមព្រឹកម៉ោង ៤៖៤៥នាទីព្រឹក (ម៉ោងនៅកម្ពុជា) ករណីឆ្លង COVID-19 យ៉ាងតិច ៤ ០០១ ៤៣៧ ករណី ត្រូវបានរាយការណ៍នៅជុំវិញពិភពលោក ជាមួយអ្នកស្លាប់ ២៧៧ ១២៧នាក់។ បើតាមវេបសាយ worldometers ករណីជាសះស្បើយសរុប មានជាង១,៤៤លាននាក់។
សហរដ្ឋអាមេរិក ជាប្រទេសរងគ្រោះខ្លាំងបំផុតដោយសារវីរុសដែលផ្ទុះឡើងដំបូងក្នុងប្រទេសចិននេះ។ បើតាម AFP សហរដ្ឋអាមេរិកមានករណីឆ្លងសរុប ១,៣លានករណី និងស្លាប់ ៧៨ ៦១៨នាក់។ អឺរ៉ុប ជាទ្វីបដែលរងគ្រោះធ្ងន់ធ្ងរជាងគេ ដោយមានករណីឆ្លងជាង១,៧លានករណី និងអ្នកស្លាប់ ១៥៥ ០៧៤នាក់។
សូមបញ្ជាក់ថា ការតាមដាន AFP ដែលប្រើប្រាស់ទិន្នន័យប្រមូលបានពីអាជ្ញាធរជាតិ និងព័ត៌មានពីអង្គការសុខភាពពិភពលោក (WHO) ប្រហែលឆ្លុះបញ្ចាំងតែតួលេខមួយចំណែកតូចនៃតួលេខឆ្លងCOVID-19 ពិតប្រាកដ។ ដោយហេតុថា ប្រទេសជាច្រើន កំពុងធ្វើតេស្តរកជំងឺនេះតែសម្រាប់ករណីធ្ងន់ធ្ងរប៉ុណ្ណោះ៕
© រក្សាសិទ្ធិដោយ thmeythmey.com