COVID-19
អន្តរជាតិ
នាយករដ្ឋមន្ត្រីម៉ាឡេស៊ី លោក Muhyiddin Yassin (Xinhua)
×![]()
បទបញ្ជាគ្រប់គ្រងការចល័ត (MCO) របស់ប្រទេសម៉ាឡេស៊ី នឹងត្រូវពន្យារពេល៤សប្តាហ៍ទៀត ពោលគឺរហូតដល់ថ្ងៃទី ៩ ខែមិថុនា។ នេះគឺជាការអូសបន្លាយពេលលើកទី៤ហើយ ចាប់តាំងពីបទបញ្ជា ត្រូវបានអនុវត្តកាលពីថ្ងៃទី ១៨ ខែមីនា មក។ នាយករដ្ឋមន្ត្រីម៉ាឡេស៊ី លោក Muhyiddin Yassin បញ្ជាក់បែបនេះ។
ក្នុងសុន្ទរកថាពិសេសមួយ នៅថ្ងៃទី១០ ខែឧសភា លោកនាយករដ្ឋមន្ត្រី Muhyiddin គូសបញ្ជាក់ថា ទោះបីជាប្រទេសម៉ាឡេស៊ីមើលឃើញការវិវត្តវិជ្ជមានច្រើនក្នុងការប្រយុទ្ធប្រឆាំង COVID-19 កិច្ចប្រឹងប្រែងនេះ ពុំទាន់ទទួលជោគជ័យពេញលេញនោះឡើយ ។ បទបញ្ជាគ្រប់គ្រងការចល័ត (MCO) ដែលពន្យារចុងក្រោយបង្អស់ គឺកំណត់បញ្ចប់នាថ្ងៃទី១២ ខែឧសភា។
«ផ្អែកលើគំនិតសាធារណៈ ខ្ញុំយល់ឃើញថា ពលរដ្ឋចង់ឲ្យរដ្ឋាភិបាលបន្តចាត់វិធានការចាំបាច់ដើម្បីប្រយុទ្ធប្រឆាំងនឹងជំងឺរាតត្បាតសកល COVID-19»។ លោក Muhyiddin លើកឡើងបែបនេះ។ តាមការចុះផ្សាយរបស់ទូរទស្សន៍សិង្ហបុរី Channel News Asia លោកសង្កត់ធ្ងន់ថា ដូច្នេះហើយ តាមយោបល់ពីសំណាក់ក្រសួងសុខាភិបាល និងក្រុមប្រឹក្សាសន្តិសុខជាតិម៉ាឡេស៊ី លោកចង់ប្រកាសថា បទបញ្ជា MCO នឹងពន្យារពេលអនុវត្តរហូតដល់ថ្ងៃទី៩ ខែមិថុនា។
មែនទែនទៅ បទបញ្ជាគ្រប់គ្រងការចល័តរបស់ម៉ាឡេស៊ី ដែលបានចូលជាធរមានចាប់តាំងពីថ្ងៃទី១៨ ខែមីនា ក្នុងគោលដៅទប់ស្កាត់ការរីករាលដាល COVID-19 ធ្លាប់ពន្យារពេល៣លើកហើយ ដែលមួយលើកៗ ២សប្ដាហ៍។ ក្រោមចំណាត់ការបិទប្រទេសដោយផ្នែកមួយ អាជីវកម្មដែលពុំចាំបាច់ និងសាលរៀន ត្រូវបិទទ្វារ ខណៈការធ្វើដំណើរទាំងក្នុងស្រុកនិងអន្តរជាតិត្រូវហាមឃាត់។
ក្រោយអនុវត្តការរឹតបន្ដឹងនេះ គេឃើញមានសញ្ញាណធូរស្រាលនៃករណីឆ្លង COVID-19 ក្នុងប្រទេសម៉ាឡេស៊ី ជាមួយពីតួលេខ៣ខ្ទង់ ធ្លាក់ចុះមក២ខ្ទង់ ចាប់ផ្ដើមពីពាក់កណ្ដាល់ខែមេសា។ គិតត្រឹមថ្ងៃទី៩ ខែឧសភា ប្រទេសម៉ាឡេស៊ី មានករណីឆ្លងសរុប ៦៥៨៩ករណី និងស្លាប់ ១០៨នាក់។ ជិត៧៥ភាគរយនៃអ្នកជំងឺបានជាសះស្បើយពីCOVID-19៕
Tag:
ម៉ាឡេស៊ី
COVID-19
MCO
© រក្សាសិទ្ធិដោយ thmeythmey.com
