វៀតណាម​ខឹងតូងតាង ក្រោយ​ចិន​ប្រកាស​ហាម​ការនេសាទ​ក្នុង​តំបន់​សមុទ្រ​ចិន​ខាងត្បូង​
អន្តរជាតិ
វៀតណាម​ខឹងតូងតាង ក្រោយ​ចិន​ប្រកាស​ហាម​ការនេសាទ​ក្នុង​តំបន់​សមុទ្រ​ចិន​ខាងត្បូង​
11, May 2020 , 7:59 am        
រូបភាព
រូបភាព៖ Vietnam Explorer
រូបភាព៖ Vietnam Explorer
​រដ្ឋាភិបាល​ក្រុង​ហាណូយ បាន​ផ្ទុះ​ការ​ប្រតិកម្ម​ជាថ្មី​ប្រឆាំង​ទៅនឹង​រដ្ឋាភិបាល​ក្រុង​ប៉េកាំង ដែល​បាន​បង្កើត​សកម្មភាព​ឯកតោភាគី​ថ្មី​មួយទៀត​នៅ​តំបន់​ជម្លោះ​សមុទ្រ​ចិន​ខាងត្បូង ដែល​ធ្វើ​ឲ្យ​ប៉ះពាល់​ដល់​ប្រយោជន៍​ប្រទេស​ជាប់​ពាក់ព័ន្ធ​។ ក្រុង​ហាណូយ បន្ទោស​ក្រុង​ប៉េកាំង ថា ធ្វើ​ឲ្យ​ស្ថានភាព​នៅ​តំបន់​ជម្លោះ​កាន់តែ​ស្មុគស្មាញ​។

 
​តាមរយៈ​អ្នកនាំពាក្យ​ក្រសួងការបរទេស រដ្ឋាភិបាល​វៀតណាម នៅ​ថ្ងៃ​៨ ឧសភា បានបង្ហាញ​ការខកចិត្ត និង​ទាមទារ​ឲ្យ​រដ្ឋាភិបាល​ចិន​បញ្ឈប់​​សកម្មភាព​ឯកតោភាគី ទៅលើ​តំបន់​សមុទ្រ​ចិន​ខាងត្បូង ដែលមាន​ប្រទេស​ពាក់ព័ន្ធ​អាស៊ាន​ផ្សេងទៀត ​រួមទាំង​វៀតណាម​ផង មាន​សិទ្ធិ​គ្រប់គ្រង​អធិបតេយ្យ​នៅ​ទីនោះ​ផងដែរ​។​
 
​សេចក្តីប្រកាស​របស់រ​ដ្ឋា​ភិ​បាល​វៀតណាម​បែបនេះ ​ធ្វើឡើងបន្ទាប់ពី​រដ្ឋាភិបាល​ចិន បានចេញ​សេចក្តីសម្រេច​មួយ ​ស្តីពី​ការហាម​ការនេសាទ​រដូវ​ក្តៅ​ប្រចាំឆ្នាំ​ នៅក្នុង​តំបន់​សមុទ្រ​ចិន​ខាងត្បូង ដែល​ត្រូវ​ចាប់ពី​ថ្ងៃ​១ ឧសភា ដល់​ថ្ងៃ​១៦ សីហា​។ នេះ​បើ​យោងតាម​ការចុះផ្សាយ​រប​ស់​ភ្នាក់ងារ​ព័ត៌មាន Vietnam News​។ 
 
​តាម​ការអះអាង​របស់​លោកស្រី​អ្នកនាំពាក្យ Lê Thị Thu Hằng សកម្មភាព​នេះ គឺជា​រឿង​ឯកតោភាគី​សុទ្ធសាធ ហើយ​វៀតណាម មិនអាច​ទទួលយកបាន​ឡើយ​។ នោះ​ក៏​ព្រោះតែ សមុទ្រ​ចិន​ខាងត្បូង មិនមែនជា​របស់​កម្ម​សិទ្ធិផ្តាច់មុខ​ របស់​ចិន​តែឯង​ឡើយ​។​
 
​លោកស្រី អះអាង​ជាថ្មី​ថា វៀតណាម​មាន​អំណះអំណាង​គ្រប់​គ្រាន់តែ​ផ្នែក​ប្រ​វិត្ត​សាស្ត្រ និង​ផ្នែក​ច្បាប់​អន្តរជាតិ លើ​សិទ្ធិ​អធិបតេយ្យ​គ្រប់គ្រង​តំបន់​ប្រជុំ​កោះ ស្ព្រា​ត​លី និង​ប៉ា​រ៉ា​ហ្សែ​ល ដែលជា​ប្រជុំ​កោះធំ​ទាំងពីរ នៃ​សមុទ្រ​ចិន​ត្បូង ដែល​ចិន កំពុងតែ​ព្យាយាម​កាន់កាប់​តែម្នាក់ឯង​។ លោកស្រី បន្ថែមថា តាមច្បាប់​អន្តរជាតិ វៀតណាម មាន​សិទ្ធិ​ពេញលេញ ​ក្នុងការ​ទាញ​ផលប្រយោជន៍​ដោយ​ស្របច្បាប់​ពី​តំបន់​នោះ​។​
 
​ក្នុងអំឡុងពេល​ប៉ុន្មាន​ខែ​ដើមឆ្នាំ​២០២០​នេះ ដែលជា​ឆ្នាំ​វៀតណាម ធ្វើជា​ប្រធាន​វិលជុំ​អាស៊ាន ផង តាម​របាយការណ៍​ដែល​បាន​ចុះផ្សាយ​កន្លងមក ចិន​បាន​មាន​សកម្ម​ភាពជា​បន្តបន្ទាប់​ក្នុង​សមុទ្រ​ចិន​ខាងត្បូង​ រាប់បញ្ចូល​ទាំង​សកម្មភាព​យោធា និង​សកម្មភាព​រដ្ឋបាល​។ សកម្មភាព​យោធា​នោះ ចិន​បន្ត​បង្ហាញ​វត្ត​មាននៅ​តំបន់​មាន​ជម្លោះ​កាន់​ច្រើន ខណៈ​រដ្ឋបាល​វិញ ចិន ​បានប្រកាស​ពី​កា​រប​ង្កើ​តតំបន់​រដ្ឋបាល​ ជា​បន្តបន្ទាប់​នៅ​ទីនោះ​៕ 
 

Tag:
 ចិន
  វៀតណាម
© រក្សាសិទ្ធិដោយ thmeythmey.com