១០ថ្ងៃដំបូងនៃការរឹតបន្ដឹងចរាចរណ៍ មានម៉ូតូ និងឡានជិត២ម៉ឺនករណី ត្រូវបានផាកពិន័យ

ជាតិ

រថយន្ត

សង្គមជាតិ

11, May 2020 , 9:26 am

រូបភាព

ដោយ: ថ្មីៗ

ភ្នំពេញ៖ ក្នុងរយៈពេល១០ថ្ងៃដំបូង ពោលចាប់ពីថ្ងៃ១ដល់១០ឧសភា ឆ្នាំ២០២០ នៃការរឹតបន្ដឹងច្បាប់ស្ដីពីចរាចរណ៍ផ្លូវគោក មានយន្តយានចំនួន១៨,៤៥០គ្រឿង ល្មើសច្បាប់ ស្មើនឹង១៩,១៦០ករណី ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស។

បើតាមការចុះផ្សាយរបស់អគ្គស្នងការនគរបាលជាតិ យានយន្តជិត២ម៉ឺនគ្រឿងដែលល្មើសច្បាប់ចរាចរណ៍នោះ មាន ម៉ូតូចំនួន១៤,៦០៣គ្រឿង ស្មើនឹង១៤,៣៤០ករណី និងរថយន្ដចំនួន៤,៨៤៧គ្រឿង ស្មើនឹង៤,៨២០ករណី ដែលត្រូវបានប៉ូលិសផាកពិន័យ ទៅតាមបទល្មើសនៃច្បាប់ចរាចរណ៍នីមួយៗ។

ដោយឡែក សម្រាប់ការរឹតបន្ដឹងច្បាប់ស្ដីពីចរាចរណ៍ផ្លូវគោក ថ្ងៃទី១០ ឧសភា វិញ មានយានយន្ត ១,២២៨គ្រឿង ល្មើសច្បាប់ ស្មើនឹង១,២២៨ករណី ត្រូវបានផាកពិន័យ។ ក្នុងចំណោមយានយន្ដទាំងជាង១ពាន់គ្រឿងនោះ មានម៉ូតូ៨៤២ករណី និងរថយន្ដ៣៨៦ករណី ត្រូវបានផាកពិន័យតាមអនុក្រឹត្យលេខ៣៩ ។

អគ្គស្នងការនគរបាលជាតិបានបញ្ជាក់ថា ចំពោះអ្នកបើកបរម៉ូតូដែលល្មើសច្បាប់ចរាចរណ៍នោះ ភាគច្រើន អត់មួកសុវត្ថិភាព អត់កញ្ចក់ និងជិះបញ្ជ្រាស។ រីឯអ្នកបើកបររថយន្ដវិញ គឺអត់ពាក់ខ្សែក្រវ៉ាត់, ល្មើសល្បឿន, បណ្ណបើកបរ ដឹកលើសចំណុះ និងអត់ផ្លាកលេខជាដើម។

ចាប់តាំងពីថ្ងៃទី១ ឧសភា ឆ្នាំ២០២០មក កងកម្លាំងនគរបាលចរាចរណ៍ផ្លូវគោកនៅទូទាំងប្រទេស បានរឹតបន្តឹងអនុវត្តច្បាប់ស្តីពីចរាចរណ៍ផ្លូវគោក របស់ប្រជាពលរដ្ឋ ដោយអនុវត្តតាមអនុក្រឹត្យលេខ៣៩ អនក្រ.បក (ថ្មី) ដែលចុះថ្ងៃទី១៧ ខែមីនា ដែលមានការផាកពិន័យជាប្រាក់ច្រើន ជាងមុនពី៣ទៅ៥ដង។ អនុក្រឹត្យលេខ៣៩នេះ បានបញ្ជាក់ថា ចំពោះអ្នកបើកបរម៉ូតូ, ម៉ូតូសណ្តោងរ៉ឹម៉ក និងម៉ូតូកង់បួន ដែលល្មើសច្បាប់ចរាចរណ៍ នឹងពិន័យទឹកប្រាក់ពី៦ម៉ឺនទៅ១លានរៀល។ រីឯអ្នកបើកបរយានយន្តធុនស្រាល និងធ្ងន់ ដែលល្មើសច្បាប់ចរាចរណ៍ នឹងពិន័យពី១២ម៉ឺនទៅ៤លានរៀល។ ការពិន័យនេះ គឺអាស្រ័យទៅតាមប្រភេទនៃបទល្មើសចរាចរណ៍នីមួយៗ៕