អង់គ្លេស​ចេញ​ផែន​ការបើក​ប្រទេស​ឡើងវិញ ខណៈ​ស្ថានភាព​COVID-19​ល្អប្រសើរ​
COVID-19
អន្តរជាតិ
អង់គ្លេស​ចេញ​ផែន​ការបើក​ប្រទេស​ឡើងវិញ ខណៈ​ស្ថានភាព​COVID-19​ល្អប្រសើរ​
11, May 2020 , 2:34 pm        
រូបភាព
លោកបូរីស ចនសុន នាយករដ្ឋមន្ត្រីអង់គ្លេស។រូបភាពAFP
លោកបូរីស ចនសុន នាយករដ្ឋមន្ត្រីអង់គ្លេស។រូបភាពAFP
​លោក​បូរី​ស ច​ន​សុន នាយករដ្ឋមន្ត្រី​អង់គ្លេស​ក្នុង​សុន្ទរកថា​តាមរយៈ​ទូរទស្សន៍​នៅ​ថ្ងៃទី​១០ ខែឧសភា​នេះ បានប្រកាស​ពី​ផែនការ​បន្ធូរបន្ថយ​ការបិទ​ប្រទេស​ដែលមាន​ច្រើន​ដំណាក់កាល ដោយ​អនុញ្ញាត​ឲ្យ​សាលារៀន និង​ហាង​លក់ទំនិញ​បើក​ឡើងវិញ​នៅ​ថ្ងៃទី​១ ខែមិថុនា​។ ការប្រកាស​បែបនេះ​ធ្វើឡើង​បន្ទាប់ពី​ល្បឿន​នៃ​ការឆ្លង​នៅ​អង់គ្លេស​បន្ត​មាន​កម្រិត​ទាប​។

 
​ចាប់​តាំងតែ​ពីថ្ងៃ​ទី​២៣ ខែមីនា​មក ចក្រភព​អង់គ្លេស​បាន​បិទ​ប្រទេស​រយៈពេល​៧​សប្តាហ៍​ហើយ ដោយ​ដាក់​បញ្ជា​ឲ្យ​ប្រជាពលរដ្ឋ​ស្នាក់នៅ​ក្នុងផ្ទះ​។ ទោះជា​យ៉ាងណាក៏ដោយ ប្រទេស​ក្នុង​តំបន់​អឺរ៉ុប​នេះ​មាន​អ្នកស្លាប់​ចំនួន​៣១ ៨៥៥​នាក់ ដែលជា​ចំនួន​ច្រើន​បំផុត​បន្ទាប់ពី​សហរដ្ឋ​អាមេរិក និង​ករណី​ឆ្លង​ចំនួន​២១៩ ១៨៣​ករណី ដែលជា​ចំនួន​ច្រើន​បំផុត​ក្នុង​អឺរ៉ុប​។​
 
​ក្នុងដំណាក់កាល​ដំបូង​នៃ​ការបន្ធូរបន្ថយ​បញ្ជា​បិទ​ប្រទេស ដោយ​ចាប់ផ្តើម​ពី​សប្តាហ៍​នេះ​ទៅ រដ្ឋាភិបាល​នឹង​ជំរុញ​លើកទឹកចិត្ត​ឲ្យ​ប្រជាពលរដ្ឋ​ត្រលប់​ទៅធ្វើ​ការ​វិញ ចំពោះ​ការងារ​ណា​ដែល​មិន​អាចធ្វើ​ពី​ផ្ទះ​បាន​ដូចជា​សំណង់ និង​ផលិតកម្ម​ជាដើម​។ ចំណែក​សកម្មភាព​កីឡា​ក្រៅ​ផ្ទះ ក៏​នឹងត្រូវ​អនុញ្ញាត​ឲ្យ​មាន​វិញ​ដរាបណា​អ្នកចូលរួម​មកពី​ផ្ទះ​តែមួយ​។ នេះ​យោងតាម​ទីភ្នាក់ងារសារព័ត៌មាន AFP​។ 
 
​ចំណែកឯ នៅក្នុង​ដំណាក់កាល​ទី​២ លោកនាយក​រដ្ឋមន្ត្រី ច​ន​សុន និយាយថា​កន្លែង​មើលថែ​ទារក និង​កុមារ​តូចៗ ក៏ដូចជា​សាលារៀន​សម្រាប់​កុមារ​ចាប់ពី​អាយុ​១១​ឆ្នាំទៅ នឹងត្រូវ​បើកទ្វារ​ឡើងវិញ​នៅ​ថ្ងៃទី​១ ខែមិថុនា​។ បន្ថែម​ពីនេះ​ហាង​លក់​សម្ភារ​ដែល​មិនចាំបាច់​ខ្លះ ក៏​នឹង​អាច​បើក​ដំណើរការ​ឡើងវិញ​ផងដែរ​។ ចាប់ពី​ខែកក្កដា​ទៅ គេ​សង្ឃឹមថានឹង​បើក​ឡើងវិញ​នូវ​ឧស្សាហកម្ម​បដិសណ្ឋារកិច្ច​មួយចំនួន និង​ទីធ្លារ​សាធារណៈ​មួយចំនួន ដូចជា​ហាង​កាហ្វេ និង​សួនច្បារ ប៉ុន្តែ​ការអនុវត្ត​គម្លាត​សុវត្ថិភាព​សង្គម​នៅតែ​បន្ត​។ ប៉ុន្តែ​តៀមស្រា នឹងមិន​ត្រូវ​បើក​ឡើងវិញ​ជាច្រើន​ការ​ទៅមុខទៀត​។​
 
​លោកនាយក​រដ្ឋមន្ត្រី បូរី​ស ច​ន​សុន ក៏បាន​ប្រកាស​ផងដែរ ការធ្វើ​ច​ត្តា​ឡី​ស័ក​សម្រាប់​មនុស្ស​ទាំងឡាយ​ណា​ដែល​ចូល​ទឹកដី​អង់គ្លេស​តាម​ជើងហោះហើរ ដើម្បី​បង្ការ​ការចម្លង​ថ្មី​ពី​បរទេស​។ ក៏ប៉ុន្តែ​វិធានការ​នេះ​នឹងមិន​អនុវត្ត​ចំពោះ​អ្នក​មកពី​ប្រទេស​បារាំង​ឡើង ក្រោយពេល​បារាំង​លើកលែង​មិន​ធ្វើ​ច​ត្តា​ឡី​ស័ក​អ្នក​មកពី​ប្រទេស​អង់គ្លេស​។ 
 
​សូមបញ្ជាក់ថា ការសម្រេច​ចេញ​ផែនការ​ប​ន្ទូ​រ​បន្ថយ​ការបិទ​ប្រទេស​បែបនេះ ធ្វើឡើង​បន្ទាប់ពី​មានការ​ទាមទារ​ពី​សំណាក់​តំណាងរាស្ត្រ​អង់គ្លេស ដែល​ចង់​ឲ្យ​សេដ្ឋកិច្ច​មានដំណើរ​ការ​ឡើងវិញ និង​ជាពិសេស​ក្រោយពេល​ធនាគារ​អង់គ្លេស​ព្យាករ​ថា​ផលិតផល​សរុប​ក្នុងស្រុក​ក្នុង​ឆ្នាំ​២០២០​នេះ នឹងមាន​ការធ្លាក់ចុះ​១៤​ភាគរយ​៕
 

Tag:
 ចក្រភព​អង់គ្លេស​
  បូរី​ស ច​ន​សុន​
  COVID-19
© រក្សាសិទ្ធិដោយ thmeythmey.com