អន្តរជាតិ
នាវាយោធាអ៊ីរ៉ង់ បាញ់មីស៊ីលភ្លាត់ស្នៀតសម្លាប់នាវឹក១៩នាក់នៅឈូងសមុទ្រអូម៉ង់ រូបតំណាង
× នាវឹក ១៩នាក់ ត្រូវបានសម្លាប់ និង១៥នាក់ទៀត រងរបួសក្នុងហេតុការណ៍បាញ់មីស៊ីលភ្លាត់ស្នៀត ពាក់ព័ន្ធនាវាយោធាអ៊ីរ៉ង់ ២ គ្រឿង។ ទាហានជើងទឹកអ៊ីរ៉ង់ ចេញមុខប្រកាសបែបនេះ។
ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា មីស៊ីលប្រឆាំងនាវាថ្មីមួយ ដែលបានបាញ់សាកល្បងចេញពីនាវាយោធាមួយគ្រឿងឈ្មោះថា Jamaran ហើយគ្រាប់មីស៊ីលបានហោះទៅបុកនាវាជំនួយធុនស្រាលមួយគ្រឿង ឈ្មោះ Konarak កាលពីថ្ងៃទី ១០ ខែឧសភា ក្នុងឈូងសមុទ្រអូម៉ង់។
ឧបទ្ទវហេតុនេះ បានកើតឡើងអំឡុងការធ្វើសមយុទ្ធមួយ នៅក្បែរច្រកសមុទ្រ Hormuz ។ មែនទែនទៅ កងទ័ពអ៊ីរ៉ង់ ជាទៀតទាត់ តែងធ្វើសមយុទ្ធយោធាក្នុងផ្លូវទឹកយុទ្ធសាស្ត្រនេះ។
បើតាមការចុះផ្សាយរបស់ទូរទស្សន៍រដ្ឋអីរ៉ង់ នាវានេះ ត្រូវបានបាញ់ ក្រោយបើកចូលទៅតំបន់គោលដៅសាកល្បង ហើយពុំបានបង្កើតគម្លាតចម្ងាយគ្រប់គ្រាន់រវាងខ្លួនឯង និងគោលដៅ។ ហេតុការណ៍នេះបានកើតឡើង នៅក្បែរកំពង់ផែ Jask ចម្ងាយប្រមាណ ១២៧០គីឡូម៉ែត្រ ពីភាគអាគ្នេយ៍រដ្ឋធានី តេអេរ៉ង់ ក្នុងឈូងសមុទ្រអូម៉ង់។
នាវា Jamaran និងនាវា Konarak ត្រូវបានបញ្ជាក់ថា ជាកម្មសិទ្ធិរបស់កងទ័ពជើងទឹកអ៊ីរ៉ង់៕
© រក្សាសិទ្ធិដោយ thmeythmey.com