កូរ៉េខាងត្បូង នឹង​ចាត់វិធានការ​តឹងរ៉ឹង​លើ​អ្នក​ទៅលេង​ក្នុង​ក្លឹប​កម្សាន្ត ក្នុង​តំបន់​Itaewon
COVID-19
អន្តរជាតិ
កូរ៉េខាងត្បូង នឹង​ចាត់វិធានការ​តឹងរ៉ឹង​លើ​អ្នក​ទៅលេង​ក្នុង​ក្លឹប​កម្សាន្ត ក្នុង​តំបន់​Itaewon
11, May 2020 , 10:39 pm        
រូបភាព
លោកនាយករដ្ឋមន្រ្តីកូរ៉េខាងត្បូង លោក  Chung Sye-kyun។ រូបភាព៖ Yonhap
លោកនាយករដ្ឋមន្រ្តីកូរ៉េខាងត្បូង លោក Chung Sye-kyun។ រូបភាព៖ Yonhap
រដ្ឋាភិបាល​ទីក្រុង​សេ​អ៊ូ​ល នឹង​ចាត់វិធានការ​ដ៏​តឹងរ៉ឹង ប្រសិនបើ​អ្នក​ដែល​បាន​ទៅ​កម្សាន្ត​នៅក្នុង​ក្លឹប នា​តំបន់​ពហុវប្បធម៌ Itaewon ដ៏​ល្បីឈ្មោះ​ប្រចាំ​រដ្ឋធានី​សេ​អ៊ូ​ល មិន​ចូល​រួមសហការ​ធ្វើតេស្ត ដើម្បី​រកមើល​ជំងឺ​រលា​ក​សួត ដែល​បង្កដោយ​កូ​រ៉ូ​ណាវី​រុស (COVID-19)​។ នេះ​បើតាម​ការលើកឡើង​រប​ស់​នាយករដ្ឋមន្ត្រី​កូរ៉េខាងត្បូង លោក​Chung Sye-kyun នា​ថ្ងៃទី​១១ ខែឧសភា​។ ការបញ្ជាក់​របស់​នាយ​ក​រដ្ឋមន្ត្រី​បែបនេះ ធ្វើឡើង​បន្ទាប់ពី​កូរ៉េខាងត្បូង បាន​រកឃើញ​ករណី​ឆ្លង​ជាថ្មី​។​

​បន្ទាប់ពី​ស្ថានភាព​ជំងឺឆ្លង COVID-19 នៅក្នុង​ប្រទេស​បាន​ថមថយ​មួយរយៈ កូរ៉េខាងត្បូង​នាពេល​ថ្មីៗ​នេះ បាន​រាយការណ៍​ពី​ការកើនឡើង​ករណី​ឆ្លង​ជាថ្មី​។ ភាគច្រើន​នៃ​ករណី​ថ្មី​ទាំងនេះ គឺមាន​ពាក់ព័ន្ធ​នឹង​ករណី​ឆ្លង​នៅក្នុង​តំបន់​ពហុវប្បធម៌ Itaewon ដ៏​ល្បីឈ្មោះ​ប្រចាំ​រដ្ឋធានី​សេ​អ៊ូ​ល​។ មកទល់ពេលនេះ អាជ្ញាធរ​សុខាភិបាល​កូរ៉េខាងត្បូង បាន​រកឃើញ​អ្នកជំងឺ​COVID-19 ចំនួន ៧៥​នាក់​ហើយ មាន​ពាក់ព័ន្ធ​នឹង​តំបន់​ពហុវប្បធម៌ Itaewon ។​
 
​ដោយ​មើលឃើញ​ពី​បញ្ហា​ប្រឈម​នៃ​ការកើនឡើង​ករណី​ឆ្លង​ជាថ្មី នាយករដ្ឋមន្ត្រី​កូរ៉េខាងត្បូង លោក​Chung Sye-kyun នា​កិច្ចប្រជុំ​អាជ្ញាធរ​ឆ្លើយតប​នឹង​កូ​រ៉ូ​ណាវី​រុស ព្រមាន​ពី​ការចាត់វិធានការ​ដ៏​តឹងរ៉ឹង​លើ​បុគ្គល​ដែល​បាន​ទៅ​កម្សាន្ត​នៅក្នុង​ក្លឹប​នា​តំបន់ Itaewon ទាំងអស់ បើ​មិន​ចូលរួម​សហការ​ជាមួយ​រដ្ឋាភិបាល​កូរ៉េខាងត្បូង ក្នុងការ​ធ្វើតេស្ត​រកមើល​COVID-19​។ ការព្រមាន​នេះ​ធ្វើឡើង​បន្ទាប់ពី​កូរ៉េខាងត្បូង បានធ្វើ​តេស្ត​មនុស្ស​តិចជាង​ពាក់កណ្តាល នៃ​អ្នក​ដែល​ពាក់ព័ន្ធ​នឹង​ករណី​ឆ្លង​ក្នុង​តំបន់ Itaewon​។ នេះ​បើតាម​ការចុះផ្សាយ​របស់​ទីភ្នាក់ងារ​ព័ត៌មាន Yonhap​។ 
 
​បន្ថែម​ពីលើ​នេះ កូរ៉េខាងត្បូង ក៏​ត្រៀម​ចាត់វិធានការ​ធ្វើតេស្ត​ទ្រង់ទ្រាយ​ធំ​នៅក្នុង​ទីក្រុង​សេ​អ៊ូ​ល និង​តំបន់​ជុំវិញ​ទីក្រុង​ផងដែរ​។ 
​បើតាម​កិច្ច​សម្ភាស​ជាមួយ​ប្រព័ន្ធ​ផ្សព្វផ្សាយ​ក្នុងស្រុក KBS លោក​អភិបាលក្រុង​សេ​អ៊ូ​ល បាន​បញ្ជាក់ថា មនុស្ស​ចំនួន ៥៥១៧​នាក់ បាន​ទៅ​កម្សាន្ត​នៅក្នុង​ក្លឹប​ដែល​អ្នកជំងឺ​COVID-19 បាន​ទៅ​។ ក្នុងនោះ​មនុស្ស​ចំនួន ២៤០៥ គឺមាន​ការពាក់ព័ន្ធ​ជាមួយ​អ្នកជំងឺ​។ 
 
​សូមបញ្ជាក់ថា ដោយសារ​តែមាន​ករណី​ឆ្លង​នៅក្នុង​ក្លឹប​បែបនេះ អាជ្ញាធរ​ក្រុង​សេ​អ៊ូ​ល​នៃ​ប្រទេស​កូរ៉េខាងត្បូង បាន​បញ្ជា​ឲ្យ​បិទ​ក្លិប​កម្សាន្ត និង​រង្គសាល​ទាំងអស់ ដោយ​ព្រួយបារម្ភ​ពី​ការឆ្លង​COVID-19 ដ៏​គំហុក​កើតមាន​សារជាថ្មី​ម្តងទៀត​។ គិត​មក​ត្រឹម​ពេលនេះ កូរ៉េខាងត្បូង​មាន​ករណី​COVID-19 សរុប​ចំនួន ១០៩០៩​ករណី អ្នកស្លាប់​ចំនួន ២៥៦​នាក់ អ្នកជា​សះស្បើយ​មាន​ចំនួន ៩៦៣២​នាក់​៕ 

Tag:
 កូរ៉េខាងត្បូង​
  COVID-19
© រក្សាសិទ្ធិដោយ thmeythmey.com