COVID-19
អន្តរជាតិ
ម៉ិកស៊ិក និងប្រេស៊ីល រួមគ្នាផលិតរថយន្តបានតែជាង៥ពាន់គ្រឿងប៉ុណ្ណោះក្នុងខែមេសា
× ម៉ិកស៊ិក និងប្រេស៊ីល ដែលជាទីតាំងផលិតយានយន្តធំជាងគេនៅអាមេរិកឡាទីន បានថយចុះចង្វាក់ផលិតកម្មរបស់ខ្លួនដល់ទៅ៩៩ភាគរយនាអំឡុងខែមេសា ដោយសារតែវិបត្តិ COVID-19។ យោងតាមការផ្សាយរបស់ទីភ្នាក់ងារព័ត៌មានអាត្លង់ទិកខាងត្បូង MercoPress ប្រទេសទាំងពីរផលិតរថយន្តបានតែ៥ ៥៦៩គ្រឿងប៉ុណ្ណោះកាលពីខែមុន។
ជាទូទៅ ម៉ិកស៊ិក និងប្រេស៊ីល ផលិតរថយន្តបានជាងកន្លះលានគ្រឿងក្នុង១ខែ ដោយសហគ្រាសយានយន្តផ្តល់ឱកាសការងាររាប់រយពាន់កន្លែង និងរួមចំណែកខ្ពស់ដល់ផលទុនជាតិសរុបនៅក្នុងប្រទេសរៀងៗខ្លួន។
លោក Luiz Carlos Moraes ប្រធានសមាគមក្រុមហ៊ុនផលិតយានយន្តប្រេស៊ីល បានថ្លែងប្រាប់អ្នកសារព័ត៌មានថា ស្ថានភាពសព្វថ្ងៃពិតជាពិបាកវេទនាខ្លាំងណាស់ ដោយ COVID-19 បង្កបញ្ហាគ្រប់បែបយ៉ាង ជាពិសេសបណ្តាញផ្គត់ផ្គង់អន្តរជាតិ។
ដោយព្រួយបារម្ភពីការបាត់បង់ដៃគូ ដោយមួយចំនួនសម្រេចវិលទៅរកចិនវិញនោះ បណ្តាសហគ្រាសផលិតយានយន្តនៅអាមេរិកឡាទីន ត្រូវការជំនួយគាំទ្រជាចាំបាច់ពីសំណាក់រដ្ឋាភិបាលរបស់ខ្លួន។
ម៉ិកស៊ិកគ្រោងដំណើរការចង្វាក់ផលិតកម្មពេញលេញវិញនៅថ្ងៃទី១៨ ខែឧសភា នេះ ខណៈប្រេស៊ីលត្រៀមខ្លួននៅខែមិថុនា៕
© រក្សាសិទ្ធិដោយ thmeythmey.com