COVID-19
អន្តរជាតិ
ប្រធានាធិបតីហ្គាណា ប្រកាសរឿងកម្មកររោងចក្រត្រីម្នាក់ចម្លងCOVID-19គេជាង៥០០នាក់ លោក Nana Akufo-Addo ប្រធានាធិបតីហ្គាណា (AFP)
× កម្មកររោងចក្រត្រីម្នាក់ក្នុងទីក្រុង Tema ប្រទេស ហ្គាណា បានចម្លងជំងឺCOVID-19 ដល់កម្មករផ្សេងទៀតសរុប ៥៣៣នាក់ ដែលបម្រើការនៅរោងចក្រតែមួយ។ លោក Nana Akufo-Addo ប្រធានាធិបតីប្រទេសក្នុងតំបន់អាហ្វ្រិកមួយនេះ បញ្ជាក់បែបនេះតាមរយៈទូរទស្សន៍ កាលពីថ្ងៃទី ១០ ខែឧសភា ។
អាជ្ញាធរសុខាភិបាលប្រទេសហ្គាណា បានរាយការណ៍ពីការផ្ទុះរាលដាលCOVID-19 ក្នុងទីតាំងរោងចក្រមួយនេះ កាលពីយប់ថ្ងៃទី ៨ ខែឧសភា ក៏ប៉ុន្តែពុំផ្ដល់ព័ត៌មានលម្អិត។
«មនុស្សទាំងអស់ ៥៣៣នាក់ ឆ្លងពីមនុស្សម្នាក់»។ លោកប្រធានាធីបតី Akufo-Addo បញ្ជាក់បែបនេះ តែពុំផ្ដល់ព័ត៌មានលម្អិតជុំវិញរបៀបនៃចម្លងទ្រង់ទ្រាយធំក្នុងរោងចក្រនេះ ឬប្រសិនបើខាងរោងចក្រ ឬរដ្ឋាភិបាល ដាក់ចេញចំណាត់ការសុវត្ថិភាពណាមួយ។
តាមការចុះផ្សាយរបស់ទីភ្នាក់ងារព័ត៌មាន Reuters លោក Akufo-Addo លើកឡើងថា ករណីវិជ្ជមានទាំង៥៣៣ករណី ស្មើនឹង១១,៣ភាគរយនៃករណីឆ្លងCOVID-19សរុបរបស់ប្រទេសហ្គាណា។ ជាមួយតួលេខថ្មីនេះ ករណីឆ្លងសរុបនៅប្រទេសនេះ ឡើងសរុបដល់ ៤៧០០ គិតចាប់ពីករណីដំបូងរកឃើញកាលពីពាក់កណ្ដាលខែមីនា។ នេះជាតួលេខខ្ពស់បំផុត ក្នុងតំបន់អាហ្វ្រិកភាគខាងលិច។
បើតាមលោកប្រធានាធិបតី មនុស្ស២២នាក់ បានបាត់បង់ជីវិតដោយសារCOVID-19 ខណៈអ្នកជាសះស្បើយមាន ៤៩៤នាក់។ ជាមួយការធ្វើតេស្តមនុស្សសរុប ១៦០ ៥០១នាក់ គិតចាប់ពីផ្ទុះរាលដាលមក លោក Akufo-Addo បញ្ជាក់ថា ប្រទេសលោកបានធ្វើតេស្តមនុស្សរកCOVID-19 លើសប្រទេសណាៗទាំងអស់ក្នុងតំបន់អាហ្វ្រិកទាំងមូល។
«ការអនុវត្តយុទ្ធសាស្ត្ររបស់យើង រួមមាន ការតាមដាន ធ្វើតេស្ត និងព្យាបាល គឺជាវិធីសាស្ត្រច្បាស់លាស់បំផុតក្នុងការស្វែងរកប្រភពនៃវីរុសនេះ»។ លោក Akufo-Addo សង្កត់ធ្ងន់បែបនេះ។
ម្យ៉ាងវិញទៀត លោកប្រធានាធិបតិហ្គាណារូបនេះ បានប្រកាសពន្យារពេលលើបម្រាមប្រមូលផ្ដុំមនុស្សជាសាធារណៈ រហូតដល់ចុងខែឧសភា ហើយសាលារៀន និងសាកលវិទ្យាល័យ នឹងបន្តបិទទ្វារដដែល។ យ៉ាងណាមិញ លោកបានបន្ធូរបន្ថយបទបញ្ជាបិទប្រទេសក្នុងទីក្រុងសំខាន់២ រួមមាន ទីក្រុង Accra និង ទីក្រុង Kumasi កាលពីថ្ងៃទី១៩ ខែមេសា ដោយបារម្ភពីហានិភ័យលើសេដ្ឋកិច្ចដោយសារការបិទប្រទេសយូរពេក៕
Tag:
ហ្គាណា
COVID-19
Nana Akufo-Addo
© រក្សាសិទ្ធិដោយ thmeythmey.com