WHO ទទូចឲ្យប្រទេសដែលប្រញាប់បន្ធូរការរឹតត្បិតCOVID-19 «ប្រុងប្រយ័ត្នខ្ពស់»

COVID-19

អន្តរជាតិ

WHO ទទូចឲ្យប្រទេសដែលប្រញាប់បន្ធូរការរឹតត្បិតCOVID-19 «ប្រុងប្រយ័ត្នខ្ពស់»

12, May 2020 , 11:16 am

រូបភាព

នាយកប្រតិបត្តិអង្គការសុខភាពពិភពទទួលបន្ទុកកម្មវិធីអាសន្ន លោក Michael Ryan (ខាងឆ្វេង) និងនាយកអង្គការសុខភាពពិភពលោក លោក Tedros Adhanom Ghebreyesus។ រូបភាព៖ AFP

ដោយ: ធៀន ភារិន្ទ

អង្គការសុខភាពពិភពលោក (WHO) នាថ្ងៃទី១១ ខែឧសភា បានសាទរលើលទ្ធផលនៃការទប់ស្កាត់ និងបង្ការ COVID-19 កន្លងមករបស់បណ្តាប្រទេសមួយចំនួន ដែលមានតួលេខអ្នកឆ្លង និងអ្នកស្លាប់បានធ្លាក់ចុះជាលំដាប់។ ពាក់ព័ន្ធនឹងបញ្ហានេះ WHO បានទទូចឲ្យប្រទេសមួយចំនួនដែលប្រញាប់បើកប្រទេសឡើងវិញ មាន «ការប្រុងប្រយ័ត្នខ្ពស់» ដើម្បីការពារការកើនឡើងករណីឆ្លងសារជាថ្មីនៅក្នុងប្រទេស។

បណ្តាប្រទេសអឺរ៉ុប ក៏ដូចជាប្រទេសមួយចំនួន បានបន្ធូរបន្ថយការរឹតត្បិតនៅក្នុងប្រទេសជាបណ្តើរៗហើយគិតមកត្រឹមពេលនេះ ។ ការសម្រេចបែបនេះ ធ្វើឡើងបន្ទាប់ពីស្ថានភាពឆ្លង និងស្លាប់ដោយសារកូរ៉ូណាវីរុស បានធ្លាក់ចុះ។ ទាក់ទងនឹងបញ្ហានេះ លោក Tedros Adhanom Ghebreyesus នាយកអង្គការសុខភាពពិភពលោក បានសរសើរថា វាគឺជារឿងល្អសម្រាប់ប្រទេសទាំងអស់ ដែលមានដំណោះស្រាយល្អ ក្នុងការកាត់បន្ថយអត្រាឆ្លង និងការពារអាយុជីវិតប្រជាជន។

យ៉ាងណាក៏ដោយ បើទោះបីជាមានករណីឆ្លង និងស្លាប់ធ្លាក់ចុះក៏ពិតមែន អង្គការ WHO នៅតែជំរុញឲ្យប្រទេសមួយចំនួន មានការប្រុងប្រយ័ត្នជាងមុនផងដែរ ដើម្បីបង្ការការកើនឡើងករណីឆ្លងជាថ្មី។ បើតាមលោក Michael Ryan នាយកប្រតិបត្តិWHOទទួលបន្ទុកកម្មវិធីអាសន្ន ក៏បានសាទរការធ្លាក់ចុះនៃតួលេខអ្នកឆ្លងដែរ និងបញ្ជាក់ថា ស្ថានភាពដ៏ល្អនេះ គឺជាសញ្ញានៃក្តីសង្ឃឹម។ យ៉ាងណាក៏ដោយ លោក Ryan ក៏បានស្នើប្រទេសទាំងអស់ឲ្យមាន «ការប្រុងប្រយ័ត្នខ្ពស់» ព្រោះវីរុសមួយនេះ អាចឆ្លងទៅមនុស្សជាច្រើនឡើងវិញ ក្នុងអំឡុងពេលបើកប្រទេស និងការបន្ធូរបន្ថយការរឹតត្បិតការធ្វើដំណើរ។

បន្ថែមពីលើនេះ WHO ក៏បានអំពាវនាវឲ្យមានការពន្លឿនការឆ្លើយតបប្រឆាំងកូរ៉ូណាវីរុស ការធានាពីការរកឃើញករណីឆ្លងថ្មីៗ និងការព្យាយាមស្វែងរកមនុស្សមួយចំនួន ដែលមានការពាក់ព័ន្ធនឹងអ្នកជំងឺ COVID-19។ ចំណាត់ការបែបនេះ គឺដើម្បីទប់ស្កាត់រលកឆ្លងលើកទីពីរ នៃ COVID-19។ ទោះជាបែបនេះក្តី អង្គការសុខភាពពិភពលោក ក៏បានទទួលស្គាល់ផងដែរថា មានប្រទេសមួយចំនួន បានចាត់វិធានការពារ និងស្វែងរក COVID-19 ខណៈប្រទេសមួយចំនួន មិនអនុវត្តវិធានស្រាវជ្រាវឡើយ។

សូមបញ្ជាក់ថា គិតត្រឹមថ្ងៃទី១១ ខែឧសភា ពិភពលោកមានករណី COVID-19 សរុបចំនួន ៤,២៥លានករណី អ្នកស្លាប់មានចំនួនជិត ២៩ម៉ឺននាក់ និងអ្នកជាសះស្បើយមានចំនួនជាង ១,៥លាននាក់៕