ពីនេះ ពីនោះ
សុខភាព
កុំរំលង! អាហារអ្វីខ្លះជាប្រភពដ៏ប្រសើរនៃវីតាមីន D?
× វីតាមីន D គឺចាំបាច់ណាស់សម្រាប់សុខភាពរាងកាយ។សារធាតុចិញ្ចឹមនេះ គឺសំខាន់សម្រាប់មុខងារប្រព័ន្ធភាពស៊ាំ ពង្រឹងសុខភាពឆ្អឹង និងទប់ស្កាត់ការរលាក។ មួយក្នុងចំណោមវិធីដ៏ល្អបំផុតដើម្បីទទួលបានវីតាមីន D គឺការដាក់ឱ្យស្បែកត្រូវពន្លឺព្រះអាទិត្យ។ ទោះជាយ៉ាងណាការរួមបញ្ចូលអាហារមានផ្ទុកសម្បូរទៅដោយវីតាមីន D ក្នុងរបបអាហារប្រចាំថ្ងៃក៏ជាអ្វីដែលអ្នកគួរធ្វើផងដែរ។ ប៉ុន្តែថាតើអាហារអ្វីខ្លះទៅមានផ្ទុកសម្បូរទៅដោយវីតាមីន D ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារទាំងនោះ ៖
១. ត្រីសាលម៉ុន
ការទទួលទានត្រីសាលម៉ុនផ្ដល់ឱ្យរាងកាយនូវវីតាមីន D ច្រើនដល់ទៅ ២២៧ ភាគរយនៃតម្រូវការប្រចាំថ្ងៃ។ អ្វីដែលកាន់តែប្រសើរទៀតនោះ គឺត្រីសាលម៉ុនជាប្រភពដ៏ប្រសើរនៃប្រូតេអ៊ីននិងអាស៊ីតខ្លាញ់អូមេហ្កា ៣ ដែលល្អណាស់សម្រាប់សុខភាពសាច់ដុំ ខួរក្បាល និងបេះដូង។
២. ត្រីសាឌីន
ត្រី ១០០ ក្រាមនៃត្រីសាឌីនអាចផ្ដល់ឱ្យរាងកាយនូវវីតាមីន D ចាំបាច់ប្រចាំថ្ងៃដល់ទៅ ១២០ ភាគរយ។ ហើយក៏ដូចនឹងត្រីសាលម៉ុនដែរ ត្រីសាឌីនក៏មានផ្ទុកសម្បូរទៅដោយប្រូតេអ៊ីននិងអាស៊ីតខ្លាញ់អូមេហ្កា ៣ ។ ការទទួលទានត្រីសាឌីនកំប៉ុងអាចផ្ដល់កាល់ស្យូមបន្ថែមដល់រាងកាយកាត់បន្ថយហានិភ័យនៃជំងឺពុកឆ្អឹង។
៣. អ័យស្ទរ
ក្រៅពីជាប្រភពដ៏ប្រសើរបំផុតមួយនៃវីតាមីន D ហើយនោះ អាហារសមុទ្រនេះក៏មានផ្ទុកសម្បូរទៅដោយជាតិដែកដែលជួយផលិតកោសិកាគ្រាប់ឈាមក្រហម ព្រមទាំងម៉ាញ៉េស្យូមដែលល្អសម្រាប់សសៃប្រសាទនិងសាច់ដុំផងដែរ។
៤. ឈីស
វីតាមីន D មានផ្ទុកនៅក្នុងឈីសច្រើនជាងទឹកដោះគោ។ ការទទួលទានឈីសក្នុងកម្រិតមធ្យម គឺល្អណាស់ដើម្បីបំពេញតម្រូវការវីតាមីន D ប្រចាំថ្ងៃ។ ឈីសក៏ជាប្រភពដ៏ល្អនៃប្រូតេអ៊ីន កាល់ស្យូម ម៉ាញ៉េស្យូម ផូស្វ័រ ស័ង្កសី វីតាមីន A វីតាមីន B2 និងវីតាមីន B12 ផងដែរ។
៥. តៅហ៊ូ
ប្រភពដ៏ល្អបំផុតមួយទៀតនៃវីតាមីន D គឺតៅហ៊ូ។ ត្រឹម ១០០ ក្រាមនៃតៅហ៊ូអាចផ្ដល់ឱ្យរាងកាយនូវវីតាមីន D ចាំបាច់ប្រចាំថ្ងៃដល់ទៅ ២៦ ភាគរយ។ តៅហ៊ូក៏មានផ្ទុកសម្បូរទៅដោយប្រូតេអ៊ីន កាល់ស្យូម ជាតិដែក ផូស្វ័រ សេលេញ៉ូម ម៉ង់កាណែស ទង់ដែង ម៉ាញ៉េស្យូម និងស័ង្កសី៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com