អង្គការ UNICEF នៅថ្ងៃទី១១ ខែឧសភា បានអំពាវនាវសុំទឹកប្រាក់១,៦ពាន់លានដុល្លារ ដែលកើនឡើងទ្វេដង ប្រៀបទៅនឹងសំណើដំបូងកាលពី២ខែមុន។ អង្គការអន្តរជាតិនេះ ត្រូវការលុយមូលនិធិទាំងអស់នេះ ដើម្បីជួយកុមារដែលកំពុងរងគ្រោះដោយសារជំងឺរាតត្បាតសកល COVID-19 និងវិបត្តិមនុស្សធម៌បណ្តាលមកពីជម្លោះប្រដាប់អាវុធ។
ចាប់តាំងពីប្រកាសការអំពាវនាវកាលពីចុងខែមីនាមក អង្គការ UNICEF ទើបតែទទួលបានទឹកប្រាក់ចំនួន ២១៥លានដុល្លារប៉ុណ្ណោះ។ យោងតាមទីភ្នាក់ងារសារព័ត៌មាន Reuters លោកស្រី Henrietta Fore នាយកប្រតិបត្តិរបស់UNICEF បានលើកឡើងថា៖«យើងបានឃើញហើយពីអ្វីដែលកើតឡើង បណ្តាលមកពីជំងឺឆ្លងនៅប្រទេសដែលមានប្រព័ន្ធសុខាភិបាលទំនើប ហើយយើងព្រួយបារម្ភ ចំពោះអ្វីដែលនឹងកើតឡើង នៅប្រទេសដែលមានប្រព័ន្ធសុខាភិបាលទន់ខ្សោយ និងមានធនធានតិច»។
UNICEF នៅពេលនេះ កំពុងផ្តោតការយកចិត្តទុកដាក់ ទៅលើការឆ្លើយតបនឹងជំងឺរាតត្បាតសកល COVID-19 នៅប្រទេសដែលកំពុងមានវិបត្តិមនុស្សធម៌ស្រាប់ ដោយផ្តោតទៅលើ ការបង្ការការឆ្លង និងកាត់បន្ថយការប៉ះពាល់ ទៅលើការទទួលបានសេវាសុខាភិបាល អាហារូបត្ថម្ភ ទឹកស្អាត និងអនាម័យ ការអប់រំ និងការការពារ។
«ជំងឺរាតត្បាតសកល ដែលជាវិបត្តិសុខាភិបាល បានប្រែក្លាយយ៉ាងរហ័សទៅជាវិបត្តិសិទ្ធិកុមារ»។ នេះជាការបន្ថែមរបស់លោកស្រី Fore ប្រមុខUNICEF។ លោកស្រី Fore អះអាងថា មូលនិធិទាំងអស់នោះ នឹងជួយពិភពលោក ក្នុងការឆ្លើយតបទៅនឹងវិបត្តិ ជួយឲ្យងើបឡើងវិញក្រោយវិបត្តិ និងការពារកុមារពីផលប៉ះពាល់ទាំងនោះ។
យោងតាមការវិភាគរបស់ UNICEF កុមារប្រមាណ៧៧ភាគរយ ក្នុងប្រទេសចំនួន១៣២ ដែលមានចំនួនស្មើនឹង ១,៨ ពាន់លាននាក់ កំពុងតែរស់នៅមួយកន្លែង ដោយសារតែមានការរឹតត្បិតនូវការបម្លាស់ទី។ ចំណែកឯ អង្គការសហប្រជាជាតិ កាលពីសប្តាហ៍មុន ក៏បានបង្កើនការអំពាវនាវរបស់ខ្លួន មួយជាបីផងដែរ ដើម្បីស្វែងរកទឹកប្រាក់ ៦,៧ ពាន់លានដុល្លា ក្នុងការជួយប្រទេសចំនួន៦៣ នៅអាហ្វ្រិក និងអាមេរិកឡាទីន ដែលសុទ្ធសឹងតែជាប្រទេសងាយរងគ្រោះ ដើម្បីប្រយុទ្ធនឹងជំងឺឆ្លង និងរក្សាស្ថិរភាពដែលបណ្តាលមកពីជំងឺ COVID-19។
ប្រមុខអង្គការសហប្រជាជាតិ លោក António Guterres បានលើកឡើងពីកង្វល់ ជុំវិញការគាំទ្រមិនគ្រប់គ្រាន់សម្រាប់ប្រទេសក្រីក្រ និងសោកស្តាយចំពោះកង្វះខាតភាពជាអ្នកដឹកនាំរបស់ប្រទេសមហាអំណាច ក៏ដូចជាការប្រេះស្រាំរបស់សហគមន៍អន្តរជាតិ ក្នុងការប្រយុទ្ធប្រឆាំងនឹងជំងឺឆ្លង។
បន្ថែមពីនេះ ក្រុមប្រឹក្សាសន្តិសុខរបស់អង្គការសហប្រជាជាតិ ពុំទាន់អាចចរចាបាន សេចក្តីសម្រេចចិត្តស្តីពីបទឈប់បាញ់សកលឡើយ ក្រោយពេលជួបចរចាជាង៦សប្តាហ៍មកហើយ។ គួរបញ្ជាក់ផងដែរថា មកដល់ពេលនេះជំងឺ COVID-19 បានចម្លងមនុស្សជាង ៤,១លាននាក់ និងសម្លាប់មនុស្សជាង ២៨២,០០០ នាក់៕