COVID-19
អន្តរជាតិ
ព្រលានយន្តហោះអន្តរជាតិ សុវណ្ណភូមិ ថៃ (កាសែតបាងកកប៉ុស្តិ៍)
×![]()
ក្រសួងទេសចរណ៍ និងកីឡាថៃ កំពុងពិចារណាដាក់ពន្ធ ៣០០បាត (ប្រមាណ៩,៣ដុល្លារ) ឬទាបជាងនេះ លើភ្ញៀវទេសចរបរទេសម្នាក់ៗ ដែលចូលមកកម្សាន្តក្នុងប្រទេសខ្លួន កាលណាសកម្មភាពទេសចរណ៍ និងជើងហោះហើរ ដំណើរការឡើងវិញ។ 
រដ្ឋមន្ត្រីក្រសួងទេសចរណ៍ថៃ Phiphat Ratchakitprakarn នៅថ្ងៃទី១២ ខែឧសភា គូសបញ្ជាក់ថា ពន្ធនេះ នឹងត្រូវប្រមូលយក កាលណាជនបរទេសមកដល់ប្រទេសថៃ ទាំងតាមរយៈផ្លូវអាកាស ផ្លូវគោក ឬផ្លូវទឹក។ តាមកាសែតបាងកកប៉ុស្ត៍ ការយកពន្ធបែបនេះ គឺជាផ្នែកមួយនៃផែនការយុទ្ធសាស្ត្រជាតិរយៈពេល២០ឆ្នាំ ដែលតម្រូវឲ្យភ្នាក់ងាររដ្ឋាភិបាលពង្រឹងការយកចំណូលដើម្បីធ្វើឲ្យសេដ្ឋកិច្ចជាតិមានស្ថិរភាពនិងចីរភាព។
លុយពន្ធដែលប្រមូលបាននេះ នឹងប្រគល់ទៅឲ្យមូលនិធិវិស័យទេសចរណ៍ ដែលចាត់ចែងដោយក្រសួងទេសចរណ៍ថៃ ហើយមានគោលដៅអភិវឌ្ឍ និងកសាងឡើងវិញនូវសង្វាក់ផ្គត់ផ្គង់វិស័យទេសចរណ៍ ក៏ដូចជាផ្ដល់ជូនកិច្ចគាំពារផ្នែកសន្តិសុខនិងសុវត្ថិភាពចំពោះភ្ញៀវទេសចរ។
«គំនិតនេះ ត្រូវបានផ្ដួចផ្ដើមឡើង កាលពីឆ្នាំមុន តែត្រូវពន្យារពេលព្រោះជំងឺរាតត្បាត COVID-19។ ឥឡូវនេះ គឺជាពេលវេលាល្អសម្រាប់ផ្ដើមគិតគូរការប្រមូលហើយ»។ លោករដ្ឋមន្ត្រី Phiphat បញ្ជាក់បែបនេះ ដោយបន្ថែមថា គោលដៅគឺចង់យកពន្ធលើភ្ញៀវទេសចដែលចូលមកក្នុងប្រទេសថៃតាមរយៈផ្លូវអាកាស ដោយគិតលុយបន្ថែមលើសំបុត្រយន្តហោះពួកគេតែម្ដង។ យ៉ាងណាមិញ រដ្ឋាភិបាលថៃ ពុំទាន់សម្រេចលើការប្រមូលលុយតាមរយៈផ្លូវទឹក និងផ្លូវគោកនៅឡើយទេ។
«ជំងឺរាតត្បាតសកល COVID-19 មានប៉ះពាល់ធ្ងន់ធ្ងរលើទំនុកចិត្តវិស័យទេសចរណ៍ ហើយមូលនិធិទេសចរណ៍ គួរដាក់មួយអន្លើដើម្បីជួយដល់ទីភ្នាក់ងាររដ្ឋយកទៅប្រើប្រាស់ ដើម្បីជួយគាំទ្រភ្ញៀវទេសចរដែលរងគ្រោះដោយសារ COVID-19»។ លោក រដ្ឋមន្ត្រីថៃ បញ្ជាក់បែបនេះ។
សូមបញ្ជាក់ដែរថា នៅថ្ងៃទី១១ ខែឧសភា អាជ្ញាធរទេសចរណ៍ថៃ (TAT) បានព្យាករថា ចំនួនភ្ញៀវទេសចរបរទេសក្នុងប្រទេសថៃ ប្រហែលធ្លាក់ចុះច្រើនរហូតដល់ ២៥,៨ភាគរយ មកត្រឹម១៤លាននាក់សម្រាប់ឆ្នាំ២០២០។ តួលេខទេសចរណ៍នេះ គឺជាកម្រិតទាបបំផុតក្នុងរយៈពេល១៤ឆ្នាំចុងក្រោយ ដែលរងគ្រោះព្រោះជំងឺCOVID-19។ ដោយឡែក អ្នកទេសចរបរទេសដែលមកកាន់ប្រទេសថៃកាលពីឆ្នាំមុន មាន៣៩,៨លាននាក់៕
Tag:
ថៃ
ក្រសួងទេសចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
