ថ្នាក់លើដាស់តឿន៖ ប៉ូលិសចរាចរណ៍ ដែលអនុវត្តលើសគោលការណ៍ នឹងរងពិន័យ

ជាតិ

សង្គមជាតិ

ថ្នាក់លើដាស់តឿន៖ ប៉ូលិសចរាចរណ៍ ដែលអនុវត្តលើសគោលការណ៍ នឹងរងពិន័យ

12, May 2020 , 9:19 pm

រូបភាព

ដោយ: សារព័ត៌មានថ្មីៗ

នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដឹកនាំប្រជុំជាមួយអង្គភាពពាក់ព័ន្ធនានា នាព្រឹកថ្ងៃទី១១ ខែឧសភា ឆ្នាំ២០២០ ជុំវិញការអនុវត្តអនុក្រឹត្យថ្មីស្តីពីការផាកពិន័យបទល្មើសចរាចរណ៍។ ក្នុងចំណោមបញ្ហានិងប្រធានបទ ដែលលើកឡើងក្នុងអង្គប្រជុំ ក៏មានការលើកឡើងពីនគរបាលចរាចរណ៍ ដែលចុះអនុវត្តផ្ទាល់ផងដែរ។

គេហទំព័ររបស់អគ្គស្នងការដ្ឋាននគរបាលជាតិ បានស្រង់សម្តីរបស់នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិទទួលបន្ទុកផ្នែកចរាចរណ៍ ដែលថ្លែងក្រោយចប់កិច្ចប្រជុំ ទៅចុះផ្សាយថា នគរបាល (ចរាចរណ៍) ដែលអនុវត្តលើសគោលការណ៍ណែនាំ ប្រើប្រាស់សម្តី និងអាកប្បកិរិយាមិនសមរម្យ «នឹងត្រូវបានដាក់វិន័យ ឬទទួលការអប់រំ»។ លោក បន្តថា កងកម្លាំងសមត្ថកិច្ច ត្រូវធ្វើជាគំរូ ដូចជា ពាក់មួកសុវត្ថិភាព ពាក់ខ្សែក្រវ៉ាត់ការពារ ជាដើម ហើយបើប្រព្រឹត្តិខុស នឹងត្រូវអនុវត្តតាមច្បាប់ ដូចប្រជាពលរដ្ឋដែរ។

យ៉ាងណា កិច្ចប្រជុំ បានសរសើរកម្លាំងនគរបាលចរាចរណ៍ថា បានខិតខំអនុវត្តវិធានការ តាមអនុក្រឹតថ្មីស្តីពីការផាកពិន័យបទល្មើសចរាចរណ៍។ នេះបើតាមប្រសាសន៍របស់លោក ហ៊ឹម យ៉ាន ដដែល ដោយលោក បន្ថែមថា ការចូលរួមរបស់ប្រជាពលរដ្ឋក្នុងការគោរពច្បាប់ចរាចរណ៍ មានការកើនឡើង ហើយនគរបាលចរាចរណ៍ ក៏មានការដកពិសោធន៍កាន់តែច្រើន និងមានការយល់ដឹងពីបញ្ហាទាំងឡាយនៅលើផ្លូវ ដែលបង្កឲ្យមានគ្រោះថ្នាក់។

លោក សង្កត់ធ្ងន់ថា៖«អង្គប្រជុំ បានសម្រេចថា ការរឹតបន្តឹងអនុវត្តច្បាប់ ត្រូវតែបង្កើនឲ្យបានខ្លាំងក្លាថែមទៀត រហូតទាល់តែសម្រេចឲ្យបាននូវ [ការកាត់បន្ថយ] គ្រោះថ្នាក់ [ចរាចរណ៍] ជាអតិបរមា ឲ្យមានការគោរពច្បាប់ស្តីពីចរាចរណ៍កាន់តែផុលផុស និង ធានាបាននូវសណ្តាប់ធ្នាប់ សុវត្ថិភាពចរាចរណ៍ទូទាំងប្រទេសផងដែរ»។

គិតត្រឹមរយៈពេល១សប្តាហ៍ដំបូង នៃការចាប់ផ្តើមអនុវត្តអនុក្រឹត្យថ្មី នគរបាលចរាចរណ៍ ឃាត់យន្តយន្ត នគរបាលចរាចរណ៍ បានឃាត់យានយន្តប្រមាណ១,៤ម៉ឺនគ្រឿង ដោយក្នុងនោះ ទោចក្រយានយន្តនិងត្រីចក្រយានយន្ត មានជាង១ម៉ឺនគ្រឿង ហើយរថយន្ត មានជាង៣ពាន់គ្រឿង៕