COVID-19
អន្តរជាតិ
ហ្វីលីពីន ពន្យារពេលបិទប្រទេសដោយផ្នែក ២សប្តាហ៍ថែមទៀត រហូតដល់ដើមខែមិថុនា លោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ។ រូបភាព៖ Reuters
× ហ្វីលីពីន នឹងពន្យារពេលបិទប្រទេសមួយផ្នែករយៈពេល ២សប្តាហ៍បន្ថែមទៀត ដើម្បីទប់ស្កាត់ការរីកសាយភាយ COVID-19 នៅក្នុងប្រទេស។ លោកប្រធានាធិបតីហ្វីលីពី រ៉ូឌ្រីហ្គោ ឌូទើតេ បានបញ្ជាក់បែបនេះ នាព្រឹកថ្ងៃទី១២ ខែឧសភា។
ស្របពេលប្រទេសមួយចំនួន កំពុងតែបន្ធូរបន្ថយការរឹតត្បិតនៅក្នុងប្រទេស ហ្វីលីពីនបែរជាចេញវិធានការបិទប្រទេសរយៈ ពីរសប្តាហ៍បន្ថែមទៀត ពីលើរយៈពេលបិទប្រទេសរយៈពេល ៩សប្តាហ៍កន្លងមក។ តាមរយៈកិច្ចប្រជុំក្រុមឆ្លើយតបCOVID-19 ដែលត្រូវបានចាក់ផ្សាយនៅលើទូរទស្សន៍រដ្ឋ ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បានលើកឡើងពីការពន្យារពេលបិទប្រទេសដោយផ្នែកនេះរយៈពេលពីរសប្តាហ៍បន្ថែមទៀត ដែលក្នុងនោះមានទីក្រុងម៉ានីល និងតំបន់ផ្សេងទៀត។
យ៉ាងណាក៏ដោយ លោកប្រធានាធិបតីមិនបានបញ្ជាក់តំបន់ក្រៅពីទីក្រុងម៉ានីលឲ្យបានច្បាស់លាស់ឡើយ ថាតើនឹងមានតំបន់ណាផ្សេងទៀត ដែលត្រូវបិទ។ សេចក្តីលម្អិតព័ត៌មានជុំវិញ ការពន្យាររយៈពេលបិទប្រទេសនេះ នឹងចេញនៅពេលក្រោយ។ ចំណែកលោក Harry Roque អ្នកនាំពាក្យប្រធានាធិបតីហ្វីលីពីនវិញ បានអះអាងថា រដ្ឋាភិបាល នឹងបិទទីក្រុងម៉ានីល និង ទីក្រុងCebu។
តាមរយៈកិច្ចប្រជុំក្រុមឆ្លើយតបCOVID-19 ដដែលនេះ លោក ឌូទើតេ បានជំរុញឲ្យប្រជាជនហ្វីលីពីនរស់នៅក្នុងតំបន់បន្ធូរបន្ថយការរឹតត្បិត ឲ្យមានការប្រុងប្រយ័ត្នជាងមុន ដើម្បីចៀសវាងការបង្កឲ្យមានរលកឆ្លងទី២ ឬទី៣ នៃកូរ៉ូណាវីរុសនៅលើទឹកដីមួយនេះ ជាពិសេសលោកក៏បានបញ្ជាក់ផងដែរថា ការពាក់ម៉ាស់ គឺជារឿងចាំបាច់។
សូមបញ្ជាក់ថា ហ្វីលីពីន បានបិទតំបន់ តាំងពីថ្ងៃទី១៦ ខែមីនាមកម្លេះ និងត្រូវអស់សុពលភាពនៅថ្ងៃទី១៥ ខែឧសភា។ ដោយបន្ថែមរយៈពេលពីរសប្តាហ៍ទៀត ហ្វីលីពីន អាចនឹងត្រូវបិទតំបន់រហូតដល់ថ្ងៃទី១ ខែមិថុនា។ គិតត្រឹមថ្ងៃទី១១ ខែឧសភា ហ្វីលីពីន មានករណីឆ្លង COVID-19 សរុបចំនួន ១១០៨៦ករណី អ្នកស្លាប់ចំនួន ៧២៦នាក់ និងអ្នកជាសះស្បើយមានចំនួន ១៩៩៩ករណី៕
© រក្សាសិទ្ធិដោយ thmeythmey.com