ជាតិ
យានយន្តជាង៦លានគ្រឿង បានចុះបញ្ជីធ្វើស្លាកលេខយានជំនិះ រថយន្តសម្រុកទៅធ្វើឆៀក (ThmeyThmey)
× ភ្នំពេញ៖ បច្ចុប្បន្នមានយានយន្តជាង៦លានគ្រឿងនៅកម្ពុជា បានចុះបញ្ជីស្លាកលេខយានជំនិះ ដែលក្នុងនោះមានជាង៨០ភាគរយជាម៉ូតូ។ នេះបើតាមការប៉ាន់ប្រមាណ របស់ លោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក។
ក្នុងសន្និសីទសារព័ត៌មាន ស្ដីពីការអនុវត្តរឹតបន្តឹងច្បាប់ចរាចរណ៍ផ្លូវគោ កនៅរសៀលថ្ងៃទី១២ ឧសភានេះ លោក ឈួន វ៉ន់ ថ្លែងថា៖ «យានយន្តដែលបានមកចុះបញ្ជីទាំងអស់ ទាំងម៉ូតូឡាន ប្រមាណចូលជិត៦លានគ្រឿងហើយ។ ហើយក្នុងហ្នឹងមានជាង៨០ភាគ ជាទោចក្រយានយន្តដែលជាម៉ូតូ ហើយឡានប្រហែលជាជិត១លានគ្រឿងហើយ»។
លោក ឈួន វ៉ន់ បានបញ្ជាក់ថា រថយន្តជិត១លានគ្រឿងនេះ មានប្រមាណ៤០ភាគរយប៉ុណ្ណោះដែលបានធ្វើឆៀក ហើយ៦០ភាគរយគឺមិនមានឆៀក។
ជាមួយគ្នានេះដែរ ចាប់តាំងពីការរឹតបន្តឹងការអនុវត្តច្បាប់ចរាចរណ៍ផ្លូវគោក តាំងពីដើមខែឧសភាមក ពលរដ្ឋបានសម្រុកយករថយន្តរបស់ខ្លួនទៅឆៀក ដោយបានកើនឡើង៤ដង នៃចំនួនធម្មតា ដែលទូទៅមានប្រមាណ៨០០គ្រឿង ក្នុងមួយថ្ងៃ។ ការសម្រុកទៅឆៀកនេះ ធ្វើឲ្យក្រុមការងារបន្ថែមម៉ោងធ្វើការ ដើម្បីពន្លឿនការងារឲ្យទាន់ពេលវេលាន។ នេះជាការបញ្ជាក់របស់លោក ឈួន វ៉ន់ ដែលបន្តថា រថយន្តដែលហួសសុពលភាពឆៀក នឹងត្រូវពិន័យមួយថ្ងៃ២០០០រៀល នៅពេលទៅធ្វើឆៀកថ្មី ដោយអនុវត្តចាប់ពីថ្ងៃទី១ កក្កដា ឆ្នាំ២០២០ទៅ៕
© រក្សាសិទ្ធិដោយ thmeythmey.com