ម៉ាឡេស៊ី រាយការណ៍ករណីCOVID-19ទាបបំផុត ចាប់ពីអនុវត្តបញ្ជាបិទប្រទេស

COVID-19

អន្តរជាតិ

ម៉ាឡេស៊ី រាយការណ៍ករណីCOVID-19ទាបបំផុត ចាប់ពីអនុវត្តបញ្ជាបិទប្រទេស

13, May 2020 , 9:52 am

រូបភាព

ទាហានម៉ាឡេស៊ីម្នាក់ពាក់ម៉ាស់ ឈរយាមកកបែររបងលួសក្នុងតំបន់បិទទប់ស្កាត់COVID-19 នៃទីក្រុង Petaling Jaya នៅថ្ងៃទី១០ ខែឧសភា ២០២០ (AP)

ដោយ:

ម៉ាឡេស៊ី បានរាយការណ៍ករណីឆ្លងCOVDI-19ថ្មី ១៦ករណី កាលពីថ្ងៃទី១២ ខែឧសភា ។ នេះជាតួលេខឆ្លងប្រចាំថ្ងៃទាបបំផុត ចាប់តាំងពីបទបញ្ជាគ្រប់គ្រងការចល័ត (MCO) បានចូលជាធរមានកាលពីថ្ងៃទី១៨ ខែមីនា មក។

ក្នុងចំណោមករណីឆ្លងថ្មីទាំង១៦នាក់ ៣ករណីជាករណីនាំចូល ខណៈ១៣ករណីផ្សេងទៀតគឺជាករណីឆ្លងក្នុងស្រុក។ ហើយក្នុងចំណោមឆ្លងក្នុងស្រុកថ្មី ៩នាក់ពុំមែនជាជនជាតិម៉ាឡេស៊ី។ នេះបើតាមការបញ្ជាក់របស់អគ្គនាយកសុខាភិបាលម៉ាឡេស៊ី Hisham Abdullah ។

គ្មានករណីស្លាប់ថ្មី ត្រូវបានរាយការណ៍ឡើយ ខណៈករណីស្លាប់COVID-19សរុបនៅប្រទេសម៉ាឡេស៊ី ឈនៅចំនួន ១០៩នាក់។ តាមទីភ្នាក់ងារព័ត៌មាន Bernama អ្នកជំងឺ១១០នាក់បន្ថែម ត្រូវបានរាយការណ៍ថាជាសះស្បើយ ដែលធ្វើឲ្យករណីអ្នកជាសះស្បើយសរុប ៥២២៣នាក់ ឬ៧៧,៥ភាគរយ។ គិតត្រឹមថ្ងៃទី១២ ខែឧសភា ករណីឆ្លងសរុបនៅម៉ាឡេស៊ី មាន៦៧៤២ករណី។

ទោះបីជាករណីឆ្លងធ្លាក់ចុះ លោកវេជ្ជបណ្ឌិត Hisham បានទទូចឲ្យសាធារណជនកុំធ្វេសប្រហែស។ ដោយលើកឡើងការផ្ទុះករណីឆ្លងជាថ្មីនៅប្រទេសចិននិងកូរ៉េខាងត្បូង លោកប្រាប់ឲ្យពលរដ្ឋត្រូវអនុវត្តកាតព្វកិច្ចពួកគេ ដើម្បីធានាថា និន្នាការដូចគ្នានេះ ពុំកើតឡើងក្នុងប្រទេសម៉ាឡេស៊ី ជាពិសេស នៅពេលរដ្ឋាភិបាលផ្ដើមបន្ធូរបន្ថយចំណាត់ការក្រោមបទបញ្ជាគ្រប់គ្រងការចល័ត (MCO)។

មុនពេលការរឹតបណ្ដឹង COVID-19 អាចត្រូវដកហូតទាំងស្រុង លោកអគ្គនាយក Hisham គូសបញ្ជាក់ថា ម៉ាឡេស៊ីត្រូវយកចិត្តទុកដាក់លើផ្នែកសំខាន់ចំនួន៦ រួមមាន ការគ្រប់គ្រងព្រំដែន សមត្ថភាពប្រព័ន្ធសុខាភិបាល សមត្ថភាពការពារក្រុមប្រឈមហានិភ័យខ្ពស់ ក៏ដូចជាសមត្ថភាពប្រជាជនសម្របខ្លួនជាមួយរបៀបរបបរស់នៅថ្មី។

ខណៈប្រទេសម៉ាឡេស៊ី រាយការណ៍ពីការថមថយករណីឆ្លងCOVID-19 ប្រទេសជិតខាងខ្លួន សិង្ហបុរី បន្តគ្មានសញ្ញាធូរស្រាលករណីឆ្លង។ នៅថ្ងៃទី១២ ខែឧសភា សិង្ហបុរី រាយការណ៍ករណីឆ្លងCOVID-19ថ្មី ៨៨៤ករណីបន្ថែម ដែលធ្វើឲ្យករណីឆ្លងសរុបឡើងដល់ ២៤ ៦៧១។ ករណីឆ្លងថ្មីភាគច្រើនគឺជាពលករបរទេសធ្វើការក្នុងប្រទេសនេះ៕