COVID-19
ជាតិ
COVID-19៖ ពលរដ្ឋជាង១១ម៉ឺននាក់ ទទួលបានឥណទានរៀបចំឡើងវិញ ក្នុងទំហំជិត៥០០លានដុល្លារ រូបពីហ្វេសប៊ុកសមាគមមីក្រូហិរញ្ញវត្ថុនៅកម្ពុជា
× ភ្នំពេញ៖ ស្ថាប័នមីក្រូហិរញ្ញវត្ថុនៅកម្ពុជា បានដោះស្រាយបញ្ហាអតិថិជន ១១៨,១៨២នាក់ ក្នុងចំណោម ១៣៧,១៥៨នាក់ ក្នុងការរៀបចំឥណទានឡើងវិញសម្រាប់ពួកគេ ដែលជួបបញ្ហាសេដ្ឋកិច្ចក្នុងវិបត្តិកូវីដ-១៩។ គិតត្រឹមថ្ងៃទី១០ ឧសភា ទំហំឥណទានរៀបចំឡើងវិញ មានជាង៤៨៨ លានដុល្លា។ នេះបើតាមសេចក្ដីប្រកាស របស់សមាគមមីក្រូហិរញ្ញវត្ថុនៅកម្ពុជា ដែលសារព័ត៌មានថ្មីៗទទួលបាន។
សមាគមមីក្រូហិរញ្ញវត្ថុ បានអះអាងថា គ្រឹះស្ថានមីក្រូហិរញ្ញវត្ថុ អាចរៀបចំឥណទានឡើងវិញជូនអតិថិជនបាន លុះត្រាតែមានការស្នើសុំពីអតិថិជន ដោយយោងតាមកិច្ចសន្យា រវាងគ្រឹះស្ថាននិងអតិថិជន, គោលការណ៍ការពារអតិថិជន ក៏ដូចជាលក្ខខណ្ឌផ្លូវច្បាប់មួយចំនួនទៀត។
សេចក្តីប្រកាសរបស់សមាគមមីក្រូហិរញ្ញវត្ថុ បានបញ្ជាក់ដូច្នេះថា៖«ក្នុងកាលៈទេសៈដ៏លំបាក ដែលបណ្តាលមកពីជំងឺកូវីដ-១៩ សមាគមបាន និងកំពុងធ្វើការយ៉ាងសកម្ម ជាមួយសមាជិក និងដៃគូពាក់ព័ន្ធនានា ជាពិសេសធនាគារជាតិនៃកម្ពុជា ក្នុងការជួយដល់អតិថិជនដែលរងផលប៉ះពាល់នេះ។ សមាគមស្វាគមន៍នូវរាល់កិច្ចសហការនានា ជាមួយភាគីទាំងឡាយណា ដែលមានសុច្ឆន្ទៈពិតប្រាកដ ក្នុងការចូលរួមជួយដោះស្រាយបញ្ហារបស់អតិថិជន នៃគ្រឹះស្ថានមីក្រូហិរញ្ញវត្ថុ»។
សមាគមមីក្រូហិរញ្ញវត្ថុ ក៏អំពាវនាវឱ្យអតិថិជន ដែលរងផលប៉ះពាល់ពិតប្រាកដពីជំងឺកូវីដ-១៩ ទំនាក់ទំនងទៅកាន់គ្រឹះស្ថានដែលខ្លួនបានទទួលប្រាក់កម្ចី ឬតាមរយៈមន្ត្រីឥណទានផ្ទាល់ ដើម្បីទទួលបាននូវដំណោះស្រាយសមស្រប។
«សមាគមមានជំនឿថា មានតែកិច្ចសហការប្រកបដោយសុច្ឆន្ទៈ និងដំណោះស្រាយប្រកបដោយវិជ្ជាជីវៈទេ ទើបអាចជួយដល់អតិថិជនដែលរងផលប៉ះពាល់ពិតប្រាកដ ប្រកបដោយប្រសិទ្ធភាព និងរក្សាបាននូវសុខុមាលភាពវិស័យមីក្រូហិរញ្ញវត្ថុទាំងមូល ដែលបាន និងកំពុងដើរតួនាទីចាំបាច់មិនអាចខ្វះបាន ក្នុងការរក្សាស្ថេរភាពសេដ្ឋកិច្ចជាតិ និងកាត់បន្ថយភាពក្រីក្រ។ ហើយប្រសិនបើមិនមានដំណោះស្រាយសមស្រប តាមលក្ខខណ្ឌបច្ចេកទេសនោះទេ នឹងអាចបង្កឱ្យមានផលប៉ះពាល់ធ្ងន់ធ្ងរ ដល់សេដ្ឋជាតិទាំងមូល»។ នេះជាការលើកឡើងរបស់សមាគមមីក្រូហិរញ្ញវត្ថុ។
គិតត្រឹមត្រីមាសទីមួយ ឆ្នាំ២០២០ គ្រឹះស្ថានមីក្រូហិរញ្ញវត្ថុ នៃសមាជិករបស់សមាគម បានបញ្ចេញប្រាក់កម្ចីដល់ប្រជាជនកម្ពុជា ជាង២,២លាននាក់ ដែលមានទំហំឥណទានសរុប ជាង៣០ទ្រីលានរៀល (៧,៤ប៊ីលានដុល្លា) ខណៈអតិថិជនបញ្ញើសរុបមានជាង២,៨លាននាក់ និងមានប្រាក់បញ្ញើសរុប ជាង១៤ទ្រីលានរៀល (៣,៦ប៊ីលានដុល្លា) ៕
© រក្សាសិទ្ធិដោយ thmeythmey.com