កូរ៉ូណាវីរុសថ្មី ដែលបង្កជាជំងឺ COVID-19 ប្រហែលពុំអាចទៅណាឆ្ងាយនោះឡើយ ហើយប្រជាជននៅជុំវិញពិភពលោក នឹងត្រូវរៀនរស់ជាមួយវា។ អង្គការសុខភាពពិភពលោក (WHO) ព្រមានបែបនេះ នៅថ្ងៃទី១៣ ខែឧសភា ។
ខណៈបណ្ដាប្រទេសខ្លះនៅជុំវិញពិភពលោក ចាប់ផ្ដើមបន្ធូរបន្ថយបទបញ្ជាបិទប្រទេសជាបណ្ដើរៗ ដែលបានដាកចេញ់ក្នុងគោលដៅទប់ស្កាត់ការរីករាលដាលCOVID-19 អង្គការ WHO អះអាងថា ជំងឺរាតត្បាតសកលនេះ ប្រហែលពុំអាចកម្ចាត់ចោលទាំងស្រុងឡើយ។
វីរុសនេះ បានផ្ទុះរាលដាលដំបូងក្នុងទីក្រុង វូហាន ភាគកណ្ដាលនៃប្រទេសចិនកាលពីចុងឆ្នាំ២០១៩ ហើយមកដល់ពេលនេះ បានចម្លងមនុស្សជាង៤,២លាននាក់ និងសម្លាប់ជិត៣០ម៉ឺននាក់នៅទូទាំងពិភពលោក។
«យើងមានវីរុសថ្មី ចូលអុកឡុកប្រជាជនពិភពលោកជាលើកដំបូង ដូច្នេះហើយវាពិតជាពិបាកខ្លាំងក្នុងការព្យាករថាពេលណាដែលយើងនឹងយកឈ្នះលើវា»។ នេះជាការលើកឡើងរបស់លោក Michael Ryan នាយកទទួលបន្ទុកកម្មវិធីអាសន្នរបស់អង្គការសុខភាពពិភពលោក។
ក្នុងសន្និសីទព័ត៌មានតាមវីដេអូអនឡាញពីក្រុងហ្សឺណែវ ប្រទេសស្វីស លោក Ryan បន្តថា វីរុសនេះ ប្រហែលក្លាយជាវីរុសដែលនៅត្រាំត្រែង (endemic) ក្នុងសហគមន៍ ហើយវីរុសនេះ ប្រហែលពុំអាចទៅណាឆ្ងាយឡើយ។ លោកសង្កត់ធ្ងន់ថា វីរុសហ៊ីវ (HIV) ពុំទាន់រលាយបាត់ពីលើភពផែនដីនេះឡើយ តែពិភពលោកត្រូវព្រមទទួលស្គាល់ការពិតមួយនេះ។
ជាងពាក់កណ្ដាលប្រជាជនពិភពលោក ត្រូវដាក់ក្រោមបទបញ្ជាបិទប្រទេស ចាប់តាំងពីវិបត្តិ COVID-19 នេះបានផ្ទុះឡើង។ ក៏ប៉ុន្តែ WHO ព្រមានថា វាគ្មានវិធីសាស្ត្រណាធានាថា ការបន្ធូរបន្ថយការរឹតបន្ដឹង COVID-19 នឹងពុំបង្កជារលកឆ្លងទី២ឡើយ។
ត្រង់ចំណុចនេះ អគ្គនាយក WHO លោក Tedros Adhanom Ghebreyesus អះអាងថា ប្រទេសជាច្រើន នឹងមានបំណងដកហូតចំណាត់ការទប់ស្កាត់ COVID-19 ទាំងនេះ ក៏ប៉ុន្តែអង្គការលោក នៅបន្តប្រាប់ឲ្យពួកគេមានការប្រុងប្រយ័ត្នខ្ពស់។
ទាក់ទិននឹងកង្វល់នេះ លោក Ryan លើកឡើងបន្ថែមថា វានៅសល់ផ្លូវវែងឆ្ងាយណាស់ ដែលពិភពលោកអាចវិលត្រលប់ទៅកាន់សភាពធម្មតាតាមបែបគន្លងថ្មី (New Normal Life) ហើយ បណ្ដាប្រទេសទាំងអស់ នឹងត្រូវឆ្លងកាត់រឿងនេះ។ យ៉ាងណាមិញ លោកនៅតែបង្ហាញក្តីសង្ឃឹមលើការស្វែងរកវ៉ាក់សាំងសម្រាប់ COVID-19 ហើយត្រូវធានាថា គ្រប់គ្នាអាចទទួលបានវា។
សូមបញ្ជាក់ថា ជីវិតធម្មតាថ្មី ក្នុងបរិបទប្រយុទ្ធនឹងជំងឺ COVID-19 សំដៅលើ ការប្រកាន់យកនូវការអនុវត្តអនាម័យដៃស្អាត ពាក់ម៉ាស់(ក្នុងករណីចាំបាច់) ប្រើក្រម៉ា កន្សែង ឬក្រដាសជូតមាត់ ខ្ទប់មាត់ពេលមានក្អកកណ្ដាស់ បន្ដអនុវត្តគម្លាតសុវត្ថិភាពសង្គម និងគម្លាតសុវត្ថិភាពបុគ្គល មិនត្រូវមានការជួបជុំ ឬរៀបចំពិធីណាមួយដែលមានគ្នាកុះករពេក ដូចជាការជួបជុំស៊ីផឹកដែលមានគ្នាច្រើន ឬការជួបជុំតាមបែបសាសនា ជាដើម។