កូវីដ-១៩៖ គ្មានករណីឆ្លងថ្មីប្រមាណ១ខែ ហាងកាហ្វេ ភោជនីយដ្ឋាន រមណីយដ្ឋាន ផ្តើមអ៊ូអរឡើងវិញ

COVID-19

ជាតិ

បទយកការណ៍ / បទសម្ភាសន៍

កូវីដ-១៩៖ គ្មានករណីឆ្លងថ្មីប្រមាណ១ខែ ហាងកាហ្វេ ភោជនីយដ្ឋាន រមណីយដ្ឋាន ផ្តើមអ៊ូអរឡើងវិញ

14, May 2020 , 7:39 pm

រូបភាព

ដោយ:

ភ្នំពេញ៖ បន្ទាប់ពីក្រសួងសុខាភិបាលកម្ពុជា បានប្រកាសជាញឹកញាប់អំពីការរកមិនឃើញករណីឆ្លងថ្មីនៃជំងឺកូវីដ១៩អស់រយៈពេលច្រើនថ្ងៃជាប់ៗគ្នានោះ ប្រជាជនកម្ពុជា ហាក់លែងមានការភ័យខ្លាច ដោយគេសង្កេតឃើញតាមហាងកាហ្វេ ភោជនីយដ្ឋាន អាហារដ្ឋាន និងរមណីយដ្ឋានមួយចំនួន ចាប់ផ្តើមមានមនុស្សអ៊ូអរឡើងវិញ។

ជាបន្តសូមអញ្ជើញស្តាប់បទយកការណ៍ ដែលរៀបចំដោយ លោក រ៉ឹម ភារី ដូចតទៅ៖

ហាងកាហ្វេ ភោជនីយដ្ឋាន អាហារដ្ឋាន និងរមណីយដ្ឋានទាំងនៅភ្នំពេញ និងតាមបណ្តាខេត្ត ដែលបានស្ងប់ស្ងាត់ កាលពីអំឡុងជំងឺកូវីដ-១៩ផ្ទុះឡើងនៅកម្ពុជា បានវិលមករកភាពប្រក្រតីវិញជាបណ្តើរៗ ក្រោយគ្មានករណីឆ្លងថ្មីនៃជំងឺកូវីដ-១៩ ប្រមាណ១ខែមកហើយនោះ។ ប្រជាពលរដ្ឋខ្លះ ក៏នៅពាក់ម៉ាស់ និងមានអាល់កុលលាងដៃជាប់តាមខ្លួន អ្នកខ្លះក៏មិនពាក់ម៉ាស់ហើយក៏មិនបានអនុវត្តវិធានអនាម័យ ឲ្យខ្ជាប់ខ្ជួនដូចមុនដែរ បើទោះក្រសួងសុខាភិបាល បានរម្លឹកពលរដ្ឋជាញឹកញាប់ឲ្យមានការប្រុងប្រយ័ត្នក៏ដោយ។

អ្នកស្រី អៀង ស្រីអូន ម្ចាស់អាហារដ្ឋានមួយកន្លែង ស្ថិតនៅសង្កាត់ទឹកល្អក់២ រាជធានីភ្នំពេញ បានឲ្យដឹងថា ហាងរបស់អ្នកស្រីដែលមានលក់បាយ និងគុយទាវ ចាប់ផ្តើមមានអតិថិជនច្រើនឡើងវិញ ក្រោយពីស្ងប់ស្ងាត់ជាង២ខែមក។

រៀបរាប់ទាំងទឹកមុខញញឹម និងបន្ធូរអារម្មណ៍ ហាក់បង្ហាញពីការធូរចិត្តដែលស្ថានភាពកូវីដ-១៩ធូរស្រាលនោះ ស្ត្រីវ័យ៣០ប្លាយឆ្នាំរូបនេះ បញ្ជាក់យ៉ាងដូច្នេះ៖ «មួយរយៈនេះ ភ្ញៀវប្លែកជាងមុន មានភ្ញៀវច្រើនជាងមុនបន្តិច។ កាលពីកូវីដវាយលុកនោះ វាស្ងាត់ខ្លាំង ដូចថា យើងធ្លាប់បាន១០០ភាគរយ វាសល់តែភ្ញៀវប្រហែល១០ភាគរយ ទៅ២០ភាគរយ។ តែឥឡូវប្រហែលកើនបាន ៤០ ទៅ៥០ភាគរយ វាបានប្រហែលពាក់កណ្តាលវិញហើយ»។

អ្នកខេត្តកំពង់ចាមរូបនេះ បន្តថា គ្រាន់តែស្ងប់ស្ងាត់ពីបីខែ ហាងអ្នកស្រីរងផលប៉ះពាល់មិនខុសពីអាជីវកម្មដទៃទៀតនោះទេ ពោលគឺអ្នកស្រីត្រូវផ្អាកបុគ្គលិក និងត្រូវខ្ចីលុយធនាគារបន្ថែម ដើម្បីបង់ថ្លៃជួលផ្ទះដែលមានតម្លៃខ្ពស់ និងទប់ទល់ការចំណាយផ្សេងៗ។

ក្រៅពីអាហារដ្ឋាន និងភោជនីយដ្ឋាន ហាងកាហ្វេ ដែលជាកន្លែងដ៏ពេញនិយមរបស់យុវជនខ្មែរនៅពេលបច្ចុប្បន្ន ក៏ផ្តើមមានអតិថិជនចូលបណ្តើរៗហើយ។ សម្រាប់ហាងកាហ្វេតូចៗ ហាក់ដូចជាមិនទាន់បានបើកទ្វារច្រើនប៉ុន្មានទេ តែសម្រាប់ហាងកាហ្វេដែលមានឈ្មោះល្បី ពោល គឺមានផាសុកភាព និងអនាម័យល្អនោះ មានមនុស្សចូលពេញៗ។

លោក យឿន ចាន់ណា អតិថិជនម្នាក់ ដែលអង្គុយក្នុងហាងកាហ្វេប្រ៊េនល្បីមួយនៅភ្នំពេញ បានប្រាប់សារព័ត៌មានថ្មីៗថា លោកមិនចង់មកហាងកាហ្វេប៉ុន្មានទេ ដ្បិតលោកក៏ភ័យខ្លាចខ្លះដែរ។ ក៏ប៉ុន្មាន ដោយសារតែការងាររបស់លោកតម្រូវឲ្យប្រើកុំព្យូទ័រ និងត្រូវការ WiFi ព្រមទាំងមានកន្លែងដែលមានផាសុកភាព ទើបលោកសម្រេចចិត្តចេញពីផ្ទះជួល មកអង្គុយធ្វើការងារនៅហាងកាហ្វេ។

មានសម្បុរសណ្តែកបាយ យុវជន យឿន ចាន់ណា បានរៀបរាប់ក្នុងសម្តីមួយៗយ៉ាងដូច្នេះថា៖ «ខ្ញុំជាអ្នកធ្វើការ Freelance ចឹង បើនៅផ្ទះជួលក្តៅ ចង់នៅផ្ទះដែរ ប៉ុន្តែបន្ទប់ជួលយើង វាក្តៅ និងហប់ ពេលធ្វើការវាអត់បានច្រើន។ យើងមកហាងកាហ្វេ អារម្មណ៍យើង វាល្អជាងនៅបន្ទប់។ ខ្ញុំមានទឹកអាកុលនៅជាប់ខ្លួន មានជាប្រចាំជាប់កាតាមយើង។ កាលមួយរយៈមុន ពាក់ម៉ាសដែរ តែមួយរយៈនេះ រៀងស្ងាត់ ក៏មិនសូវពាក់ដែរ»។

ចំណែក លោក កុក ថា ស្ថាបនិកហាងកាហ្វេ F Cafe ដែលស្ថិតក្នុងបុរីមួយនៅម្តុំចម្ការដូង បានអះអាងថា បច្ចុប្បន្ន ហាងកាហ្វេរបស់លោកមានភ្ញៀវកើនឡើង បើធៀបកាលពីពីបីខែមុន។ យ៉ាងណាក៏ដោយ កាហ្វេរបស់លោក មិនមានផលប៉ះពាល់ខ្លាំង ដូចហាងកាហ្វេនៅតាមផ្លូវធំនោះទេ ដ្បិតកាហ្វេរបស់លោក ស្ថិតក្នុងបុរីដែលមានពលរដ្ឋរស់នៅច្រើន ក្នុងអំឡុងពេលផ្ទុះជំងឺកូវីដ-១៩។

លោកពន្យល់យ៉ាងដូច្នេះថា៖«បើយើងធៀបពីមុន ភ្ញៀវធ្លាក់ចុះពី២០ទៅ៣០ភាគរយ។ នេះបើនិយាយពីភ្ញៀវដែលមកអង្គុយក្នុងហាង តែមានកើនឡើងនូវភ្ញៀវ ដែលកម្ម៉ង់នៅតាមផ្ទះវិញ។ ចំណុចទី២ ដោយសារហាងរបស់យើង យើងអនុវត្តន៍គោលការណ៍អនាម័យ យើងមានអាល់កុល បុគ្គលិកពេលបម្រើការងារគាត់ពាក់ម៉ាស់ នៅបន្ទប់ទឹក យើងមានសាប៊ូលាងដៃ អ៊ីចឹង ភ្ញៀវមានទំនុកចិត្ត។ បច្ចុប្បន្នភាព ភ្ញៀវវិលមកស្ថានភាពដើមវិញហើយ នេះសម្រាប់តែ F Cafe តែហាងកាហ្វេផ្សេងទៀត ខ្ញុំមិនមានយោបល់នោះទេ»។

លោកបន្តថា៖ «ប្រភេទអាជីវកម្មរបស់យើង ខុសប្លែកពីអាជីវកម្មលក់ដូរនៅតាមផ្ទះធំៗ ឬទីប្រជុំជន អ្នកលក់ដូរនៅផ្លូវធំៗ គាត់អាចប៉ះពាល់ច្រើន ដោយសារតែពលរដ្ឋធ្វើដំណើរតិច តែសម្រាប់ F Cafe ស្ថិតក្នុងបុរី មានប្រជាពលរដ្ឋរស់នៅក្នុងបុរីច្រើន។ ជាទូទៅ ភ្ញៀវក្នុងបុរីគាត់ចេញពីផ្ទះទៅធ្វើការ តែបើថ្ងៃសៅរ៍អាទិត្យ ឬថ្ងៃបុណ្យទាន ទើបគាត់មានពេលវេលាមកអង្គុយហូបច្រើន ដល់ពេលមានកូវីដទៅ ភ្ញៀវគាត់នៅផ្ទះច្រើន ឬអ្នកខ្លះគេហៅថា Work From Home ឬពេលខ្លះគាត់ក៏ឆ្លៀតមកធ្វើការនៅ F Cafe ដែរ»។

អំឡុងពេលកម្ពុជាមានករណីឆ្លងជំងឺកូវីដ-១៩ច្រើន កាលពីប៉ុន្មានខែមុន រដ្ឋាភិបាលបានសម្រេចបិទសាលារៀនទាំងរដ្ឋ និងឯកជន ព្រមទាំងបិទអាជីវកម្មមួយចំនួន ដូចជា ខារ៉ាអូខេ ក្លិបហាត់ប្រាណ ហាងម៉ាស្សា និងសេវាកម្មផ្សេងទៀត ព្រមទាំងលុបចោលពិធីបុណ្យចូលឆ្នាំខ្មែរ និងពិធីសាសនានានា ដើម្បីទប់ស្កាត់ការជួបជុំគ្នា ដែលងាយបង្កឲ្យមានជំងឺកូវី-១៩ ឆ្លងរីករាលដាល។ ចំណែក សណ្ឋាគារ ផ្ទះសំណាក់ ហាងកាហ្វេ ភោជនីយដ្ឋាន អាហារដ្ឋាន... និងរមណីយដ្ឋាន ក៏ចាប់ផ្តើមមានសភាពស្ងាត់ជ្រងំ ដោយខ្លះបានបិទទ្វារ ខណៈខ្លះទៀតបានបើកទ្វារទទួលអតិថិជនទាំងត្រដាបត្រដួល ព្រោះតែមានភ្ញៀវតិចពេក។ ប៉ុន្តែ បន្ទាប់ពីក្រសួងសុខាភិបាលកម្ពុជា ប្រកាសថាគ្មានករណីឆ្លងថ្មី និងអ្នកជំងឺកូវីដដែលសម្រាកព្យាបាលនៅមន្ទីរពេទ្យបានជាសះស្បើយជាបន្តបន្ទាប់នោះ ពលរដ្ឋកម្ពុជា បានចាប់ផ្តើមធ្វើដំណើរទៅហាងកាហ្វេ ភោជនីយដ្ឋាន អាហារដ្ឋាន និងរមណីយដ្ឋាននានាឡើយវិញ។

លោក សឹម ហ៊ីម ប្រធានសហគមន៍នេសាទត្រពាំងសង្កែ ដែលបានបិទទ្វារលែងទទួលភ្ញៀវទេសចរតាំងពីខែមីនាមក បច្ចុប្បន្ន សហគមន៍បានបើកដំណើរការឡើងវិញ ក្រោយពីមានភ្ញៀវជាច្រើន សម្រុកទៅកម្សាន្តនៅខេត្តកំពត។ បើតាមប្រធានសហគមន៍រូបនេះ បច្ចុប្បន្ន នៅពេលចុងសប្តាហ៍ម្តងៗ មានភ្ញៀវជាច្រើន ដែលបានមកជិះទូកកម្សាន្តដើម្បីទស្សនាព្រៃកោងកាង ប៉ុន្តែ លោកមិនបើកឲ្យមានការស្នាក់នៅនោះទេ។

លោកបានពន្យល់យ៉ាងដូច្នេះថា៖ «ខ្ញុំបើកតែសេវាជិះទូកទេ តែសម្រាប់បន្ទប់ខ្ញុំអត់ទាន់បើកទេ ខ្ញុំបើកពេលដាច់ខែនេះ។ សម្រាប់សៅរ៍អាទិត្យ ភ្ញៀវមានប្រហែល៤០០នាក់ តែថ្ងៃធម្មតាអត់សូវមានភ្ញៀវទេ បើមានមានតែប្រហែល៣០នាក់នោះទេ ដែលមកទីនេះ។ ភ្ញៀវមកច្រើនទើបតែ៣សប្តាហ៍ចុងក្រោយនេះ។ ពួកគាត់ ដូចអត់មានការបារម្ភនោះទេ តែពួកគាត់មានការប្រុងប្រយ័ត្នដដែល ព្រោះអ្នកខ្លះគាត់ពាក់ម៉ាស់ ហើយយើងមានអាកុលឲ្យគាត់លាងដៃ មុនឡើងជិះទូក។ ធម្មតា ភ្ញៀវដែលទៅលេងអង្គុយនៅតូប គាត់អង្គុយតែមួយក្រុមគាត់ គាត់មិនចង់ឲ្យអ្នកផ្សេងទៅអង្គុយជិតគាត់នោះទេ»។

លោក សឹម ហ៊ីម ស្នើឲ្យអ្នកទេសចរ អញ្ជើញមកលេងនៅសហគមន៍ត្រពាំងសង្កែ ដើម្បីផ្តល់ចំណូលដល់សហគមន៍ និងលើកកម្ពស់កិច្ចការពារបរិស្ថាននៅក្នុងសហគមន៍ ប៉ុន្តែលោកក៏សំណូមពរឲ្យអ្នកទេសចរ មានការប្រុងប្រយ័ត្នទាំងអស់គ្នា ដើម្បីកុំមានឆ្លងរីករាលដាលនូវជំងឺដ៏សាហាវនេះ៕