មនុស្សទាំងអស់ដែលចូលទៅកាន់ប្រទេសឡាវ នឹងត្រូវឆ្លងកាត់ការត្រួតពិនិត្យសុខភាព និងធ្វើតេស្តរកមើល COVID-19 ហើយត្រូវដាក់ឲ្យធ្វើចត្តាឡីស័ក១៤ថ្ងៃ។ ក្រសួងការបរទេសឡាវ ប្រកាសបែបនេះក្នុងសេចក្ដីថ្លែងការណ៍មួយ ខណៈដែលឡាវគ្មានករណីឆ្លងថ្មីច្រើនសប្ដាហ៍មកហើយ។
អ្នកដំណើរទាំងអស់ នឹងត្រូវធ្វើចត្តាឡីស័កក្នុងសណ្ឋាគារ ឬមណ្ឌលដែលរៀបចំឡើងដោយអាជ្ញាធរ។ ក្រសួងការបរទេសឡាវ បញ្ជាក់នេះក្នុងសេចក្តីថ្លែងការណ៍ នៅថ្ងៃទី៧ខែឧសភា ដែលទើបចុះផ្សាយដោយសារព័ត៌មាន Vientiane Times នៅថ្ងៃទី១១ ខែឧសភា។ អ្នកដែលធ្វើចត្តាឡីស័កនៅសណ្ឋាគារ នឹងទទួលខុសត្រូវលើការចំណាយដោយខ្លួនឯង ដូចជា ថ្លៃបន្ទប់ ចំណីអាហារ និងសេវាកម្មដទៃទៀត ជាដើម។
ក្រោយធ្វើចត្តាឡីស័ក១៤ថ្ងៃរួចរាល់ មនុស្សដែលគ្មានរោគសញ្ញា នឹងត្រូវអាជ្ញាធរសុខាភិបាលផ្ដល់ជូនលិខិតបញ្ញាក់សុខភាព ហើយនេះនឹងអនុញ្ញាតឲ្យពួកគេទៅផ្ទះ និងធ្វើការ។ ចំណែក អ្នកដែលចូលទៅកាន់ប្រទេសឡាវ ដោយមានរោគសញ្ញាផ្ដាសាយ ឬស្រដៀង COVID-19 នឹងត្រូវដឹកបញ្ជូននិងដាក់នៅដាច់ដោយឡែកនៅមន្ទីរពេទ្យ ហើយយកសំណាកទៅធ្វើតេស្តរកCOVID-19 ។
ដើម្បីចូលក្នុងប្រទេសឡាវ អ្នកដំណើរ ត្រូវការដាក់ស្នើពាក្យសុំ ដោយបង្ហាញពីព័ត៌មានលម្អិតជុំវិញកាលបរិច្ឆេទ ច្រកចូល និងមធ្យោបាយដែលពួកគេធ្វើដំណើរ។ ទន្ទឹមនេះ អ្នកដំណើរ ក៏តម្រូវឲ្យបញ្ជាក់ប្រទេសដែលពួកគេនឹងដូរជើងហោះហើរតាមផ្លូវពួកគេ និងប្រាប់ពីគោលបំណងនៃការចូលប្រទេសឡាវផងដែរ។
ការជូនដំណឹងចុងក្រោយនេះ ធ្វើឡើងខណៈរដ្ឋាភិបាលឡាវ ផ្ដើមបន្ធូរបន្ថយចំណាត់ការបិទប្រទេសដែលដាក់ចេញកាលពីថ្ងៃទី១ ខែមេសា ដែលអនុញ្ញាតឲ្យមនុស្សឆ្លងកាត់ព្រំដែនសម្រាប់តែសកម្មភាពដែលចាំបាច់មានការដឹកជញ្ជូនទំនិញជាដើម។
ពាក្យសុំសម្រាប់ចូលប្រទេសឡាវ ក្រោមសេចក្តីប្រកាសថ្មីនេះ ត្រូវតែបញ្ជូនទៅកាន់គណៈកម្មាធិការប្រយុទ្ធប្រឆាំង COVID-19 របស់ក្រសួងការបរទេសឡាវ តាមរយៈភ្នាក់ងារពាក់ព័ន្ធ។ ក្រោយទទួលបានការអនុញ្ញាតសម្រាប់ចូលប្រទេស បុគ្គលរូបនោះដែលពុំទាន់មានទិដ្ឋាការ ត្រូវដាក់ពាក្យសុំវាពីស្ថានទូតឡាវ ឬស្ថានកុងស៊ុលក្នុងប្រទេសដែលខ្លួនបានដាក់ពាក្យសុំចូលប្រទេសខាងលើ។ ចំណែកអ្នកដែលមានទិដ្ឋាការមានសុពលភាព អាចប្រើទិដ្ឋាការនោះតែម្ដង។
ដើម្បីចូលប្រទេសឡាវ អ្នកដាក់ពាក្យសុំចូល ត្រូវមានការបញ្ជាក់ថាពិតជាគ្មានជំងឺ COVID-19 ហើយលិខិតបញ្ជាក់ការធ្វើតេស្ត ត្រូវចេញដោយអាជ្ញាធរសុខាភិបាល ដោយពុំឲ្យយូរជាង៧២ម៉ោងឡើយ។ ដោយឡែក ពលរដ្ឋឡាវដែលនៅក្រៅប្រទេស ហើយចង់ត្រលប់ទៅកាន់ប្រទេសកំណើតវិញ ត្រូវការចុះឈ្មោះជាមួយស្ថានទូតឡាវ ឬស្ថានកុងស៊ុលក្នុងប្រទេសពួកគេកំពុងរស់នៅ។
លើសពីនេះ ជនបរទេសដែលមានស្ថានទូតប្រទេសពួកគេក្នុងវៀងចន្ទន៍ និងចង់ចាកចេញពីប្រទេសឡាវ ត្រូវការចុះឈ្មោះ និងប្រាប់ពីគោលបំណងធ្វើដំណើរពួកគេជាមួយស្ថានទូតពួកគេផងដែរ។ ត្រង់ចំណុចនេះ ស្ថានទូតទាំងនោះ តម្រូវឲ្យដាក់លិខិតសំណើទៅកាន់ក្រសួងការបរទេសឡាវ ជាមួយឈ្មោះអ្នកដាក់ពាក្យ លេខលិខិតឆ្លងដែន ពេលវេលាធ្វើដំណើរជាក់លាក់ ច្រកចេញ និងមធ្យោបាយដែលប្រើប្រាស់។ ជនជាតិឡាវដែលចង់ធ្វើដំណើរទៅបរទេសសម្រាប់ហេតុផលចាំបាច់ អាចធ្វើទៅបាន ប្រសិនបើទទួលការអនុញ្ញាតពីអាជ្ញាធរក្នុងប្រទេសដែលពួកគេចង់ទៅ។
សូមបញ្ជាក់ថា គិតត្រឹមថ្ងៃទី១៣ ខែឧសភា ប្រទេសឡាវ រាយការណ៍ករណីឆ្លង COVID-19 ថ្មីជាប់ៗគ្នាសម្រាប់ពេល៣១ថ្ងៃមកហើយ។ ករណីឆ្លង COVID-19 សរុបក្នុងប្រទេសនេះ មានត្រឹម១៩ករណី ហើយជាសះស្បើយមាន ១៤នាក់។ គ្មានករណីស្លាប់ដោយសារ COVID-1៩ កើតឡើងក្នុងប្រទេសនេះឡើយ។ ប្រទេសឡាវ បានរាយការណ៍ករណីឆ្លង COVID-19 ២ករណីដំបូង កាលពីថ្ងៃទី២៤ ខែមីនា៕