FA និង FIFA ត្រូវប៉ះគ្នានៅតុលាការ ជុំវិញការដាក់ទណ្ឌកម្ម Chelsea លើការទិញដូរកីឡាករ

កីឡាអន្តរជាតិ

អន្តរជាតិ

FA និង FIFA ត្រូវប៉ះគ្នានៅតុលាការ ជុំវិញការដាក់ទណ្ឌកម្ម Chelsea លើការទិញដូរកីឡាករ

14, May 2020 , 9:59 pm

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អង់គ្លេស (FA) នឹងប្រឈមមុខជាមួយសហព័ន្ធកីឡាបាល់ទាត់អន្តរជាតិ (FIFA) នៅតុលាការអាជ្ញាកណ្ដាលកីឡានៅខែក្រោយពាក់ព័ន្ធការសម្រេចចិត្តហាមការផ្ទេរកីឡាកររបស់ Chelsea។

Chelsea ត្រូវបានដាក់ទណ្ឌកម្មមិនឲ្យមានការទិញដូរកីឡាករថ្មីចូលកាលពីខែកុម្ភៈ ឆ្នាំ២០១៩ ពីបទរំលោភលើច្បាប់ទាក់ទងនឹងការផ្ទេរកីឡាករអន្តរជាតិ និងការទិញចូលកីឡាករក្រោមអាយុ១៨ឆ្នាំលើសកំណត់។

ដំបូងឡើយ FIFA បានសម្រេចហាមក្លិបរហស្សនាមតោខៀវមិនឲ្យទិញកីឡាករថ្មីចូលនៅអំឡុងពេលទីផ្សារដោះដូរកីឡាករបើកទ្វារចំនួនពីរលើកក្នុងរដូវកាល ២០១៩-២០។ ក្រោយមកក៏ត្រូវបានបន្ធូបន្ថយការហាមប្រាមពាក់កណ្តាលមកវិញក្រោយក្លិបChelsea ប្តឹងឧទ្ធរណ៍។

Chelsea ត្រូវ FIFA ពិន័យជាប្រាក់ចំនួន ៦០០០០០ ហ្វ្រង់ស្វីស (៦០ម៉ឺនដុល្លារអាមេរិក) ខណៈ FA ក៏ទទួលការពិន័យពីស្ថាប័នគ្រប់គ្រងកីឡាបាល់ទាត់ពិភពលោកមួយនេះចំនួន ៥១០០០០ ហ្វ្រង់ស្វីស (ជាង៥០ម៉ឺនដុល្លារ) ផងដែរលើដំណើរការចុះឈ្មោះកីឡាករខាងលើ។ យ៉ាងណាក៏ដោយ FA មិនសុខចិត្តនឹងការពិន័យនេះទេហើយបានប្តឹងឧទ្ធរណ៍ប្រឆាំងនឹង FIFA វិញ ហើយបានដាក់ពាក្យប្ដឹងជំទាស់ទៅតុលាការអាជ្ញាកណ្តាលកីឡា (CAS) រួចហើយ។ សវនាការគ្រោងនឹងធ្វើឡើងនៅថ្ងៃទី២៦ ខែមិថុនា។

នៅថ្ងៃទី១៣ ខែឧសភា អ្នកនាំពាក្យរបស់ FA បាននិយាយថា៖« FA បានសហការយ៉ាងពេញទំហឹងជាមួយនឹងការស៊ើបអង្កេតរបស់ FIFA ពីព្រោះនេះជាដំណើរការស្របច្បាប់ដែលកំពុងបន្ត ហើយយើងនឹងមិនធ្វើអត្ថាធិប្បាយបន្ថែមទៀតនោះទេជុំវិញករណីនេះ»៕