ជាតិ
បទយកការណ៍ / បទសម្ភាសន៍
សេដ្ឋកិច្ច
រូបភាពផ្តល់ដោយលោក ងួន ឡាយ ប្រធានសមាគមលើកកម្ពស់ម្រេចកំពត
×![]()
ភ្នំពេញ៖ ម្រេចកំពតដែលចាប់ផ្តើមប្រមូលផលចាប់តាំងពីដើមឆ្នាំ២០២០មក នៅតែលក់មិនចេញ ព្រោះតែទីផ្សារសំខាន់ជាងនៅអាមេរិក និងប្រទេសមួយចំនួននៅអឺរ៉ុប កំពុងមានវិបត្តិជំងឺកូវីដ-១៩។ លោក ងួន ឡាយ ប្រធានសមាគមលើកកម្ពស់ម្រេចកំពត បានផ្តល់បទសម្ភាសដល់ដល់សារព័ត៌មានថ្មីៗថា បច្ចុប្បន្ននេះ បញ្ហាគ្មានទីផ្សារនេះ មានធ្វើឲ្យម្រេចកំពតជាច្រើនតោន ត្រូវស្តុកនៅតាមផ្ទះកសិករ ដើម្បីរង់ចាំលក់ចេញនៅពេលជំងឺកូវីដ-១៩មានការធូរស្បើយ។
ជាបន្តសូមអញ្ជើញស្តាប់បទសម្ភាសរវាងលោក រ៉ឹម ភារី អ្នកយកព័ត៌មានរបស់គេហទំព័រថ្មីៗ ជាមួយ លោក ងួន ឡាយ ដូចតទៅ៖
ក្រោយជំងឺកូវីដ-១៩ នៅតែបន្តយាយីប្រទេសជុំវិញពិភពលោក និងប្រទេសកម្ពុជា ម្រេចនៅខេត្តកំពត ដែលបានប្រមូលផលចាប់តាំងពីដើមឆ្នាំ២០២០ រហូតមកដល់បច្ចុប្បន្ន មិនទាន់បាននាំចេញទៅទីផ្សារអន្តរជាតិនៅឡើយ។ នេះបើតាមការបញ្ជាក់របស់លោក ងួន ឡាយ ប្រធានសមាគមលើកកម្ពស់ម្រេចកំពត។
លោកបញ្ជាក់យ៉ាងដូច្នេះថា៖ «យើងអត់មានទីផ្សារទេសម្រាប់ឆ្នាំ២០២០នេះ។ យើងប្រមូលផលបាន៩០ភាគរយហើយ ហើយទីផ្សារអត់ទាន់មានទេ។ យើងកំពុងរង់ចាំមើលថា ស្ថានភាពកូវីដ១៩ វាស្ងប់ស្ងាត់ទៅវិញ ក្រែងមានអ្នកកម្ម៉ង់ទិញ ព្រោះទីផ្សារម្រេចកំពតយើង យើងសំដៅទៅសហគមអឺរ៉ុប និងអាមេរិក និងអ្នកទេសចរក្នុងស្រុក។ ឥឡូវទីផ្សារទេសចរក្នុងស្រុក ក៏យើងអត់មានទេសចរទៀត ទៅក្រៅក៏នាំចេញទៅអត់បាន ដោយសារតែយើងពិបាកទំនាក់ទំនង។ យើងនៅស្ទះក្នុងរយៈពេលប៉ុន្មានខែមកហើយ យើងលក់អត់បានទេ»។
លោក ងួន ឡាយ បន្ថែមថា ផ្ទៃដីដាំម្រេចកំពតដែលជាសមាជិករបស់សមាគម មានចំនួន២៨០ហិចតា និងសមាជិកអ្នកផលិតចំនួន៤៥៧គ្រួសារ និងសមាជិកជាក្រុមហ៊ុនផលិត លក់ និងវេចខ្ចប់ចំនួន៣៧ក្រុមហ៊ុន។ លោកបន្តថា ម្រេចកំពតបាននាំចេញប្រមាណ៧០តោននៅក្នុងមួយឆ្នាំៗ ដែលមានទីផ្សារសំខាន់ជាងគេនៅអឺរ៉ុប និងអាមេរិក ក្រៅពីនោះ គឺនាំចេញទៅប្រទេសជប៉ុន និងហុងកុងជាដើម។
លោកបរិយាយយ៉ាងដូច្នេះ៖ «ទីផ្សារម្រេចកំពត យើងនាំចេញតែ៧០ភាគរយទេ នៅ៣០ភាគរយ យើងចរាចរទីផ្សារទេសចរក្នុងស្រុកនៅតាមតំបន់ទេសចរដូចជា ភ្នំពេញ កំពត កំពង់សោម កែប សៀមរាប។ កាលមុន គេលក់បានណាស់ មួយថ្ងៃៗទេសចរចូល៥០០ទៅ៦០០នាក់ តែឥឡូវអត់មានទេ។ មួយថ្ងៃបានតែពីរនាក់អីទេ»។
ម្រេចកំពតត្រូវបានចុះបញ្ជីផលិតផលសម្គាល់ភូមិសាស្ត្រ (GI) កាលពីឆ្នាំ២០១៦ ហើយ តំបន់ដែលអាចផលិតម្រេចកំពតបានលុះត្រាស្ថិតក្នុងស្រុកឬក្រុងមួយចំនួននៃខេត្តកំពត និងខេត្តកែប។ តំបន់ទាំងនោះ រួមមាន៖ ស្រុកកំពង់ត្រាច ស្រុកដងទង់ ស្រុកទឹកឈូ ស្រុកឈូក និងក្រុងកំពតនៃខេត្តកំពត ព្រមទាំងស្រុកដំណាក់ចង្អើរ និងក្រុងកែបខេត្តកែប។ ក្រោយចុះបញ្ជីក្នុងផលិតផលសម្គាល់ភូមិសាស្ត្រ ម្រេចកំពតដែលគេចាត់ទុកថាមានគុណភាពខ្ពស់ និងរសជាតិឆ្ងាញ់ ចាប់ផ្តើមមានតម្លៃខ្ពស់ជាងម្រេចធម្មតា។
លោក ងួន ឡាយ បានអះអាងថា ការបាត់បង់ទីផ្សារម្រេចនេះ បានឲ្យធ្វើកសិករ និងកម្មករ ដែលធ្លាប់ទទួលបានផល ពីចម្ការម្រេចនៅខេត្តកំពត កំពុងជួបប្រទះការលំបាកជាច្រើន។
លោកសង្កត់ធ្ងន់យ៉ាងដូច្នេះថា៖ «មកដល់ថ្ងៃនេះ ជំនាន់កូវីដនេះ ធ្លាប់ប្រើកម្មករ៣០ទៅ៤០នាក់ យើងទុកតែពីរបីនាក់ ដោយសារយើងអត់លុយបើកឲ្យកម្មករ។ យើងឃើញហើយក្រុមហ៊ុន កន្លែងទេសចរណ៍ អ្នកលក់ដូរនៅកន្លែងទេសចរ គាត់ដកកម្មករអស់ហើយ។ ហើយអ្នកធ្វើចម្ការម្រេចផ្ទាល់សុទ្ធតែដកកម្មករ។ ដូចខ្ញុំអ៊ីចឹង ធ្លាប់ប្រើមនុស្សច្រើន តែឥឡូវទុកតែ៤នាក់។ ហើយគ្រប់កន្លែង គឺអ៊ីចឹង។ អ្នកផលិតដែលប្រើកម្លាំងក្រុមគ្រួសារមិនអីទេ តែបើអ្នកប្រើកម្មករ គឺដកអស់ហើយ។ ចម្ការខ្លះអត់ប្រមូលផលផង»៕
Tag:
ម្រេចកំពត
ងួន ឡាយ
គ្មានទីផ្សារ
© រក្សាសិទ្ធិដោយ thmeythmey.com
