COVID-19
អន្តរជាតិ
រដ្ឋាភិបាលបាលឡាវ ជួយរកការងារឲ្យពលកររបស់ខ្លួនដែលត្រលប់មកពីថៃ ដោយសារ Covid-19
× រដ្ឋាភិបាលឡាវ បានប្រកាសផ្តល់ និងជួយរកការងារឲ្យពលរដ្ឋរបស់ខ្លួន ដែលជាពលករទើបតែត្រលប់ពីប្រទេសថៃ ក្នុងអំឡុងនៃការផ្ទុះរីករាលដាលនៃវីរុស Covid-19។ សេចក្តីប្រកាសនេះ ធ្វើឡើងបន្ទាប់ប្រមុខ រដ្ឋាភិបាល ក៏បានបន្ធូរបន្ថយ និងដកវិធានការទប់ស្កាត់ និងការពារវីរុស Covid-19 មួយចំនួននៅក្នុងប្រទេសផងដែរ។
តាមរយៈក្រសួងការងារ និងសុខមាលភាពសង្គមរបស់ខ្លួន រដ្ឋាភិបាលឡាវបានស្នើឲ្យអង្គភាពជំនាញរបស់ខ្លួនដែលមានមូលដ្ឋានតាមខេត្តប្រមូលទិន្នន័យពីអាជ្ញាធរតាមភូមិអំពីចំនួនប្រជាជនដែលទើបតែត្រលប់ចូលប្រទេស ជាពិសេសពលរដ្ឋដែលជាពលករមកពីប្រទេសថៃ ក្រោយពីការផ្ទុះនៃវីរុស Covid-19។ នេះបើយោងតាមការចុះផ្សាយរបស់សារព័ត៌មាន Vientiane Times ។
តាមប្រភពព័ត៌មានដដែល ទិន្នន័យដែលត្រូវប្រមូលនោះ នឹងទាមទារការបញ្ជាក់ថាតើមានចំនួនប្រជាជនប៉ុន្មានភាគរយ ដែលត្រូវការជំនួយ និងកំពុងអត់ការងារធ្វើ។ ហើយរដ្ឋាភិបាលរំពឹងថា វិធានការនេះ នឹងអាចជួយដល់ពលករដែលបានត្រលប់មកប្រទេសវិញ ទទួលបានការងារថ្មី នៅអាជីវកម្មក្នុងប្រទេស និងអាចទទួលបានវគ្គបណ្តុះបណ្តាលសមរម្យ មុនពេលចូលបម្រើការនេះផងដែរ។
តាមរបាយការណ៍ប៉ាន់ស្មានបឋមរបស់គណៈកម្មាការជាតិទប់ស្កាត់ និងគ្រប់គ្រង Covid-19 មានពលរដ្ឋឡាវ ដែលត្រលប់មកពីថៃ ប្រមាណជិត ៨ ម៉ឺននាក់ ក្នុងនោះមានពលករដែលជាពលរដ្ឋរស់នៅក្នុងរដ្ឋធានីវៀងចន្ទន៍ ប្រមាណ ២ពីរនាក់ ផងដែរ។
ជាមួយនឹងការប្រមូលព័ត៌មានពាក់ព័ន្ធនឹងប្រជាជនដែលអត់ការងារធ្វើនេះ រដ្ឋាភិបាលឡាវក្នុងពេលតែមួយ ក៏កំពុងតែប្រមូលទិន្ន័យទូទាំងប្រទេសស្តីពីតម្រូវការការងារ ដើម្បីជាមធ្យោបាយមួយសម្រាប់ផ្តល់លទ្ធភាពឲ្យរដ្ឋាភិបាល អាចកំណត់ឱកាសការងារ និងទីកន្លែងច្បាស់លាស់សម្រាប់ប្រជាពលរដ្ឋ ដែលចង់ធ្វើការនៅក្នុងប្រទេស។ នេះ ក៏រាប់បញ្ចូលពីការសិក្សាលទ្ធភាពឱកាសការងារក្រៅប្រទេសផងដែរ នៅពេលដែស្ថានភាពទូទៅមានភាពល្អប្រសើរ៕
© រក្សាសិទ្ធិដោយ thmeythmey.com