ជាតិ
កសិករ សាំង អ៊ីម រកចំណូលបាន ៣០ម៉ឺនដុល្លារ ក្នុង១ឆ្នាំ ពីរបរចិញ្ចឹមត្រី
×![]()
ភ្នំពេញ៖ លោក សាំង អ៊ីម ជាកសិករចិញ្ចឹមត្រីពោ ត្រីប្រា និងត្រីឆ្ដោ នៅក្នុងភូមិតាងិល ឃុំជាលា ស្រុកបាធាយ ខេត្តកំពង់ចាម។ ក្នុង១ឆ្នាំ កសិកររូបនេះ អាចប្រមូលផលត្រីបានជាង ២០០តោន និងរកចំណូលបានប្រមាណ ៣០ម៉ឺនដុល្លារ។
មានវ័យ៤៨ឆ្នាំ លោក សាំង អ៊ីម និងក្រុមគ្រួសារ បានប្រកបរបរត្រីជាង ២០ឆ្នាំហើយ ដោយផ្ដើមចិញ្ចឹមត្រីត្រឹម១ស្រះប៉ុណ្ណោះ។ បច្ចុប្បន្ន កសិករ សាំង អ៊ីម មានស្រះចិញ្ចឹមត្រីចំនួន៨ ហើយត្រី ដែលោក ចិញ្ចឹម គឺត្រីពោ ត្រីប្រា និង ត្រីឆ្ដោ។ ក្នុងបទសម្ភាសជាមួយថ្មីៗ២៥រាជធានី-ខេត្ត តាមទូរសព្ទ កសិកររូបនេះ ប្រាប់ឲ្យដឹងថា៖«ចំណូលសរុបទាំងដើមទាំងទុន គឺបានប្រមាណ៣០ម៉ឺនដុល្លារក្នុង១ឆ្នាំ។ បើគិតពីត្រីឆ្ដោវិញ ក្នុង១ស្រះ អាចលក់បាន ១០ម៉ឺនដុល្លារដែរ»។
ទោះបីបានប្រាក់ចំណូលច្រើន ប៉ុន្តែលោក សាំង អ៊ីម នៅតែជួបបញ្ហាប្រឈមត្រីងាប់ ដោយសារអាកាសធាតុត្រជាក់ និងពេលមានព្យុះជាដើម។ ជាមួយគ្នានេះ ការចាប់ផ្ដើមមុខរបរចិញ្ចឹមត្រីនេះ មុនដំបូងមានផលលំបាក ដោយសារការខ្វះខាតទុន និងទីធ្លាសម្រាប់ចិញ្ចឹមជាដើម។ លោក និយាយថា៖«ដំបូងប្រើដើមទុនតិចតួច ប៉ុន្តែដោយសារការខំប្រឹងបន្តិចម្ដងៗ ក៏អាចពង្រីកការចិញ្ចឹមត្រី ដល់៨ស្រះនេះ [ដែលមានផ្ទៃដីសរុប៦ហិកតា]»។
ត្រីរបស់លោក សាំង អ៊ីម ត្រូវបានផ្គត់ផ្គង់នៅទីផ្សាររាជធានីភ្នំពេញ និងតាមខេត្តមួយចំនួន។ នៅថ្ងៃអនាគត លោក មានគម្រោងពង្រីកការចិញ្ចឹមត្រីបន្ថែមទៀត សម្រាប់ផ្គត់ផ្គង់នៅគ្រប់ខេត្តក្រុង៕
Tag:
កសិកម្ម
ចិញ្ចឹមត្រី
កំពង់ចាម
© រក្សាសិទ្ធិដោយ thmeythmey.com
