អង្គការសិល្បៈខ្មែរអមតៈ បង្កើតកម្មវិធី៣ គាំទ្រវិស័យសិល្បៈវប្បធម៌នៅកម្ពុជា

ជាតិ

អង្គការសិល្បៈខ្មែរអមតៈ បង្កើតកម្មវិធី៣ គាំទ្រវិស័យសិល្បៈវប្បធម៌នៅកម្ពុជា

18, May 2020 , 7:59 am

រូបភាព

ដោយ: ប៉ូ សាគុន

ភ្នំពេញ៖ ដើម្បីរួមចំណែក ក្នុងការគាំទ្រវិស័យសិល្បៈវប្បធម៌នៅកម្ពុជា ក៏ដូចជាការបង្កើតឱកាសនានាសម្រាប់សិល្បករ សិស្សសិល្បៈ និងអ្នកដែលធ្វើការ ឬមានចំណាប់អារម្មណ៍ក្នុងវិស័យ អង្គការសិល្បៈខ្មែរអមតៈ បានបង្កើតកម្មវិធីសិល្បៈចំនួន៣ ដែលផ្ដោតជាពិសេសលើការអភិវឌ្ឍចំណេះដឹង និង ការបង្ហាញអំពីទេពកោសល្យ។

កម្មវិធីទាំង៣នោះ រួមមាន កម្មវិធីអាហារូបករណ៍វគ្គបណ្ដុះបណ្ដាលអំពី «ការសរសេរវិភាគពីសិល្បៈ» កម្មវិធីអាហារូបករណ៍សិល្បៈអមតៈ អាន ចន-ផន ឆ្នាំ ២០២១ និង កម្មវិធីជ្រើសរើសអត្ថបទនិពន្ធថ្មី សម្រាប់ល្ខោន។

កម្មវិធីអាហារូបករណ៍វគ្គបណ្ដុះបណ្ដាលអំពី «ការសរសេរវិភាគពីសិល្បៈ» រៀបចំឡើងជាពិសេស និងដំបូងគេ សម្រាប់បណ្ដុះបណ្ដាលធនធានផ្នែកសរសេរវិភាគសិល្បៈ ដែលជាជំនាញមានអ្នកចេះតិចតួចនៅឡើយ និងជាកម្លាំងចលករដ៏សំខាន់ក្នុងការជំរុញ និងផ្សព្វផ្សាយអំពីវិស័យសិល្បៈ និងស្នាដៃ។

វគ្គនេះ ធ្វើឡើងពីថ្ងៃទី២៥-២៦ ខែមិថុនា ឆ្នាំ២០២០ នៅភ្នំពេញ សម្រាប់អ្នកចូលរួម ១២នាក់ ហើយអ្នកសម្របសម្រួល គឺលោក យាន រស្មី ដែលមានបទពិសោធន៍យូរឆ្នាំក្នុងការសរសេរវិភាគពីសិល្បៈ។ សិស្សអាហារូបករណ៍ នឹងទទួលបានគន្លឹះនានាក្នុងការសរសេរ ការចែករំលែកបទពិសោធន៍ពីអ្នកសម្របសម្រួល និងវាគ្មិន ព្រមទាំងឱកាសចេញផ្សាយអត្ថបទផងដែរ។

បេក្ខជនដាក់ពាក្យ អាចជា សិស្ស-និស្សិត អ្នកនិពន្ធ អ្នកសារព័ត៌មាន និងសិល្បករ ធ្លាប់ ឬមិនធ្លាប់មានបទពិសោធន៍សរសេរ ប៉ុន្តែមានចំណាប់អារម្មណ៍លើការគិតបែបស៊ីជម្រៅ។ ឈប់ទទួលពាក្យ ត្រឹមថ្ងៃទី២៥ ខែឧសភា ឆ្នាំ២០២០។ សម្រាប់ការដាក់ពាក្យ សូមទាក់ទង លោក គាត សុគីម តាមរយៈលេខ ០៧០ ៥៩៦ ០៧៦ ឬ [email protected] ។

ចំណែក កម្មវិធីអាហារូបករណ៍សិល្បៈអមតៈ អាន ចន-ផន ឆ្នាំ ២០២១ បង្កើតឡើងសម្រាប់សិស្ស-និស្សិតផ្នែកសិល្បៈ គ្រូសិល្បៈ សិល្បករ អ្នកធ្វើការក្នុងវិស័យសិល្បៈ អ្នកស្រាវជ្រាវ អ្នកនិពន្ធ និងផ្សេងៗទៀត ដែលចង់អភិវឌ្ឍជំនាញសិល្បៈ ឬមិនមែនសិល្បៈ ដើម្បីអភិវឌ្ឍន៍ឱកាសការងាររបស់ខ្លួនឲ្យបានកាន់តែប្រសើរ។

សិស្សអាហារូបករណ៍នឹងទទួលបានទឹកប្រាក់ចំនួន ១២០០ដុល្លារ/ឆ្នាំ និងតាមចំនួនឆ្នាំដែលបេក្ខជនបានស្នើសុំ។ ឈប់ទទួលពាក្យនៅថ្ងៃទី៣១ ខែឧសភា ឆ្នាំ២០២០។ អាហារូបករណ៍នេះផ្ដល់ជូន ១០ កន្លែងជារៀងរាល់ឆ្នាំ។ សម្រាប់ការដាក់ពាក្យ និងអំពីពាក្យស្នើសុំ សូមទាក់ទង លោក ឥន្ទ សរម៉ាណាក់ តាមរយៈលេខ ០១០ ៩៤១ ២២៤ ឬ [email protected] ។

រីឯ កម្មវិធីជ្រើសរើសអត្ថបទនិពន្ធថ្មី សម្រាប់ល្ខោន។ ដើម្បីរួមចំណែកជួយដល់អ្នកមានទេពកោសល្យ ឬអ្នកស្រលាញ់ការតែងនិពន្ធ សិល្បៈខ្មែរអមតៈ បានបង្កើតកម្មវិធីជ្រើសរើសអត្ថបទនិពន្ធថ្មីសម្រាប់ដំឡើងជាល្ខោន យ៉ាងច្រើន ២០ទំព័រ សម្រាប់់តួ ៤ ទៅ៥នាក់ និងឆ្លើយតបទៅនឹងប្រធានបទ «ការបង្ហាញអត្តសញ្ញាណ៖ ពួកគេ និងពួកយើង» ។

បេក្ខជនអាចជា អ្នកនិពន្ធ អ្នកសរសេរអត្ថបទរឿង ឬល្ខោន ឬអ្នកដែលចង់បង្ហាញសាច់រឿងលើឆាក។ ចំនួនស្នាដៃដែលត្រូវជ្រើសរើស មានពី ២ ទៅ ៤ស្នាដៃ។ អត្ថបទដែលជាប់ជំរើសនឹងទទួលបានប្រាក់ឧបត្ថម្ភចំនួន ៤០០ដុល្លារ ហើយនឹងត្រូវបានបង្ហាញជាល្ខោនអានក្នុងកម្មវិធីសិល្បៈ រដូវវប្បធម៌ នៅខែតុលា និងវិច្ឆិកា ឆ្នាំ ២០២០ ក្នុងពេលខាងមុខនេះ។ ឈប់ទទួលពាក្យថ្ងៃទី ៣០ ខែមិថុនា ឆ្នាំ២០២០។

សម្រាប់ព័ត៌មានបន្ថែម សូមទាក់់ទង កញ្ញា សុត ច័ន្ទដាលី តាមរយៈលេខ ០៨៦ ៨៩៥ ៥៥៦ ឬ [email protected] ៕