COVID-19
អន្តរជាតិ
រុស្ស៊ី មានករណីឆ្លង COVID-19 ច្រើនជាងគេនៅអឺរ៉ុប និងឈរនៅលំដាប់ទី២លើពិភពលោក អ្នកកប់សព យកអ្នកស្លាប់ដោយសារ COVID-19 ទៅកប់។ រូបភាព៖ AFP
× គិតមកត្រឹមថ្ងៃទី១៧ ខែឧសភា រុស្ស៊ី បានក្លាយជាប្រទេសមានករណីជំងឺរលាកសួត ដែលបង្កដោយកូរ៉ូណាវីរុស (COVID-19) ច្រើនជាងគេបំផុតនៅទ្វីបអឺរ៉ុប និងឈរនៅលំដាប់ទីពីរបន្ទាប់ពីអាមេរិកលើតារាងពិភពលោក។ ទោះជាយ៉ាងណា រដ្ឋាភិបាលទីក្រុងមូស្គូបានបន្ធូរបន្ថយការរឹតត្បិតមួយចំនួនដើម្បីសម្រួលសេដ្ឋកិច្ចរបស់ខ្លួន។
តាមតួលេខរបស់វេបសាយ Worldometer រុស្ស៊ីមានករណីឆ្លង COVID-19 សរុបចំនួន ២៨១៧៥២ករណី អ្នកស្លាប់ចំនួន ២៦៣១នាក់ និងអ្នកជាសះស្បើយមានចំនួន ៦៧៣៧៣នាក់។ អត្រាអ្នកឆ្លងច្រើនបែបនេះ បានធ្វើឲ្យរុស្ស៊ីក្លាយជាប្រទេសមានអ្នកឆ្លង COVID-19 សរុបច្រើនជាងគេអឺរ៉ុប និងឈរនៅលំដាប់ទីពីរ បន្ទាប់ពីអាមេរិកដែលមានករណីឆ្លង ១៥២៧៦៦៤ករណី។ ការណ៍នេះ បានធ្វើឲ្យរុស្ស៊ីក្លាយជាទីតាំងផ្ទុះ COVID-19 ថ្មី ក្នុងទី្វបអឺរ៉ុប។
នាពេលកន្លងមក លោកអភិបាលក្រុងមូស្គូ Sergei Sobyanin ធ្លាប់ទទួលស្គាល់ថា តួលេខអ្នកឆ្លង COVID-19 គឺមានអត្រាច្រើនជាង ៣ដងនៃតួលេខ ដែលមានក្នុងបញ្ជីផ្លូវការ។
បើទោះបីជាមានករណីឆ្លងក្នុងមួយថ្ងៃជាច្រើនពាន់នាក់ ឬថ្ងៃខ្លះមានករណីឆ្លងរហូតដល់លើស ១ម៉ឺនករណីក៏ដោយ ប្រធានាធិបតីរុស្ស៊ី វ្ល៉ាឌីមៀ ពូទីន កាលពីថ្ងៃទី១១ ខែឧសភា បានលុបចោលបទបញ្ជាបិទប្រទេសខ្លះហើយបន្ទាប់ពីបិទប្រទេសទាំងស្រុងរយៈពេល ៦សប្តាហ៍។ ប្រជាជនមួយចំនួន ត្រូវបានគេបញ្ជូនត្រលប់ទៅធ្វើការវិញហើយ ខណៈពេលរដ្ឋាភិបាលបានលើកទឹកចិត្ត កុំឲ្យប្រជាជនគិតរឿងកូរ៉ូណាវីរុសច្រើនពេក។
ចំណែកសកម្មភាពសេដ្ឋកិច្ចមួយចំនួននៅក្នុងទីក្រុងមូស្គូ នៅតែបន្តបិទដដែល ដូចជាកន្លែងលក់រថយន្ត ហាងដែលមិនលក់ម្ហូបអាហារ និងកន្លែងកាត់សក់ជាដើម។ នេះបើតាមការចុះផ្សាយរបស់សារព័ត៌មាន Time៕
© រក្សាសិទ្ធិដោយ thmeythmey.com