ពីនេះ ពីនោះ
×![]()
ដោយ: ថ្មីៗ
ស្ថានភាពកូវីដ-១៩ដូចជាធូរស្រាលបន្តិច ដូច្នេះ សុធីរ និងសំណាង ងាកមកនិយាយពីរបៀបធ្វើការរបស់មន្ត្រីរដ្ឋ បុគ្គលិកអង្គការ និងបុគ្គលិកក្រុមហ៊ុនឯកជនវិញម្តង។
សុធីរ៖ អា សំណាង! តើសព្វថ្ងៃនេះ អ្ហែងធ្វើការងារអីឲ្យពិតប្រាកដ?
សំណាង៖ ពីមុនអញធ្លាប់ធ្វើការងាររដ្ឋ ក្រោយមកការងារអង្គការ និងក្រោយមកទៀត ការងារក្រុមហ៊ុន ហើយឥឡូវនេះ អញគ្មានការងារពិតប្រាកដធ្វើទេ។ និយាយដោយស្មោះ អាយុអញចាស់បន្តិចហើយ ដូច្នេះ អញតាមដាន និងវិភាគព័ត៌មានលេងខ្លះទៅ។
សុធីរ៖ ចុម អ្ហែងធ្វើការងារគ្រប់កន្លែងហើយហ្នឹង អង្គការ រដ្ឋ និងឯកជន។ តើហេតុអ្វីបានជាឈប់ពីគ្រប់កន្លែងអ៊ីចឹង?
សំណាង៖ អញសុំមិនឆ្លើយប្រាប់អ្ហែងរឿងហេតុផលដែលអញឈប់ ព្រោះ វាមានរឿងស្មុគស្មាញច្រើន…។
សុធីរ៖ មិនអីទេ តែអ្ហែងអាចប្រាប់ពីចំណុចអវិជ្ជមានខ្លះៗក្នុងវិស័យនីមួយៗបានទេ?
សំណាង៖ បានតើ។ តែអញសុំទោសជាមុនថា អញមិននិយាយពីមន្ត្រីរដ្ឋ ឬមន្ត្រីអង្គការ ឬបុគ្គលិកក្រុមហ៊ុនទាំងអស់ទេណា៎! អញនិយាយតែអ្នកខ្លះប៉ុណ្ណោះ។
សុធីរ៖ អើនិយាយមក កុំរៀបរាប់ច្រើនពេកអ្ហា!
សំណាង៖ និយាយពីការងាររដ្ឋ គឺល្អ។ មន្ត្រីមួយចំនួនធំធ្វើការងារល្អជូនជាតិ និងជូនរដ្ឋ។ តែអញធុញនឹងមន្ត្រីរដ្ឋមួយចំនួនខ្ជិលក្នុងការងារ។ លួចតែម៉ោងរដ្ឋយកទៅធ្វើការងារឯកជនខ្លួនឯង។ ទៅធ្វើការមិនទាន់ម៉ោង ចេញមុនម៉ោង។ល។ អញមិននិយាយមន្ត្រីទាំងអស់គ្នាទេណា៎ តែមានមន្ត្រីប្រភេទហ្នឹងច្រើនគួរសមដែរ។ ធ្វើការលំៗ មិនសូវមានឆន្ទៈធ្វើឲ្យស្ថាប័នរីកចម្រើនទៅមុខឡើយ។ មន្ត្រីខ្ជិលទាំងនោះប្រហែលភ្លេចគិតថា ខ្លួនឯងស៊ីប្រាក់ខែពលរដ្ឋដែលបង់ពន្ធជូនរដ្ឋហើយមើលទៅ!
សុធីរ៖ ចុះការងារអង្គការ?
សំណាង៖ ការងារអង្គការ ក៏ល្អ។ មន្ត្រីមួយចំនួនល្អ។ តែមន្ត្រីខ្លះ ធ្វើការយកតែប្រាក់ខែ។ ប្រាក់ខែរបស់មន្ត្រីអង្គការ គឺជាប្រាក់ជំនួយរបស់បរទេសដែលបានមកពីការបង់ពន្ធរបស់ប្រជាពលរដ្ឋនៃប្រទេសផ្តល់ជំនួយនោះ។ ងាកមកមន្ត្រីអង្គការយើងខ្លះវិញ ពួកគេចាយលុយគ្មានខ្វល់ ខុសខ្ទង់ ប្រើប្រាស់រថយន្តអង្គការខុសគោលការណ៍ដែលបានកំណត់។ល។ មន្ត្រីអង្គការខ្លះធ្វើការលេងៗ ចូលធ្វើការយឺត ចេញមុនម៉ោង ហើយគិតថា ការងារអង្គការមិនអីទេ ជាការងាររំភើយ ព្រោះ លុយជំនួយតើ!
សុធីរ៖ ចុះការងារក្នុងក្រុមហ៊ុនឯកជន?
សំណាង៖ អូរ! ការងារក្នុងក្រុមហ៊ុនឯកជន បុគ្គលិកដែលខ្ជិលប្រឈមនឹងការបណ្តេញចេញលឿនជាងការងារនៅក្នុងរដ្ឋ ឬនៅក្នុងអង្គការ។ អ្វីដែលអញសរសើរការងារឯកជន គឺថា បុគ្គលិកភាគច្រើនប្រឹងធ្វើការទាំងអស់គ្នា ព្រោះ ពួកគេយល់ច្បាស់ថា បើគ្មានចំណូល គឺគ្មានប្រាក់ខែ។ វាខុសគ្នា ពីមន្ត្រីរដ្ឋ និងមន្ត្រីអង្គការ ដែលមិនសូវគិតពីរឿងចំណូលឡើយ។ ដោយសារតែមិនគិតពីចំណូលហ្នឹងហើយ ទើបមន្ត្រីអង្គការខ្លះ និងមន្ត្រីរដ្ឋខ្លះ ធ្វើការលេងៗ។ បើតាមគំនិតអញ ប្រធានស្ថាប័នក្នុងអង្គការ ឬក្នុងរដ្ឋ គួរក្រលេកមើលរបៀបដឹកនាំរបស់ក្រុមហ៊ុនឯកជនខ្លះហើយ បើមិនដូច្នេះទេ មន្ត្រីកាន់តែខ្ជិលជាងមុន ផលិតភាពការងារកាន់តែខ្សោយជាងមុន។ តែទោះជាយ៉ាងនេះក្តី ក៏មានដែរ បុគ្គលិកក្រុមហ៊ុនដែលខ្ជិល ធ្វើការលំៗយកតែប្រាក់ខែនោះ៕
© រក្សាសិទ្ធិដោយ thmeythmey.com
