អាជ្ញាធរខេត្តពីររបស់ចិន ប្រកាសផ្ដល់សាច់ប្រាក់ជូនដល់ប្រជាកសិករ ដើម្បីឲ្យពួកគេឈប់ប្រកបមុខរបរចិញ្ចឹមសត្វព្រៃ ខណៈដែលរដ្ឋាភិបាលរងសម្ពាធកាន់តែខ្លាំងឲ្យបង្ក្រាបការជួញដូរសត្វព្រៃខុសច្បាប់។ តាមរបាយការណ៍បឋម ការជួញដូរសត្វព្រៃខុសច្បាប់ក្នុងប្រទេសចិននេះហើយ ត្រូវរងស្តីបន្ទោសថា នាំឲ្យមានការរីករាលដាលជំងឺ COVID-19។
អាជ្ញាធរចិន បានសន្យាប្រគល់ប្រាក់ជូនម្ចាស់កសិដ្ឋាន ឬកសិករចិនដែលចិញ្ចឹមសត្វព្រៃ ជាថ្នូរឲ្យពួកគេឈប់ប្រព្រឹត្តអំពើបែបនេះតទៅទៀត។ ក្រុមអង្គការសិទ្ធិសត្វ អះអាងបែបនេះ ដោយដកស្រង់ចុះផ្សាយទីភ្នាក់ងារព័ត៌មាន AFP នៅថ្ងៃ១៩ ខែឧសភា។
ក្នុងពេលប៉ុន្មានខែចុងក្រោយនេះ រដ្ឋាភិបាលក្រុងប៉េកាំង បានសម្រេចដាក់បម្រាមលើការជួញដូរសត្វព្រៃសម្រាប់បរិភោគ ដោយលើកឡើងពីហានិភ័យនៃជំងឺឆ្លងទៅកាន់មនុស្ស។ ក៏ប៉ុន្តែ ការជួញដូរនៅតែស្របច្បាប់សម្រាប់គោលដៅដទៃទៀតដូចជាកិច្ចការស្រាវជ្រាវ និងវេជ្ជសាស្ត្រតាមបែបប្រពៃណី។
កូរ៉ូណាវីរុសដែលបង្កជាជំងឺ COVID-19 ដ៏កាចសាហាវ ត្រូវបានរាយការណ៍ផ្ទុះឡើងដំបូងក្នុងផ្សារមួយកន្លែងក្នុងទីក្រុងវូហាន ភាគកណ្ដាលនៃប្រទេសចិន។ វីរុសនេះ ត្រូវបានគេជឿថា បានឆ្លងពីសត្វប្រចៀវទៅមនុស្ស មុនពេលឆ្លងរាតត្បាតទូទាំងសកលលោក។
ខេត្តចំនួន២របស់ចិន បានដាក់ចេញកម្មវិធីទិញយកមកគ្រប់គ្រងអាជីវកម្មចិញ្ចឹមសត្វព្រៃរបស់កសិករ ក្នុងគោលដៅជួយពួកគេផ្លាស់ប្តូរមុខរបរផ្សេងដើម្បីទ្រទ្រង់ជីវិត។ ខេត្តហ៊ូណាន កាលពីថ្ងៃទី១៥ ខែឧសភា បានប្រកាសចាប់ផ្ដើមកម្មវិធីសំណងដើម្បីបញ្ចុះបញ្ចូលអ្នកចិញ្ចឹមសត្វព្រៃ ប្រើកសិដ្ឋានពួកគេផលិតតែ និងថ្នាំរុក្ខជាតិជំនួសវិញ។
បើតាម AFP អាជ្ញាធរប្រកាសឲ្យប្រាក់១៦ដុល្លារសម្រាប់សត្វពស់១គីឡូក្រាម ហើយ១០ដុល្លារសម្រាប់កណ្ដុរស្រែមួយគីឡូក្រាម។ ចំណែក សត្វសំពោច ជាសត្វដែលគេជឿជាក់ថា ចម្លងជំងឺ SARSទៅមនុស្សមានតម្លៃរហូតដល់៨៤ដុល្លារ។
ខេត្តចិនមួយទៀតគឺជាំងស៊ី ក៏បានបញ្ចេញឯកសារលើផែនការជួយកសិករដូចគ្នានេះដែរ។ កាសែតរប្រចាំខេត្ត Jiangxi Daily បានរាយការណ៍កាលពីសប្តាហ៍មុនថា ខេត្តនេះមានអ្នកចិញ្ចឹមសត្វមានអាជ្ញាបណ្ណជាង២៣០០នាក់ ដែលភាគច្រើនចិញ្ចឹមសត្វព្រៃសម្រាប់បរិភោគ។ សត្វព្រៃដែលកសិករទាំងនេះចិញ្ចឹម មានតម្លៃសរុបរហូត ២២៥លានដុល្លារ។
ទាំងខេត្តជាំងស៊ីនិងខេត្តហ៊ូណា គឺសុទ្ធតែជាប់ព្រំដែនជាមួយខេត្តហ៊ូប៉ី ទីដែលជំងឺ COVID-19 ផ្ទុះឡើងដំបូងកាលពីខែធ្នូ ឆ្នាំ២០១៩។ ទាក់ទិនបញ្ហានេះ អង្គការសិទ្ធិសត្វ ឈ្មោះថា Humane Society International (HSI) លើកឡើងថា ខេត្តចិនទាំងពីរនេះ គឺជាខេត្តចិញ្ចឹមសត្វព្រៃដ៏ធំក្នុងប្រទេសចិន ខណៈគេមើលឃើញថា ខេត្តជាំងស៊ី បន្តពង្រីកពាណិជ្ជកម្មនេះយ៉ាងលឿនរហ័សក្នុងពេល១០ឆ្នាំចុងក្រោយនេះ។ ចំណូលខេត្តទាំងពីរបូកបញ្ចូលគ្នាដែលបានមកពីការលក់សត្វព្រៃ ឈានដល់ជាង១,៤ពាន់លានដុល្លារឯណោះ។
អ្នកជំនាញផ្នែកគោលនយោបាយចិនប្រចាំអង្គការ HIS លោក Peter Li បានប្រាប់ AFP ថា ផែនការបែបនេះ គួរតែត្រូវអនុវត្តនៅទូទាំងប្រទេសចិន។ ក៏ប៉ុន្តែលោកលើកកង្វល់ថា សំណើរបស់ខេត្តហ៊ូណា នៅតែពុំអាចបញ្ឈប់កសិករពីការចិញ្ចឹមសត្វ ដរាបណាកសិករចិនពុំយកសត្វទាំងនោះទៅលក់នៅទីផ្សារ។ ទោះជាបែបនេះក្តី លោក Li សង្កត់ធ្ងន់ថា នេះជាលើកដំបូងហើយដែលរដ្ឋាភិបាលចិនពិតជាសម្រេចធ្វើរឿងបែបនេះ៕