ជាតិ
សមាគមទេសចរណ៍ ជំរុញឲ្យភ្ញៀវជ្រើសរើសសេវាកម្មសហគមន៍ ដើម្បីផលប្រយោជន៍រួម
× ភ្នំពេញ៖ នៅក្នុងបរិបទកូវីដ១៩នេះ ក្រសួងទេសចរណ៍ បានរៀបចំស្ដង់ដារអាជីវកម្មថ្មី សម្រាប់អាជីវកម្មទេសចរណ៍ចំនួន ៣ រួមមានសេវាកម្មស្នាក់នៅ ម្ហូបអាហារ និងសេវាកម្មទេសចរណ៍សហគមន៍-រមណីយដ្ឋានទេសចរណ៍។ ស្របពេលដែល COVID-19 មានភាពស្ងប់ស្ងាត់នេះ អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍ បានជំរុញឲ្យភ្ញៀវទេសចរជ្រើសរើសសេវាកម្មសហគមន៍ទេសចរណ៍ ជាផ្នែកមួយនៃអេកូទេសចរណ៍ ដែលទាក់ចិត្តភ្ញៀវទេសចរណ៍ទៅកម្សាន្តបែបធម្មជាតិ។
សហគមន៍ទេសចរណ៍ ជាផ្នែកមួយនៃអេកូទេសចរណ៍ ដែលផ្ដល់សេវាកម្មផ្ទះស្នាក់, សេវាកម្មម្ហូបអាហារ និងសេវាកម្មដឹកជញ្ជូនភ្ញៀវទេសចរនៅក្នុងសហគមន៍។ ក្នុងបទសម្ភាសជាមួយសារព័ត៌មានថ្មីៗ អ្នកស្រី ឆាយ ស៊ីវលីន លើកឡើងថា សហគមន៍ទេសចរណ៍ អាចទាក់ទាញភ្ញៀវទេសចរ តាមរយៈផលិតផលទេសចរណ៍ និងសកម្មភាពផ្សេងៗ ពិសេសគោលដៅទេសចរណ៍នៅក្នុងសហគមន៍។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗជាមួយអ្នកស្រី ឆាយ ស៊ីវលីនប្រធានសមាគមទីភ្នាក់ងារទេសចរណ៍ដូចតទៅ៖
បើតាមអ្នកស្រី ឆាយ ស៊ីវលីន សហគមន៍ទេសចរណ៍ទទួលបានផលប្រយោជន៍តាមរយៈការផ្ដល់សេវាកម្មនានាដូចជា សេវាកម្មដឹកជញ្ជូន, សេវាកម្មផ្ទះស្នាក់, សេវាកម្មម្ហូបអាហារជាដើម។ អ្នកស្រី ឆាយ ស៊ីវលីន ក៏ជំរុញឲ្យសហគមន៍ទេសចរណ៍ផលិតអ្វីជារបស់ខ្លួនឯង ដើម្បីទទួលបានអត្ថប្រយោជន៍បន្ថែមទៀត។ ប្រធានសមាគមទីភ្នាក់ងារទេសចរណ៍កម្ពុជារូបនេះ សង្កេតឃើញថា បច្ចុប្បន្ន ការធ្វើដំណើរផ្សងព្រេង មានការចាប់អារម្មណ៍ពីសំណាក់ប្រជាពលរដ្ឋកម្ពុជា ដោយពីមុនភ្ញៀវទេសចរចូលចិត្តទៅកន្លែងណាមានអាហារហូបស្រាប់។
«ក្នុងអំឡុងនៃការរាតត្បាតកូវីដ១៩នេះ វាក៏ជាឱកាសដែលជំរុញឲ្យទេសចរណ៍ក្នុងស្រុកមានចលនាកាន់តែច្រើនជាងមុន ព្រោះកន្លងមក វិស័យអាកាសចរមានការរីកចម្រើនខ្លាំង ធ្វើឲ្យប្រជាពលរដ្ឋនៅក្នុងស្រុកមានឱកាសចេញទៅក្រៅប្រទេសច្រើន។ ក្នុងពេលដែលជួបហនិភ័យកូវីដនេះ យើងអាចជំរុញប្រជាពលរដ្ឋធ្វើដំណើរកម្សាន្តនៅក្នុងស្រុក»។ នេះជាការលើកឡើងរបស់អ្នកស្រី ឆាយ ស៊ីវលីន៕
Tag:
ទេសចរណ៍
សហគមន៍
សមាគមទីភ្នាក់ងារទេសចរណ៍
© រក្សាសិទ្ធិដោយ thmeythmey.com