COVID-19
កីឡាអន្តរជាតិ
អន្តរជាតិ
Mariappa ខ្សែការពារ Watford ថាខ្លួនឆ្លង COVID-19 ខណៈ Kante ខ្លាចហើយហាត់នៅផ្ទះវិញ
×![]()
ដោយ: ទេព ពិទូរ្យ
ខ្សែការពារ Adrian Mariappa សារភាពថា ខ្លួនជាមនុស្សម្នាក់ក្នុងចំណោមសមាជិក ៣នាក់របស់ក្រុម Watford ដែលបានធ្វើតេសត្តចេញលទ្ធផលវិជ្ជមានជំងឺ COVID-19។ យ៉ាងណា Mariappa មិនអស់ចិត្តឡើយ ដ្បិតខ្លួនមិនបានចេញក្រៅផ្ទះសោះ។
អត្ថបទទាក់ទង
នៅថ្ងៃទី១៩ ខែឧសភា Premier League ប្រកាសពីលទ្ធផលធ្វើតេស្តដែលក្នុងនោះមានកីឡាករ និងបុគ្គលិកមកពីក្រុម Watford និង Burnley រួមទាំងក្រុមមួយទៀតក្នុងក្របខណ្ឌ ចំនួន៦រូបបានឆ្លងជំងឺរលាកសួតបង្កដោយកូរ៉ូណាប្រភេទថ្មីនេះ។ Watford មានកីឡាករម្នាក់និងបុគ្គលិកពីនាក់ ហើយ Burnley មានជំនួយការអ្នកចាត់ការទូទៅម្នាក់គឺលោក Ian Woan បានឆ្លងជំងឺនេះ។
យ៉ាងណាក៏ដោយ Mariappa ខ្សែការពារសញ្ជាតិហ្សាម៉ាអ៊ិក វ័យ៣៣ឆ្នាំរបស់Watford ក៏ឆ្លងដែរ។ រូបគេអះអាង ខ្លួនពិតជាភ្ញាក់ផ្អើលយ៉ាងខ្លាំងនៅពិនិត្យឃើញមានឆ្លង COVID-19 ដ្បិតខ្លួនមិនដែលចាកចេញពីផ្ទះទាល់តែសោះអំឡុងការរាតត្បាតខ្លាំងនៃជំងឺនេះ។
«ក្រៅពីការហាត់ប្រាណខ្លះ និងការដើរជាមួយក្មេងៗខ្ញុំភាគច្រើនរៀននៅផ្ទះនិងមានសុខភាពល្អធម្មតា។ របៀបរស់នៅរបស់ខ្ញុំគឺស្ងប់ស្ងាត់ណាស់ ហើយមិនមានពិធីជប់លៀង ឬចេញទៅក្រៅនោះទេ ដូច្នេះខ្ញុំពិតជាមិនដឹងថាតើខ្ញុំត្រូវធ្វើយ៉ាងម៉េចទៀតទេ»។ នេះជាការរៀបរាប់របស់ Mariappa ដែលបានឆ្លង COVID-19 ទាំងមិនអស់ចិត្ត។
ដោយឡែក N'Golo Kante ខ្សែបម្រើក្រុម Chelsea បានខកខានចូលរួមហ្វឹកហាត់នៅថ្ងៃទីពីរ ក្រោយបង្ហាញខ្លួននៅថ្ងៃដំបូងរួចហើយ ព្រោះរូបគេភ័យខ្លាចឆ្លង COVID-19 ។ យ៉ាងណាក៏ដោយអវត្តមានរបស់កីឡាករសញ្ជាតិបារាំងរូបនេះ ទទួលបានការអនុញ្ញាតពីសំណាក់អ្នកចាត់ការទូទៅលោក Frank Lampard រួចហើយ។
Kante សម្រេចចិត្តបន្តការហ្វឹកហាត់នៅផ្ទះ ដូចការសម្រេចចិត្តរបស់ប្រធានក្រុម Watford កិឡាករ Troy Deeney និងមិត្តរួមក្រុមរបស់គេមួយចំនួនទៀតដែរ៕
Tag:
COVID-19
Adrian Mariappa
Watford
© រក្សាសិទ្ធិដោយ thmeythmey.com
