ប្រធាន IOC៖ អូឡាំពិកក្រុងតូក្យូនឹងត្រូវលុបចោល បើមិនអាចធ្វើនៅឆ្នាំ២០២១

COVID-19

កីឡាអន្តរជាតិ

អន្តរជាតិ

ប្រធាន IOC៖ អូឡាំពិកក្រុងតូក្យូនឹងត្រូវលុបចោល បើមិនអាចធ្វើនៅឆ្នាំ២០២១

21, May 2020 , 10:59 pm

រូបភាព

ដោយ: ទេព ពិទូរ្យ

លោក Thomas Bach ប្រធានគណៈកម្មាធិការអូឡាំពិកអន្តរជាតិ (IOC) អះអាងថា កីឡាអូឡាំពិកក្រុងតូក្យូឆ្នាំ២០២០ នឹងត្រូវលុបចោលតែម្តង ប្រសិនបើព្រឹត្តិការណ៍នេះមិនអាចធ្វើនៅឆ្នាំក្រោយបានទេនោះ។ នេះមានន័យថា កីឡាអូឡាំពិកនឹងគ្មានការពន្យារពេលជាលើកទីពីរ ដោយសារតែវិបត្តិ COVID-19 ឡើយ។

កាលពីខែមីនា IOC និងរដ្ឋាភិបាលជប៉ុនបានសម្រេចគ្នាពន្យារពេលការប្រកួតកីឡាអូឡាំពិកនេះរយៈពេលមួយឆ្នាំ ព្រោះវិបត្តិនៃជំងឺរាតត្បាត COVID-19។ ដោយសារការពន្យារពេលនេះ បានធ្វើឲ្យម្ចាស់ផ្ទះជប៉ុនខាតបង់ប្រាក់រាប់ពាន់លានដុល្លារឯណោះ។

ទោះយ៉ាងណា នាយករដ្ឋមន្ត្រីជប៉ុនស៊ីនហ្សូ អាបេបាននិយាយហើយថាព្រឹត្តិការណ៍កីឡាលំដាប់ពិភពលោកនេះ នឹងមិនអាចកើតឡើងនៅឆ្នាំ ២០២១ ឡើយ លុះត្រាតែ COVID-19 រលាយពីពិភពលោកទៅ។ ការអះអាងខាងលើនេះ លោក Bach ថាដោយសាលោកអាបេបានយល់ពីជំហររបស់លោករួចហើយ។

លោក Bach បានប្រាប់ BBC ថា៖« និយាយដោយត្រង់ទៅខ្ញុំមានការយល់ដឹងខ្លះៗពីបញ្ហានេះពីព្រោះអ្នកមិនអាចជួលបុគ្គលិក ៣០០០ ឬ ៥០០០ នាក់ជារៀងរហូតក្នុងគណៈកម្មាធិការរៀបចំកីឡានេះឡើយ។ អ្នកមិនអាចផ្លាស់ប្តូរកាលវិភាគកីឡាទាំងមូលនៅទូទាំងពិភពលោករាល់ឆ្នាំទាំងអស់បាននោះទេ។ ហើយអ្នកក៏មិនអាចមានអត្តពលិកស្ថិតក្នុងភាពមិនប្រាកដប្រជាដើម្បីចូលរួមប្រកួតនោះដែរ»។

លោក Bach បន្ថែមថា បើទោះបីយ៉ាងណាក៏ដោយ IOC ប្តេជ្ញាចិត្តរៀបចំព្រឹត្តិការណ៍អូឡាំពិកឆ្នាំ២០២០ នៅឆ្នាំ២០២១ឲ្យបាន ទោះជាត្រូវរៀបចំក្នុងកាលៈទេសៈលំបាក ឬក៏តម្រូវឲ្យអត្តពលិកត្រូវនៅដាច់ដោយឡែកពីគ្នាក៏ដោយ ប៉ុន្តែដាច់ខាតមិនអាចពន្យារពេលទៀតនោះទេ។

ជុំវិញលទ្ធភាពក្នុងការលុប ឬបន្តកម្មវិធីកីឡាលំដាប់ពិភពលោក ប្រធាន IOC សញ្ជាតិអាល្លឺម៉ង់រូបនេះមិនហ៊ានធានានោះទេ ប្រសិនបើវ៉ាក់សាំងសម្រាប់ជំងឺ COVID-19 មិនទាន់បានរកឃើញនៅមុនព្រឹត្តិការណ៍ឆ្នាំក្រោយដែលគ្រោងនឹងដំណើរការពីថ្ងៃទី២៣ ខែកក្កដាដល់ថ្ងៃទី៨ ខែសីហានោះ៕