អន្តរជាតិ
ចិន លើកទឹកចិត្តឲ្យប្រជាជនតៃវ៉ាន់ប្រឆាំងការប្រកាសឯករាជ្យ លោកលី ឃឺឈាំង នាយករដ្ឋមន្ត្រីចិន។រូបភាព Reuters
× ចិន នឹងលើកទឹកចិត្តឲ្យប្រជាជនចិនតៃវ៉ាន់ ឲ្យចូលរួមក្នុងការប្រឆាំងទៅនឹងការប្រកាស់ឯករាជ្យរបស់កោះតៃវ៉ាន់ និងផ្សព្វផ្សាយគោលនយោបាយបង្រួបបង្រួមប្រទេសចិន។ នេះគឺជាប្រកាសរបស់លោកលី ខឹឈាំង នាយករដ្ឋមន្ត្រីចិន ក្នុងសុន្ទរកថាបើកកិច្ចប្រជុំប្រចាំឆ្នាំរបស់សភាចិន នៅថ្ងៃទី ២២ ខែឧសភា។
ការលើកឡើងរបស់លោកនាយករដ្ឋមន្ត្រីចិន លី ខឹឈាំង ដែលចង់ឲ្យពលរដ្ឋតៃវ៉ាន់ប្រឆាំងការផ្ដាច់ខ្លួន ធ្វើឡើង បន្ទាប់ពីលោកស្រី Tsai Ing-wen បានអះអាងថា ចិនគួរតែរួមរស់ជាមួយតៃវ៉ាន់ដោយសន្តិភាព។ ក្នុងពិធីស្បថចូលកាន់តំណែងប្រធានាធិបតីអាណត្តិទីពីរ លោកស្រី Tsai និយាយថា ភាគីទាំងសងខាងមានកាតព្វកិច្ចក្នុងការស្វែងរកវិធីក្នុងការរួមរស់ជាមួយគ្នា ក្នុងរយៈពេលវែងទៅមុខដោយបង្ការការកើនឡើងនូវអរិភាព និងភាពខុសគ្នា។
មេដឹកនាំតៃវ៉ាន់រូបនេះ បន្ថែមថា តៃវ៉ាន់ជារដ្ឋឯករាជ្យ និងមិនចង់ក្លាយជាផ្នែកមួយដែលគ្រប់គ្រងដោយចិនឡើយ។ លោកស្រីនិយាយថាតៃវ៉ាន់ ចង់សន្ទនាជាមួយចិន ប៉ុន្តែមិនអាចទទួលយកសំណើ ប្រទេសមួយ ប្រព័ន្ធពីរឡើយ។
ចិនបានផ្តាច់ការសន្ទនាជាមួយតៃវ៉ាន់នៃឆ្នាំ២០១៦ បន្ទាប់ពីលោកស្រី Tsai ជាប់ឆ្នោតជាប្រធានាធិបតី។ ចិនធ្លាប់បានស្នើគោលការណ៍ប្រទេសមួយ ប្រព័ន្ធពីរទៅតៃវ៉ាន់ ប៉ុន្តែត្រូវបានច្រានចោលដោយបក្សនយោបាយនៅតៃវ៉ាន់ជាច្រើន។ លោកស្រី Tsai លើកឡើងថា ប្រទេសមួយ ប្រព័ន្ធពីរ នឹងបន្ទាបតៃវ៉ាន់ ក៏ដូចជាអន្តរាយដល់ស្ថានការណ៍បច្ចុប្បន្ន។
រឿងផ្ដាច់ខ្លួន ត្រូវបានចិនចាត់ទុកជាបន្ទាត់ក្រហម ដែលមិនអាចទទួលយកបានឡើយពីសំណាក់ប៉េកាំង។ ប៉ុន្តែការគាំទ្ររបស់ប្រទេសខ្លះទាំងផ្លូវការ និងមិនផ្លូវការ បន្តដង្ហើមតៃវ៉ាន់។
ត្រង់នេះ គេមិនអាចបំភ្លេចអាមេរិកដែលចិនរិះគន់ថា ជ្រៀតជ្រែកកិច្ចការផ្ទៃក្នុងដោយទទួលចិន តែបន្តមានសម្ព័ន្ធភាពយោធាជាមួយតៃវ៉ាន់។ អាមេរិក ទើបបានឯកភាពលើគម្រោងលក់មីស៊ីលបំពាក់លើនាវា Torpedo ចំនួន១៨ដើមឲ្យកោះតៃវ៉ាន់ ក្នុងតម្លៃ១៨០លានដុល្លារ ចំថ្ងៃលោកស្រី Tsai ស្បថចូលកាន់តំណែងអាណត្តិទីពីរ។
លោកស្រី Tsai និងគណបក្សប្រជាធិបតេយ្យជឿនលឿនរបស់លោកស្រី ទទួលបានការគាំទ្រយ៉ាងសម្បើមក្នុងការបោះឆ្នោតប្រធានាធិបតី និងសភាក្នុងខែមករា ដោយសន្យាងើបប្រឆាំងតទល់នឹងចិន។ ចិនតាំងតែងតែចាត់ទុកតៃវ៉ានជាផ្នែកមួយនៃទឹកដីរបស់ខ្លួន ហើយនិងប្រើប្រាស់កម្លាំងក្នុងករណីចាំបាច់ ដើម្បីដាក់កោះនេះក្រោមការគ្រប់គ្រងរបស់រដ្ឋាភិបាលចិនប៉េកាំង៕
© រក្សាសិទ្ធិដោយ thmeythmey.com