សាលារៀន អាចនឹងបើកវិញ នៅខែវិច្ឆិកា បើជំងឺកូវីដ-១៩ មិនរាលដាល

COVID-19

ជាតិ

សង្គមជាតិ

សាលារៀន អាចនឹងបើកវិញ នៅខែវិច្ឆិកា បើជំងឺកូវីដ-១៩ មិនរាលដាល

22, May 2020 , 9:39 pm

រូបភាព

លោក ហង់ជួន ណារ៉ុន ឆ្លៀតបង្រៀនសិស្សតូចៗ ពេលលោក ចុះទៅពិនិត្យការសិក្សាពីចម្ងាយនិងតាមប្រព័ន្ធអេឡិចត្រូនិច ក្នុងខេត្តកំពង់ឆ្នាំ (រូបពី AKP)

ដោយ: សារព័ត៌មានថ្មីៗ

ក្រសួងអប់រំ យុវជន និង កីឡា នឹងពិចារណា បើកសាលារៀនឡើងវិញ នៅថ្ងៃទី១ ខែវិច្ឆិកា ឆ្នាំ២០២០ បើមិនមានការរីរាលដាលជំងឺកូវីដ១៩។ នេះជាការអះអាងរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ ក្នុងឱកាសដែលលោក ចុះទៅពិនិត្យមើលសកម្មភាពសិក្សាពីចម្ងាយនិងតាមប្រព័ន្ធអេឡិចត្រូនិចរបស់សិស្សានុសិស្សនៅខេត្តកំពង់ឆ្នាំ កាលពីថ្ងៃទី២១ ខែឧសភា ឆ្នាំ២០២០ ហើយត្រូវបានទីភ្នាក់សារព័ត៌មានកម្ពុជា (AKP) ស្រង់យកទៅចុះផ្សាយ។

បើតាមការដកស្រង់របស់ AKP លោក ហង់ជួន ណារ៉ុន លើកឡើងថា ក្រសួងអប់រំ អាចនឹងបើកថ្នាក់ទី៩និងថ្នាក់ទី១២ ឲ្យចូលរៀនមុនគេ (មុនខែឧសភា) ព្រោះត្រូវត្រៀមប្រឡង។ លោក ជំរុញឲ្យលោកគ្រូ-អ្នកគ្រូ បន្តជួយបង្រៀនសិស្ស តាមលទ្ធភាព ជាពិសេសត្រូវជួយបង្រៀនសិស្សថ្នាក់ទី៩ និងថ្នាក់ទី១២ ដែលត្រូវប្រឡង។

ទន្ទឹមនឹងនេះ លោករដ្ឋមន្ត្រី ប្រាប់លោកគ្រូ-អ្នកគ្រូ ឲ្យបន្ដបង្រៀនសិស្សានុសិស្សជាលក្ខណៈទ្រុងទ្រាយតូច ដោយមិនត្រូវឲ្យលើសពី១០នាក់ឡើយ។ លោក បន្ថែមថា គ្រប់សាលារៀនទាំងអស់ មិនអាចបង្រៀនដូចមុនឡើយ ដោយក្នុង១ថ្នាក់ ត្រូវចែកចេញទៅជា២ថ្នាក់ ហើយសិស្សនុសិស្ស ត្រូវរក្សាគម្លាតពីគ្នា និងលាងដៃជាប្រចាំ។

កាលពីពេលថ្មីៗនេះ រដ្ឋមន្ត្រីអប់រំ បានសរសេរលិខិតជូនទៅសម្តេចនាយករដ្ឋមន្ត្រី ដោយពន្យល់ពីហេតុផលនៃការបន្តពន្យារពេលបើកសាលារៀនឡើងវិញ។ ហេតុផលធំបំផុតរបស់លោករដ្ឋមន្ត្រី ដែលប្រាប់ទៅនាយករដ្ឋមន្ត្រី គឺខ្លាចជំងឺកូវីដ១៩ រាលដាលចូលទៅក្នុងសាលារៀន ដូចនៅសិង្ហបុរី។ ប៉ុន្តែ លោក បានជម្រាបនាយកដ្ឋមន្ត្រីថា លោក នឹងពិចារណា បើកសាលារៀនឡើងវិញ ឲ្យបានមុនថ្ងៃទី១ ខែវិច្ឆិកា ឆ្នាំ២០២០ ដែលជាថ្ងៃបើកបវេសនកាលឆ្នាំសិក្សាថ្មី។

អត្ថបទទាក់ទង

នាយករដ្ឋមន្ត្រី ស្របតាមមតិរដ្ឋមន្ត្រីអប់រំ ក្នុងការពន្យារពេលបើកសាលា

រដ្ឋមន្រ្តីអប់រំ៖«ការបើកសាលាលឿនពេក ជាការប្រថុយនឹងរលកទីពីរ នៃជំងឺកូវីដ១៩»

គិតមកពេលនេះ វា មានរយៈពេលជាងពីរខែហើយ ដែលកម្ពុជា បិទសាលារៀននៅទូទាំងប្រទេស។
គេ វាយតម្លៃថា ស្ថានភាពជំងឺកូវីដ១៩ នៅកម្ពុជា បានធូរស្បើយវិញ ក្រោយអ្នកជំងឺកូវីដ១៩ ទាំង១២២នាក់ ត្រូវបានព្យាបាលឲ្យជាសះស្បើយទាំងអស់គ្នា និងខានរកឃើញអ្នកឆ្លងថ្មីជាង១ខែមកហើយ។ ទើបតែនៅយប់ម្សិលមិញ (២១ឧសភា) កម្ពុជា រកឃើញបុរសជនជាតិខ្មែរម្នាក់ មានជំងឺកូវីដ១៩ ហើយក៏ត្រូវបានបញ្ជូនទៅព្យាបាល នៅមន្ទីរពេទ្យខ្មែរ-សូវៀត។

បុរសជនជាតិខ្មែររូបនោះ បានធ្វើដំណើរតាមជើងហោះហើរពីហ្វីលីពីន ឆ្លងកាត់កូរ៉េខាងត្បូង ហើយវិលត្រឡ្រប់មកកម្ពុជា នៅយប់ថ្ងៃទី២១ ខែឧសភា ឆ្នាំ២០២០។ ចំណែក អ្នកដំណើរ៦២នាក់ទៀត ដែលស្ថិតក្នុងយន្តហោះជាមួយរូបគេ ត្រូវយកទៅដាក់ឲ្យនៅដាច់ដោយឡែករយៈ១៤ថ្ងៃ នៅសណ្ឋាគារមួយក្នុងរាជធានីភ្នំពេញ៕