អន្តរជាតិ
តើគេវាស់គុណភាពខ្យល់ដោយដូចម្តេច?
× គុណភាពខ្យល់បានក្លាយទៅជារឿងសំខាន់នៅតាមបណ្តាទីក្រុងធំៗនានានៅជុំវិញពិភពលោក។ វាមានឥទ្ធិពលយ៉ាងខ្លាំងទៅកាន់សុខភាពរបស់ប្រជាជន ជាពិសេសសុខភាពនៃប្រព័ន្ធដង្ហើមរបស់មនុស្ស។ គុណភាពខ្យល់គឺជាការវាស់វែងបរិមាណផង់កខ្វក់តូចៗល្អិតៗដែលមាននៅក្នុងបរិយាកាសនៃតំបន់ណាមួយ។ គុណភាពខ្យល់ត្រូវបានវាស់វែងដោយឧបករណ៍មួយដែលមានឈ្មោះថា«Air Quality Monitor»។
គេហទំព័រ equipcoservices.com បានពន្យល់ថា ជាទូទៅឧបករណ៍វាស់គុណភាពខ្យល់មានប្រព័ន្ធ Sensor ចំនួនបីកន្លែងដែលមានតួរនាទីក្នុងការចាប់យក និងវាស់វែងបរិមាណ អុកស៊ីសែន កាបូនម៉ូណូអុកស៊ីត និងកាបូនឌីអុកស៊ីត។ ចំពោះ អុកស៊ីសែន និងកាបូនម៉ូណូអុកស៊ីត ឧបករណ៍នេះប្រើប្រាស់ប្រព័ន្ធ Sensor អាឡិចត្រូគីមី (Electrochemical) ដែលបញ្ចេញលទ្ធផលជាចរន្តអគ្គីសនីសម្រាប់ការពិនិត្យដោយឧបករ
ចំណែកឯកាបូនឌីអុកស៊ីតវិញ ឧស្ម័នមួយនេះត្រូវបានវាស់វែងដោយការប្រើប្រាស់រលកពន្លឺ Infrared បញ្ចាំងទៅកាន់ឧស្ម័ននោះដែលមាននៅក្នុងឧបករណ៍។ លទ្ធផលជាតួរលេខជាក់ស្តែងទាំងឡាយត្រូវបានគេយកមកប្រៀបធៀបជាមួយនឹងតារាង AQI ឬ Air Quality Index ។ តារាង AQI នេះត្រូវបានគេប្រើប្រាស់ជាទូទៅនៅតាមតំបន់ជាច្រើនក្នុងពិភពលោក។ តារាងនេះមានតម្លៃលេខពីលេខ ០ ទៅកាន់លេខ ៥០០ ។
គេហទំព័រ scijinks.gov បានបញ្ជាក់ថា ចំពោះប្រព័ន្ធតារាង AQI គេធ្វើការវាស់វែងកង្វក់ខ្យល់ចំនួន៥ចំណុចធំៗ។ ក្នុងនោះមាន Ground level Ozone, កាបូនម៉ូណូអុកស៊ីត, ស៊ុលផួអុកស៊ីត, អាសូតអុកស៊ីត និង ផង់ធូលីផ្សេងៗក្នុងខ្យល់ (Airborne Particles)។ Ground level Ozone និង ផង់ធូលីក្នុងខ្យល់គឺជាអ្នកដែលបង្កឲ្យមានភាពអ័ព្វនៅក្នុងខ្យល់ កាត់បន្ថយការមើលឃើញឆ្ងាយ។ Ozone មានលក្ខណៈខុសគ្នាពី Ground level Ozone។ Ozone ធម្មតាដែលមានវត្តមាននៅរយៈកម្ពស់ខ្ពស់មានតួរនាទីសំខាន់ក្នុងការទប់ស្កាត់កាំរស្មី UV ពីព្រះអាទិត្យ។ តែ Ground level Ozone វិញកើតចេញពី កាបូនម៉ូណូអុកស៊ីត អាសូតអុកស៊ីត ឬមេតាននៅពេលដែលឧស្ម័នទាំងនេះមានប្រតិកម្មជាមួយនឹងពន្លឺព្រះអាទិត្យ។ ភាគច្រើនវាចេញមកពីតំបន់ឧស្សាហកម្ម ឬយានជំនិះជាដើម។
ផង់ធូលីគឺជាគ្រាប់ដីតូចៗឆ្មារៗមានប្រភពមកពីការដ្ឋានសំណង់ បំពង់ផ្សែងរោងចក្រ ភ្លើងឆេះព្រៃ ឬសកម្មភាពភ្នំភ្លើងជាដើម។ តម្លៃលេខក្រោម ៥០ បង្ហាញថាមានសុវត្តិភាពខ្ពស់ក្នុងការដកដង្ហើម ចំណែកឯតម្លៃលេខពី ៣០១ ទៅកាន់ ៥០០ បង្ហាញពីភាពគ្រោះថ្នាក់ខ្ពស់។ មិនត្រឹមតែប៉ុណ្ណោះ គុណភាពខ្យល់ក៏ត្រូវបានគេពិនិត្យបន្ថែមពីក្នុងលំហផងដែរ ជាមួយនឹងក្រុមផ្កាយរណបជាច្រើនដែលដាលជាគន្លងជុំវិញភពផែនដី។
រដ្ឋបាលជាតិទទួលបន្ទុកផ្នែកសមុទ្រ និងបរិយាកាស (National Oceanic and Atmospheric Administration) របស់សហរដ្ឋអាមេរិក ឬ NOAA ដាក់ឲ្យដំណើរការផ្កាយរណប GOES-R ឬ Geostationary Operational Environmental Satellites-R ក្នុងការពិនិត្យគុណភាពខ្យល់ក្នុងបរិយាកាសរៀងរាល់៥នាទីម្តងផងដែរ។ ចំណែកឯផ្កាយរណប JPSS មានតួរនាទីក្នុងការពិនិត្យមើលផង់ធូលីដែលកើតចេញពីភ្លើងឆេះព្រៃជាដើម៕
© រក្សាសិទ្ធិដោយ thmeythmey.com