រដ្ឋាភិបាល គ្រោងសង់សារមន្ទីរថាមពលកើតឡើងវិញ នៅខេត្តកំពត នាចុងឆ្នាំនេះ

ជាតិ

រដ្ឋាភិបាល គ្រោងសង់សារមន្ទីរថាមពលកើតឡើងវិញ នៅខេត្តកំពត នាចុងឆ្នាំនេះ

24, May 2020 , 8:59 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ រដ្ឋាភិបាលគ្រោងសង់សារមន្ទីរថាមពលកើតឡើងវិញ និងឧទ្យានជាតិសម្ដេចហ៊ុន សែនកំពត នាចុងឆ្នាំ២០២០។ លោក កែវ រតនៈ អគ្គនាយកអគ្គិសនីកម្ពុជា និងអភិបាលខេត្តកំពតលោក ជាវ តាយ កំពុងពិភាក្សា និងសិក្សាលើគម្រោង។

លោក កែវ រតនៈ ដែលបានទទួលភារកិច្ចសង់សារមន្ទីរថាមពលកើតឡើងវិញនេះ បានបញ្ជាក់ថា កម្ពុជា មានធនធាននិងសមត្ថភាពគ្រប់គ្រាន់ ក្នុងការរៀបចំសារមន្ទីរមួយនេះ ប៉ុន្តែគ្រាន់តែមិនទាន់បានរៀបចំប៉ុណ្ណោះ។ «ដោយសារកម្ពុជាយើងបច្ចុប្បន្នមានវារីអគ្គិសនីច្រើនគួរសម ហើយការប្រមូលផ្ដុំចំណេះដឹងបទពិសោធន៍នៅនឹងកន្លែងដូចស្រុកគេ ដើម្បីជាការស្រាវជ្រាវរៀនសូត្រស្វែងយល់ជាសាធារណជនទូទៅ នៅពុំទាន់មាននៅឡើយទេ»។ នេះជាការបញ្ជាក់របស់លោក កែវ រតនៈ។

អគ្គនាយកអគ្គិសនីកម្ពុជារូបនេះ បានសង្កត់ធ្ងន់ថា គោលដៅនៃគម្រោងសង់សារមន្ទីរថាមពលកើតឡើងវិញនេះ គឺផ្តោតសំខាន់លើការបង្កើតឲ្យមានជាបណ្ដុំវារីអគ្គិសនីនៅតាមបណ្ដាខេត្តទាំងឡាយ សម្រាប់ផ្ដល់ចំណេះដឹងដល់ភ្ញៀវទេសចរណ៍ជាតិ អន្តរជាតិ ឬប្រជាពលរដ្ឋខ្មែរ ដែលទៅលេងកម្សាន្តនៅខេត្តកំពត ដោយពួកគេគ្រាន់តែចូលមើលក្នុងសារមន្ទីរនេះ ក៏អាចដឹងអំពីប្រព័ន្ធវារីអគ្គិសនីនៅកម្ពុជា ដោយមិនចាំបាច់ទៅមើលដល់ទីកន្លែងឡើយ។

ឯរីការរៀបចំឧទ្យានជាតិសម្ដេច ហ៊ុន សែន កំពត វិញ លោក កែវ រតនៈ បានបញ្ជាក់ថា ការដាក់ឧទ្យានជាតិនេះ សម្រាប់ទាក់ទាញទេសចរណ៍ជាតិ និងអន្តរជាតិ ទៅកម្សាន្តលេងនៅតំបន់នេះ ឱ្យកាន់តែច្រើន ហើយវាក៏ជាសមិទ្ធផលថ្មីរបស់ជាតិផងដែរ។

លោក កែវ រតនៈ ក៏បានបញ្ជាក់ថា៖«ឈ្មោះគម្រោងសារមន្ទីរថាមពលកើតឡើងវិញនិងឧទ្យានជាតិសម្ដេចហ៊ុន សែនកំពត ដែលបានដាក់បង្ហាញក្នុងកិច្ចប្រជុំពេលនេះ គឺជាឈ្មោះគម្រោងបណ្ដោះអាសន្នមួយប៉ុណ្ណោះ បើថ្ងៃក្រោយយើងមានថាមពលខ្យល់ ឬព្រះអាទិត្យបន្ថែមទៀត យើងនឹងអាចកែប្រែឡើងវិញ»។

គម្រោងសាងសង់សារមន្ទីរថាមពលកើតឡើងវិញ និងឧទ្យានជាតិសម្ដេចហ៊ុន សែនកំពតនេះ គឺជាគម្រោងមួយអនុវត្ត ផ្អែកតាមអនុក្រឹត្យរបស់រាជរដ្ឋាភិបាល ផ្ដល់ឱ្យអគ្គិសនីកម្ពុជា អនុវត្តដំណើរការគម្រោងសាងសង់ នៅក្នុងឆ្នាំ២០២០នេះ នឹងអាចត្រូវបញ្ចប់នៅឆ្នាំ២០២២ខាងមុខ។ គម្រោងនេះ មានទីតាំងស្ថិតនៅ តំបន់សហគមន៍ នៃឧទ្យានជាតិព្រះមន្នីវង្ស«បូកគោ» លើផ្ទៃដីកោះទំហំ ៨,៦០ហិចតា នៅក្នុងភូមិសាស្ត្រភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូខេត្តកំពត។

ទោះបីយ៉ាងណាគម្រោងនេះ នៅមិនទាន់ដឹងពីទំហំនៃការប្រើប្រាស់ថវិកានៅឡើយ ប៉ុន្តែទំហំការកសាងនូវហេដ្ឋារចនាសម្ព័ន្ធមានច្រើនគួរសម ដែលបម្រើដល់ការសិក្សាស្រាវជ្រាវបទពិសោធន៍ បច្ចេកវិទ្យាវិស័យវារីអគ្គិសនី និងវិស័យទេចរណ៍ក្នុងតំបន់នៃខេត្តកំពតផងដែរ៕