COVID-19
ជាតិ
ក្រសួងវាយតម្លៃថា ប្តីស្ត្រីវ័យ៣៩ឆ្នាំដែលមានជំងឺកូវីដ១៩ មានហានិភ័យឆ្លងខ្ពស់ ក្រៅពីនេះ មានហានិភ័យទាប
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល ថ្លែងក្នុងសន្និសីទកាសែត ស្តីពីស្ថានភាពជំងឺកូវីដ១៩ នៅទីស្តីការគណៈរដ្ឋមន្រ្តី កន្លងមក
×![]()
ភ្នំពេញ៖ ក្រសួងសុខាភិបាល បានរៀបរាប់ពីដំណើររបស់ស្ត្រីខ្មែរវ័យ៣៩ឆ្នាំ ដែលបានឆ្លងជំងឺកូវីដ១៩ ពីក្រៅប្រទេស មុននឹងចូលមកកម្ពុជា។ តាមរយៈសកម្មភាពចូលមកកម្ពុជានេះ ក្រសួងសុខាភិបាល បានវាយតម្លៃថា អ្នកដែលមានហានិភ័យខ្ពស់នៃការឆ្លងជំងឺកូវីដ១៩ ពីស្ត្រីវ័យ៣៩ឆ្នាំនេះ គឺមានតែប្តីគាត់ប៉ុណ្ណោះ ក្រៅពីនេះ មានហានិភ័យឆ្លងទាប។
ស្ត្រីខ្មែរវ័យ៣៩ឆ្នាំ ដែលមានជំងឺកូវីដ១៩នេះ គឺបានចាកចេញពីទឹកដីអាមេរិក ហើយបន្តជើងហោះហើរពីកូរ៉េខាងត្បូង មកដល់កម្ពុជា នៅថ្ងៃទី៨ ឧសភា ហើយត្រូវបានកំណត់ឱ្យដាក់ចត្តាឡីស័កខ្លួនរយៈពេល១៤ថ្ងៃសិន។ ស្របពេលចត្តាឡីស័កនេះ ស្រាប់តែក្រសួងសុខាភិបាល ទទួលបានព័ត៌មានពីអាជ្ញាធរសុខាភិបាលកូរ៉េ នៅថ្ងៃទី១១ ឧសភាមកថា មានស្ត្រីម្នាក់នៅលើជើងយន្តហោះជាមួយស្ត្រីវ័យ៣៩ឆ្នាំនេះ មានផ្ទុកជំងឺកូវីដ១៩ ទើបក្រសួងក៏ធ្វើតេស្តសំណាកស្ត្រីខ្មែរវ័យ៣៩ឆ្នាំដែរ តែមិនមានបញ្ហាអ្វីឡើយ ។ ប៉ុន្តែស្រាប់តែដល់ថ្ងៃទី២១ ឧសភា ស្ត្រីខ្មែរវ័យ៣៩ឆ្នាំនេះ បានធ្វើតេស្តម្ដងទៀត ក៏រកឃើញមានជំងឺកូវីដ១៩តែម្ដង ទើបក្រសួងបញ្ជូនស្ត្រីរូបនេះ ទៅសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២២ ឧសភា។
មុនរកឃើញជំងឺកូវីដ១៩លើខ្លួន ស្ត្រីខ្មែរវ័យ៣៩ឆ្នាំនេះ បាននៅសម្រាកចត្តាឡីស័កខ្លួនឯង ១៤ថ្ងៃនៅក្នុងផ្ទះ ដែលស្ថិតនៅសង្កាត់ទឹកថ្លា រាជធានីភ្នំពេញ តាមការណែនាំរបស់ក្រសួងសុខាភិបាល។ ក្នុងអំឡុងពេលចត្តាឡីស័កនេះ មានតែប្តីរបស់ស្ត្រីវ័យ៣៩ឆ្នាំនេះទេ ដែលបានប៉ះពាល់ផ្ទាល់ជាមួយគាត់នោះ ខណៈដែលកូន២នាក់ និងក្មួយ១នាក់ ដែលរស់នៅជាមួយគាត់ ត្រូវបានបញ្ជូនទៅស្នាក់នៅស្រុកកំណើតខេត្តកំពង់ចាម។ បច្ចុប្បន្នប្តីរបស់ស្ត្រីរូបនេះ ក៏ត្រូវបានកំណត់ឱ្យរស់នៅដោយឡែករយៈពេល១៤ថ្ងៃដែរ ក្រោយពីធ្វើតេស្តសុខភាពរកមិនឃើញជំងឺកូវីដ១៩ក៏ដោយ។
ចំណែកអ្នករួមដំណើរ៦៦នាក់ផ្សេងទៀត លើយន្តហោះជាមួយស្ត្រីវ័យ៣៩ឆ្នាំនេះ មិនមានអ្នកណាម្នាក់ មានបញ្ហាសុខភាពនោះទេ ខណៈដែលកន្លែងអង្គុយនៅលើយន្តហោះនោះ មានការរៀបចំឱ្យឃ្លាតពីគ្នា តាមគោលការណ៍គម្លាតសុវត្ថិភាពបុគ្គល។ នេះបើតាមក្រសួងសុខាភិបាល។
តែយ៉ាងណាក្រសួងសុខាភិបាល នៅតែយល់ឃើញថា ហានិភ័យនៃការឆ្លងពីស្ត្រីវ័យ៣៩ឆ្នាំនេះ នៅតែកើតមាន។ នោះគឺប្តីរបស់គាត់តែម្ដង។ «លទ្ធផលនៃការស្រាវជ្រាវបានបង្ហាញផងដែរថា អ្នកដែលមានហានិភ័យខ្ពស់ និងប៉ះពាល់ផ្ទាល់គឺមានតែស្វាមីគាត់ទេ ដែលក្រុមការងារបានធ្វើតេស្តគាត់រួចរាល់ហើយ ដែលបង្ហាញថា លទ្ធផលអវិជ្ជមាន។ រីឯអ្នកផ្សេងទៀត គឺស្ថិតនៅក្នុងហានិភ័យទាបចំនួន៥២នាក់ និងហានិភ័យមធ្យមចំនួន១៤នាក់»។ នេះជាការបញ្ជាក់របស់ក្រសួងសុខាភិបាល តាមរយៈលោកស្រី ឱ វណ្ណឌីន រដ្ឋលេខាធិការក្រសួង ដែលបានបញ្ជូនរបាយការណ៍ស្រាវជ្រាវដល់អ្នកកាសែត តាមបណ្ដាញសង្គមតេឡេក្រាម។
មូលហេតុដែលក្រសួងសុខាភិបាល ហ៊ានកំណត់ហានិភ័យឆ្លងជំងឹកូវីដ១៩ កម្រិតខ្ពស់ ទាប និងមធ្យមនេះ ព្រោះតែមន្ត្រីជំនាញរបស់ក្រសួង បានសាកសួរព័ត៌មានពីស្ត្រីខ្មែរវ័យ៣៩ឆ្នាំ ដែលមានជំងឺកូវីដ១៩នេះផ្ទាល់ ហើយសង្កេតឃើញថា ស្ត្រីរូបនេះ មានការយល់ដឹងខ្ពស់អំពីការទប់ស្កាត់ការចម្លងជំងឺទៅអ្នកដទៃ។
ក្រសួងសុខាភិបាល បានសង្កត់ធ្ងន់ដូច្នេះថា៖«ស្ត្រីរូបនេះ គាត់មានការយល់ដឹងល្អអំពីរបៀបនៃការការពារការចម្លងនេះ គឺជាចំណុចល្អមួយ ដែលអាចជួយការពារការឆ្លងវីរុសកូវីដ១៩ ពីរូបគាត់ទៅអ្នកដទៃ ដែលក្រុមការងារបានធ្វើការសន្និដ្ឋាន កំណត់នៅហានិភ័យទាប និងមធ្យមនេះរួចហើយដែរ»។
ក្រសួងសុខាភិបាល ក៏អំពាវនាវឱ្យពលរដ្ឋ មានការប្រុងប្រយ័ត្នជាប់ជានិច្ច តាមរយៈការអនុវត្តតាមវិធានការអនាម័យ ដោយការលាងដៃនិងទឹកអាល់កុល សាប៊ូ ឬទឹកសម្លាប់មេរោគផ្សេងៗទៀត។ ជាពិសេសពាក់ម៉ាស់ ឬក្រមា និងចៀសវាងទៅកន្លែងប្រមូលផ្ដុំដោយមនុស្សច្រើនជាដើម។«យើងងាយភ្លេចពីវីរុសកូវីដ១៩ តែវីរុសកូវីដ១៩ មិនងាយភ្លេចយើងនោះឡើយ។ ហើយការចម្លងវីរុសកូវីដ១៩នេះ គឺអាចមានគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់»។ ជាការលើកឡើងរបស់ក្រសួងសុខាភិបាល។
គួរបញ្ជាក់ថា កម្ពុជា ទើបរកឃើញអ្នកជំងឺកូវីដ១៩ ចំនួន២នាក់ថែមទៀត ខណៈអ្នកជំងឺ១២២នាក់ បានជាសះស្បើយ។ អ្នកជំងឺ២នាក់ថ្មីនេះ ជាករណីទី១២៤របស់កម្ពុជាហើយ៕
© រក្សាសិទ្ធិដោយ thmeythmey.com
