ជាតិ
អាជ្ញាធរស្រុកបន្ទាយស្រីរុះរើសំណង់តូបអនាធិបតេយ្យជាង២០នៅក្បែររង្វង់មូល
×![]()
ដោយ: ថ្មីៗ
សៀមរាប៖ សំណង់អនាធិបតេយ្យជាង២០តូប ដែលសង់អមសងខាងផ្លូវក្បែររង្វង់មូលធំជាងគេនៅស្រុកបន្ទាយស្រីអស់ជាច្រើនឆ្នាំមកហើយ ត្រូវបានអាជ្ញាធរធ្វើការរុះរើចេញ។ អាជ្ញាធរបញ្ជាក់ថា វិធានការនេះធ្វើឡើងដើម្បីរៀបចំកែលម្អសោភ័ណភាពតំបន់នេះដែលសម្បូរភ្ញៀវទេសចរឆ្លងកាត់។
អភិបាលស្រុកបន្ទាយស្រី តាមរយៈទំព័រហ្វេសហ៊ុករបស់ខ្លួនបានលើកឡើងពីករណីរុះរើសំណង់តូបលក់ដូរអនាធិបេតយ្យរបស់ប្រជាពលរដ្ឋជាង២០ ដែលសង់លើចំណីថ្នល់តាមបណ្ដោយផ្លូវហាយវេលេខ៦៦ ចាប់ពីរង្វង់មូលភ្នំគូលែន ឆ្ពោះទៅតំបន់រមណីយដ្ឋានក្បាលស្ពាន។ លោកអភិបាលពន្យល់ថា ការរុះរើនេះគឺដើម្បីកែលម្អសោភ័ណភាព សណ្ដាប់ធ្នាប់និងភាពទាក់ទាញលើផ្លូវដែលតែងមានភ្ញៀវទេសចរជាតិ និងអន្ដរជាតិឆ្លងកាត់ជាប្រចាំ។
ករណីនេះត្រូវបានលោក ឃឹម ហ្វីណង់ ពន្យល់ថា៖« ប្រជាពលរដ្ឋនៅទីនេះបានមកលក់ដូរច្រើនទៅៗចាប់ពីមានរង្វង់មូលធំ បង្កឱ្យមានភាពរញ៉េរញ៉ៃអត់សណ្ដាប់ធ្នាប់ ក្លាយជាជង្រុកចោលសំរាមពាសវាសពាសកាល នៅលើផ្លូវហាយវេដែលតែងតែមានរថយន្តឆ្លងកាត់ល្បឿនលឿនខ្លាំង ដោយមិនគ្រាន់បង្កផលប៉ះពាល់ទៅដល់សណ្ដាប់ធ្នាប់សាធារណៈនិងមុខមាត់ស្រុកទេសចរណ៍ប៉ុណ្ណោះទេ ថែមទាំងបង្កឱ្យមានហានិភ័យយ៉ាងខ្លាំងទៅលើសុវត្ថិភាពអ្នកដំណើរផង សុវត្ថិភាពរបស់ពួកគាត់ផង ជាពិសេសនៅពេលដែលភាពអនាធិបតេយ្យនេះចេះតែកើនឡើងៗពីមួយឆ្នាំទៅមួយឆ្នាំ ពី៤-៥តូប រហូតជាង២០តូប ដូចដែលបានឃើញក្នុងពេលបច្ចុប្បន្ននេះ»។
យ៉ាងណាក៏ដោយ រដ្ឋបាលស្រុកបន្ទាយស្រីមិនភ្លេចអរគុណដល់ប្រជាពលរដ្ឋដែលព្រមសហការរុះរើសំណង់តូបទាំងនោះដោយសន្ដិវិធី ដែលឥរិយាបថនេះត្រូវបានថ្នាក់ដឹកស្រុកបន្ទាយស្រីយល់ថា បានឆ្លុះបញ្ចាំងពីការផ្លាស់ប្ដូរផ្នត់គំនិត និងយល់តម្លៃលើផលប្រយោជន៍រួមលើសពីប្រយោជន៍របស់បុគ្គល៕
Tag:
បន្ទាយស្រី
សំណង់អនាធិបតេយ្យ
© រក្សាសិទ្ធិដោយ thmeythmey.com
