លោក គីម នីដូ ប្រមូលសំរាមតាមផ្សារនៅភ្នំពេញ ទៅធ្វើជាជីកំប៉ុស និងជីអាចម៍ជន្លេន

ជាតិ

សេដ្ឋកិច្ច

លោក គីម នីដូ ប្រមូលសំរាមតាមផ្សារនៅភ្នំពេញ ទៅធ្វើជាជីកំប៉ុស និងជីអាចម៍ជន្លេន

24, May 2020 , 9:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ជារៀងរាល់ថ្ងៃ លោក គីម នីដូ តែងតែប្រមូលសំណល់សរីរាង្គប្រមាណ ៣០ ទៅ៤៥តោន ពីតាមបណ្តាផ្សានានា នៅក្នុងរាជធានីភ្នំពេញ ដើម្បីយកទៅកែច្នៃទៅជាជីកំប៉ុស និងជីអាចម៍ជន្លេន។ លោក គីម នីដូ ជាស្ថាបនិក និងជានាយកប្រតិបត្តិក្រុមហ៊ុន Twin Agri Tech បានឲ្យដឹងថា សំណល់សរីរាង្គដែលក្រុមហ៊ុនលោកត្រូវការមានដូចជា បន្លែ ផ្លែឈើ កាកអំពៅ សំបកដូង កំទេចរណារសម្រាប់បណ្តុះផ្សិត និងសំណល់ផ្ទះបាយជាដើម។ សម្រាប់លោក គីម នីដូ ការប្រមូលសំរាមសរីរាង្គទៅកែច្នៃនេះ មិនត្រឹមតែជួយដល់វិស័យកសិកម្មនោះទេ ប៉ុន្តែថែមទាំងជួយដល់បរិស្ថានផងដែរ។

រយៈពេល៨ឆ្នាំហើយ ដែលក្រុមហ៊ុន Twin Agri Tech របស់លោក គីម នីដូ ធ្វើការងារលើការប្រមូលសំរាម នៅតាមផ្សារនានាក្នុងរាជធានីភ្នំពេញ ច្នៃទៅជាជីកំប៉ុស និងជីអាចម៍ជន្លេន។ បច្ចុប្បន្នក្រុមហ៊ុននេះ មានលទ្ធភាពប្រមូលសំរាមតាមផ្សារ បានពី៣០ ទៅ៤៥តោន ក្នុងមួយថ្ងៃ ពីផ្សារដើមគរ ផ្សារអូរឬស្សី ផ្សារជម្ពូរវ័ន និងផ្សារនានាជុំវិញភ្នំពេញ។ ក្រៅពីនោះ គឺសំរាមដែលប្រមូលនៅតាមរោងចក្រកែច្នៃម្ហូបអាហារ និងតាមកសិដ្ឋានមួយចំនួន។ សំរាមទាំងនោះ មានដូចជាបន្លែ ផ្លែឈើ កាកអំពៅ សំបកដូង កំទេចរណារសម្រាប់បណ្តុះផ្សិត និងកាកសំណល់ផ្ទះបាយជាដើម។

លោក គីម នីដូ បញ្ជាក់ប្រាប់សារព័ត៌មានថ្មីៗ(ThmeyThmey) ថា គោលដៅដែលលោកបង្កើតក្រុមហ៊ុននេះឡើង គឺដើម្បីលើកស្ទួយវិស័យកសិកម្មនៅកម្ពុជា ពិសេសលើផ្នែកដាំដុះ ដោយធ្វើយ៉ាងណា ឱ្យជីកសិកម្មក្នុងស្រុកមានតម្លៃថោក តែមានគុណភាព។ ក្រៅពីនេះ លោក នីដូ ក៏ផ្តោតសំខាន់ខ្លាំង លើផ្នែកបរិស្ថានដែរ ដោយបុរសមាឌមាំសម្បុរស្រអែមរូបនេះ ចង់ជួយសម្អាតបរិស្ថាននៅកម្ពុជា ពិសេសកែប្រែភ្នំពេញឱ្យក្លាយទៅជារាជធានីគ្មានសំរាម។ «ថ្ងៃក្រោយបើខ្ញុំមានសមត្ថភាព ខ្ញុំចង់ប្រមូលសំរាមសរីរាង្គនៅក្នុងរាជធានីឱ្យអស់ និងឱ្យស្អាតតែម្តង។ ព្រោះភ្នំពេញ គឺជាបេះដូងរបស់យើង ជាខួរក្បាលរបស់យើង។ ប៉ុន្តែបើមានក្រុមហ៊ុនណាចង់ធ្វើការងារនេះដែរ យើងរីករាយនឹងចែករំលែកបទពិសោធន៍ដែលយើងមាន ដើម្បីឱ្យភ្នំពេញក្លាយជារាជធានីគំរូដែលពោរពេញទៅដោយបរិស្ថានស្អាត»។ នេះជាមហិច្ឆតា ដែលជំរុញឲ្យលោក គីម នីដូ បន្តកិច្ចការនេះអស់រយៈពេល៨ឆ្នាំមកនេះ។

លោក គីម នីដូ ស្ថាបនិកក្រុមហ៊ុន Twin Agri Tech។

សម្រាប់រដូវវស្សាក្រុមហ៊ុននេះ អាចផលិតទាំងជីកំប៉ុស និងជីអាចន៍ជន្លេនដែលកែច្នៃចេញពីសំរាមសរីរាង្គ ទាំងនោះបានពី៣០០ ទៅ៥០០តោន ក្នុងមួយខែ។ ដោយឡែករដូវប្រាំង ក្រុមហ៊ុន អាចផលិតជីបានរហូតដល់១,០០០តោន ក្នុងមួយខែ។ នេះបើតាមលោក គីម នីដូ ដោយបានអះអាងថា៖«ជីទាំងនេះ ក្រុមហ៊ុនផលិតមិនទាន់នឹងតម្រូវទីផ្សារផង ព្រោះបច្ចុប្បន្ន អតិថិជន មានការយល់ដឹង ពីអត្ថប្រយោជន៍នៃជីធម្មជាតិ ហើយនាំគ្នាបញ្ជាទិញច្រើនជាងមុន»។

ជីដែលកែច្នៃពីសំរាមសរីរាង្គ របស់ក្រុមហ៊ុន Twin Agri Tech មិនត្រឹមមានគុណភាពទេ ថែមទាំងមានតម្លៃថោក ជាងជីគីមីនាំចូលពីរបរទេស ជាងពាក់កណ្តាល ដោយជីកំប៉ុស មានតម្លៃ១២៥ដុល្លារក្នុងមួយតោន និងជីអាចម៍ជន្លេន មានតម្លៃ១៥៥ដុល្លារ ក្នុងមួយតោន។ បើធៀបនឹងជីគីមី (ជីអ៊ុយរ៉េ) ដែលកសិករប្រើប្រាស់លើដំណាំទូទៅ មានតម្លៃជិត៣០០ដុល្លារ ឬលើសពីនេះ ក្នុងមួយតោន។

លោក គីម នីដូ បាននិយាយដូច្នេះ៖«ជីដែលយើងកែច្នៃពីសំរាមសរីរាង្គនេះ យើងកាន់តែប្រើដំណាំយើងកាន់តែល្អ។ ជីនេះ មិនត្រឹមជួយកែប្រែដីពីខូច ទៅជាដីមានគុណភាពវិញនោះ គឺថែមទាំជួយរក្សាដីឱ្យមានសំណើម ឆ្លើយតបនឹងការកើនឡើងកម្តៅផែនដីផងដែរ។ បើ(ជី)គីមីវិញ យើងកាន់តែប្រើច្រើន ធ្វើឱ្យដីយើងហឹល គ្មានគុណភាព ដាំអ្វីលែងបាន និងបំពុលដល់បរិស្ថានទៀត»។

ថ្វីដ្បិតក្រុមហ៊ុននេះ អាចប្រមូលសំរាមសរីរាង្គបានជិត៥០តោនក្នុងមួយថ្ងៃ ប៉ុន្តែបរិមាណនេះ គឺនៅមានទំហំតិចតួចខ្លាំងនៅឡើយ បើធៀបនឹងកាកសំណល់សរីរាង្គសរុប។ គ្រាន់តែផ្សារដើមគរតែមួយ មានសំរាមសរីរាង្គ ប្រមាណ៤០តោនទៅហើយ។ នេះបើតាម លោក នីដូ ដោយបានបញ្ជាក់ដូច្នេះ៖«បច្ចុប្បន្នសម្រាប់នៅផ្សារដើមគរ យើងប្រមូលសំរាមសរីរាង្គបានត្រឹម៧ ទៅ៨តោនទេ ក្នុងមួយថ្ងៃ។ បើធៀបនឹងចំនួនសំរាមសរីរាង្គសរុបនោះ គឺតិចតួចមែនទែន។ នេះអនាគតក្រុមហ៊ុនTwin Agri Tech នឹងប្រមូលយកសំរាមសរីរាង្គ ក្នុងផ្សារនោះទាំងអស់ ដោយសហការជាមួយអាជ្ញាធរដែនដី ក្រុមហ៊ុនស៊ីនទ្រី និងក្រសួងបរិស្ថាន»។

បច្ចុប្បន្ន រាជធានីភ្នំពេញ មានសំរាមចន្លោះពី២,៧០០ ទៅ៣,០០០តោន ក្នុងមួយថ្ងៃ។ ក្នុងចំណោមសំរាមសរុបនេះ មាន៦០ ទៅ៦៥ភាគរយ ជាសំរាមសរីរាង្គ, ពី១៥ទៅ២០ភាគរយ ជាសំរាមប្លាស្ទិក និងសល់ប្រហែល២០ភាគរយ ជាសំរាមកែច្នៃ សំណល់រឹង និងសំណល់ឧស្សាហកម្មផ្សេងៗ៕