អន្តរជាតិ
វ័យ៩០ឆ្នាំ លោកយាយ Hamako Mori ជាកំពូលអ្នកលេងហ្គេមតាម Youtube ដ៏ខ្លាំងម្នាក់
×![]()
ដោយ: ធីតា
«Gamer Grandma» ជារហស្សនាមរបស់ស្ត្រីជប៉ុនឈ្មោះ Hamako Mori។ ឈានដល់វ័យ៩០ឆ្នាំ លោកយាយត្រូវបានកត់ឈ្មោះចូលក្នុងសៀវភៅកំណត់ត្រាពិភពលោក Guinness World Records សម្រាប់តំណែងអ្នកលេងហ្គេមតាម Youtube ដែមានវ័យចំណាស់ជាងគេលើពិភពលោក។
ចាប់តាំងពីឆ្នាំ២០១៥ មក លោកយាយ Mori មានឈ្មោះដ៏ល្បីល្បាញតាមរយៈបណ្តាញសង្គម Youtube តាមរយៈការបង្ហោះថ្វីដៃលេងហ្គេមដ៏ស្ទាត់ជំនាញរបស់ខ្លួន។ បច្ចុប្បន្ន Youtube ដែលប្រើឈ្មោះថា «Gamer Grandma» មានអ្នកតាមដានជាប្រចាំជាង២៩០ ០០០ ។ តាម Youtube លោកយាយ Mori មិនត្រឹមតែបង្ហាញសកម្មភាពក្នុងហ្គេមនោះឡើយ ប៉ុន្តែគាត់ក៏អត្ថាធិប្បាយបែប vlogs ដូចជាយុវជនសម័យទំនើបផងដែរ។
តាមពិតទៅលោកយាយជនជាតិជប៉ុនរូបនេះ បានជក់លេងហ្គេមអស់រយៈពេលជិត៤០ឆ្នាំហើយ ដោយសារតែគាត់ចូលចិត្តភាពរហ័សរហួន។ លោកយាយបានលើកឡើងថា៖ «ការរស់នៅអាយុវែង ខ្ញុំក៏គិតផងដែរថា ការលេងហ្គេមគឺជាជម្រើសដ៏ល្អមួយ។ ខ្ញុំមានជីវិតរីករាយដូចនៅក្មេងអ៊ីចឹងដែរ»។
លោកយាយ Mori បានចាប់ផ្តើមលេងហ្គេម Epoch Casette Vision ដែលចេញលើកដំបូងនៅជប៉ុន កាលពីថ្ងៃទី៣០ ខែកក្កដា ឆ្នាំ១៩៨១។ លោកយាយមិនចូលចិត្តលេងហ្គេមបែបកុមារឡើយ ដោយហ្គេមដែលលោកយាយលេងនោះជាហ្គេមបែបវាយប្រហារ ដូចជា Dauntless និង Grand Theft Auto ជាដើម។
កំពូលអ្នកលេងហ្គេមចំណាស់ជនជាតិជប៉ុនរូបនេះ បានថ្លែងប្រាប់ CNN ថា ពេលខ្លះលោកយាយលេងហ្គេមរហូតដល់ម៉ោង២ទៀបភ្លឺ ហើយជាទូទៅលោកយាយបង្ហោះ៤វីដេអូនៅលើ Youtube របស់ខ្លួនជារៀងរាល់ខែ៕
Tag:
ហ្គេមអនឡាញ
Guinness World Records
© រក្សាសិទ្ធិដោយ thmeythmey.com
