រថយន្ត
អន្តរជាតិ
ទោះខាតរាប់រយលានដុល្លារលើគម្រោងរថយន្តអគ្គិសនី តែ Sir James Dyson នៅតែមានជាងគេនៅអង់គ្លេស
×![]()
ដោយ: ធីតា
មហាសេដ្ឋីអង់គ្លេស Sir James Dyson ស្ថាបនិកក្រុមហ៊ុន Dyson Ltd. បានអះអាងថា លោកបានខាតបង់លុយផ្ទាល់ខ្លួនអស់៥០០លានផោន (ជាង៦០០លានដុល្លារអាមេរិក) លើការបោះបង់ចោលគម្រោងរថយន្តអគ្គិសនី។ ប៉ុន្តែទោះបីជាយ៉ាងណាក៏ដោយ អ្នកជំនួញ អ្នករចនា និងកំពូលអ្នកច្នៃប្រឌិតបច្ចេកវិទ្យាវ័យ៧៣ឆ្នាំរូបនេះ នៅតែឈរលើកំពូលតរាងអ្នកមានជាងគេនៅអង់គ្លេស ដែលកំណត់ចំណាត់ថ្នាកដោយសារព័ត៌មាន Sunday Times។
Sir James Dyson បានជួលបុគ្គលិក៥០០នាក់ ជាមួយនឹងការវិនិយោគ២.៥ពាន់លានផោន (ជាង៣ពាន់លានដុល្លារអាមេរិក) លើការអភិវឌ្ឍបច្ចេកវិទ្យា ជាពិសេសគម្រោងរថយន្តអគ្គិសនី។ ចាប់ផ្តើមនៅឆ្នាំ២០១៤ តែលោកបានដកថយគម្រោងការ កាលពីខែតុលា ឆ្នាំ២០១៩ ដោយលោកគិតថា ទស្សនវិស័យពង្រីកសក្តានុពលរថយន្តអគ្គិសនីនៅឆ្នាំ២០២១ នឹងត្រូវជួបឧបសគ្គច្រើន។
ទោះបីជាយ៉ាងណាក៏ដោយ Sir James Dyson និងក្រុមគ្រួសារនៅតែស្ថិតក្នុងបញ្ជីនាំមុខគេលើតារាង Sunday Times Rich List ប្រចាំឆ្នាំ២០២០ ជាមួយនឹងទ្រព្យសម្បត្តិប្រម៉ាណ ១៦.២ពាន់លានផោន (ជិត២០ពាន់លានដុល្លារអាមេរិក) ដោយមានកំណើនជាង៤ពាន់លានដុល្លារ បើប្រៀបធៀបកាលពីឆ្នាំ២០១៩។
ថ្លែងប្រាប់ Sunday Times លោក Dyson បានបញ្ជាក់ថា ការបោះបង់ចោលគម្រោងគឺជារឿងមួយដ៏សោកស្តាយ ដោយបន្ថែមថា ជីវិតមិនមានភាពងាយស្រួលនោះឡើយ ពោលគឺត្រូវប្រឈមគ្រោះថ្នាក់គ្រប់ពេល។
ក្នុងបញ្ជី Rich List នោះដែរ អតីតកីឡាករ F1 Bernie Ecclestone ស្ថិតនៅចំណាត់ថ្នាក់លេខ៥៦ ដោយមានទ្រព្យសម្បតិ្ត ២.៥ពាន់លានផោន។ អតីតប្រធានក្រុម McLaren លោក Ron Dennis ស្ថិតនៅលេខ៣០០ (៤៤៥លានផោន) ខណៈប្រធានក្រុម Mercedes-AMG លោក Toto Wolff និងភរិយា ស្ថិតនៅលេខ៣៦៩ (៣៥៥លានផោន)។
ម្ចាស់ការពារតំណែងជើងឯក F1 Lewis Hamilton ស្ថិតនៅចំណាត់ថ្នាក់ខ្ពស់ជាងគេក្នុងចំណោមកីឡាករអាជីពនៅអង់គ្លេស ដោយមានទ្រព្យសម្បត្តិប្រមាណ២២៤លានផោន៕
© រក្សាសិទ្ធិដោយ thmeythmey.com
