ជាតិ
សេដ្ឋកិច្ច
រូបភាព ផ្តល់ដោយCSX
×![]()
ភ្នំពេញ៖ អេស៊ីលីដា(ACLEDA Bank Plc) ជាក្រុមហ៊ុនទី៦ និងជាធនាគារពាណិជ្ជដំបូងគេ ដែលបានចុះបញ្ជី និងបោះផ្សាយលក់មូលបត្រកម្មសិទ្ធ ឬភាគហ៊ុននៅក្រុមហ៊ុនផ្សារមូលបត្រកម្ពុជា(CSX)។ ធនាគារនេះ បានរួមចំណែកអភិវឌ្ឍវិស័យមូលធននៅកម្ពុជា តាមរយៈការកៀរគរប្រភពហិរញ្ញវត្ថុនានា ពីសំណាក់អ្នកវិនិយោគក្នុងនិងក្រៅស្រុក ខណៈមានវិនិយោគិនចំនួន២,៤៩៧នាក់ បានធ្វើបរិវិសកម្ម(ទិញ)ភាគហ៊ុនរបស់ធនាគារនេះ។
បើតាមលោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ក្នុងចំណោមអ្នកទិញភាគហ៊ុនរបស់ធនាគារអេស៊ីលីដាជិត២,៥០០នាក់នេះ មាន៩៥,៦ភាគរយ ជាអ្នកវិនិយោគក្នុងស្រុក។ ក្នុងពិធីចុះបញ្ជី និងដំណើរការជាផ្លូវការនៃការជួញដូរភាគហ៊ុនរបស់ធនាគារ នៅCSX នាព្រឹកថ្ងៃទី២៥ឧសភា ឆ្នាំ២០២០ លោក អ៊ិន ចាន់នី បាននិយាយថា ការបោះផ្សាយលក់ភាគហ៊ុនជាសាធារណៈរបស់ធនាគារអេស៊ីលីដា បានទាក់ទាញវិនិយោគិនរូបវន្តបុគ្គលសញ្ជាតិខ្មែរជាច្រើន ចូលរួមវិនិយោគនៅក្នុងក្រុមហ៊ុនផ្សារមូលបត្រកម្ពុជា នឹងបន្តរួមចំណែកអភិវឌ្ឍផ្សារមូលធនកម្ពុជា។
ការចូលផ្សារភាគហ៊ុនរបស់ធនាគារអេស៊ីលីដា គឺដើម្បីធ្វើពិពិធកម្មប្រភពទុនដែលមានសំបូរបែបក្នុងការវិនិយោគ។ នេះជាការលើកឡើងរបស់លោក អ៊ិន ចាន់នី ដោយបានបន្តថា ប្រភពទុនវិនិយោគរបស់អេស៊ីលីដាកន្លងមក គឺបានពីការពឹងផ្អែកលើភាគហ៊ុនិកជាយុទ្ធសាស្ត្រ បានពីការដាក់បញ្ញើសន្សំប្រាក់ពីអតិថិជន ក្នុងស្រុក និងពឹងផ្អែកពីកម្ចីបរទេស។ លោកបាននិយាយដូច្នេះ៖«អ្វីដែលយើងបើកទំព័រថ្មីនៅថ្ងៃនេះ(២៥ឧសភា) គឺដើម្បីឱ្យធនាគារអេស៊ីលីដាហ្នឹង អាចប្រើប្រាស់ប្រភពទុនវិនិយោគពីវិនិយោគិនសាធារណៈទាំងអស់ដែលចង់វិនិយោគជាមួយធនាគារយើង តាមរយៈផ្សារហ៊ុនរបស់កម្ពុជា គឺCSXនេះ»។
លោក អ៊ិន ចាន់នី បានបញ្ជាក់ថា៖«ការវិនិយោគលើវិស័យមូលបត្រនេះ គឺជារឿងសំខាន់ ដែលសេដ្ឋកិច្ចជាតិមួយដែលមានការលូតលាស់ និងរីកចម្រើន។ កន្លងមកយើងពឹងផ្អែកលើប្រភពទុនបរទេស តែសព្វថ្ងៃនេះយើងពឹងផ្អែកទៅលើប្រភពទុនដែលមាននៅក្នុងស្រុក ដែលមានរយៈពេលយូរអង្វែង[តាមរយៈវិស័យមូលបត្រ]»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា កំពុងផ្តល់បទសម្ភាសឱ្យក្រុមអ្នកសារព័ត៌មាន។រូបថត៖ CSX
ជាមួយគ្នានេះ លោក ហុង សុហួរ អគ្គនាយកក្រុមហ៊ុនមូលបត្រកម្ពុជា(CSX) បានលើកឡើងថា ការចុះបញ្ជីនិងបោះផ្សាយលក់ភាគហ៊ុនជាសាធារណៈរបស់ធនាគារអេស៊ីលីដានេះ បានធ្វើជាគំរូដ៏ល្អរបស់គ្រឹះស្ថានហិរញ្ញវត្ថុ និងធនាគារជាច្រើនទៀត នៃភាពរីកចម្រើនក្នុងវិស័យមូលធនកម្ពុជា។ លោកបានអះអាងថា វិស័យមូលបត្រ និងវិស័យវិស័យធនាគារ គឺជាវិស័យដែលបំពេញឱ្យគ្នាទៅវិញទៅមក។
លោក ហុង សុហួរ បាននិយាយយ៉ាងដូច្នេះ៖«នៅពេលណាដែលពួកគាត់[វិនិយោគិន] អាចប្រើប្រាស់ប្រភពទុននៅលើទីផ្សារមូលបត្របាន មានន័យថាបង្កើនដើមជាភាគហ៊ុនធំជាងមុន គឺពួកគាត់ទៅខ្ចីលុយពីធនាគារ ក៏បានងាយជាងមុន និងបានកាន់តែច្រើនជាងមុន ហើយការប្រាក់អាចបានទាបជាងមុន ផងដែរ»។ គិតត្រឹមថ្ងៃទី២៥ឧសភានេះ មានក្រុមហ៊ុនចំនួន១២ បានចុះបញ្ជីក្នុងផ្សារមូលបត្រកម្ពុជា។ ក្នុងនោះមានក្រុមហ៊ុនចុះបញ្ជីលក់ភាគហ៊ុន៦ និងក្រុមហ៊ុនលក់មូលបត្របំណុលចំនួន៦។ បើតាមលោក ហុង សុហួរ ក្រុមហ៊ុនទាំង១២នេះ បានប្រមូលទុនពីទីផ្សារមូលបត្រកម្ពុជា ប្រមាណជា២៤០លានដុល្លារ។
លោក ហុង សុហួរ អគ្គនាយកក្រុមហ៊ុនមូលបត្រកម្ពុជា(CSX) កំពុងផ្តល់បទសម្ភាសឱ្យក្រុមអ្នកសារព័ត៌មាន។ រូបថត៖CSX។
ចំពោះការចុះបញ្ជីបោះផ្សាយលក់ភាគហ៊ុនសរុបមានជាង៤៣៣លានហ៊ុន របស់ធនាគារអេស៊ីលីដាដែលតម្លៃ១៦,២០០រៀលក្នុងមួយឯកតា និងមានមូលធននីយកម្មទីផ្សារប្រមាណ១,៧៥ពាន់ដុល្លារនោះ មិនត្រឹមជាគំរូរបស់គ្រឹះស្ថានហិរញ្ញវត្ថុ និងធនាគារនៅកម្ពុជានោះទេ តែវាការជំរុញដល់ស្ថានហិរញ្ញវត្ថុទាំងនេះ ចូលក្នុងការប្រមូលទុនពីផ្សារមូលបត្រឱ្យកាន់តែជឿជាក់ ក្នុងការចាប់យកឱកាសកៀរគរទុនសម្រាប់ការរីកចម្រើនអាជីវកម្មរបស់ខ្លួន។ នេះជាការលើកឡើងរបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលជាគណៈអធិបតីភាពនៃការចុះបញ្ជីជាផ្លូវរបស់ធនាគារអេស៊ីលីដា។
លោក បានបន្តថា ផ្សារមូលបត្រកម្ពុជា កំពុងក្លាយជាច្រកហិរញ្ញប្បទានមួយសម្រាប់ក្រុមហ៊ុន និងសហគ្រាសដែលត្រូវការទុនវិនិយោគសម្រាប់ជួយគាំទ្រដល់ការរីកចម្រើនវិស័យឯកជន និងក៏កំពុងផ្តល់បរិយាកាសដែលអំណោយផលល្អ ដល់អ្នកចូលរួមទីផ្សារទាំងឡាយ ក្នុងការជំរុញឱ្យសេដ្ឋកិច្ចជាតិកាន់តែរីកចម្រើន៕
Tag:
ភាគហ៊ុន
CSX
SECC
ACLEDA
© រក្សាសិទ្ធិដោយ thmeythmey.com
