អន្តរជាតិ
ចិននិងអាមេរិក ព្រមានគ្នាទៅមកទៅវិញពាក់ព័ន្ធសេចក្ដីស្នើច្បាប់សន្តិសុខជាតិនៅហុងកុង
បាតុករហុងកុងលើកទង់ជាតិអាមេរិកអំឡុងពេលបាតុកម្មមួយ។ រូបភាព AFP
×![]()
ដោយ: តន ចាន់រិទ្ធារ៉ា
សេចក្ដីស្នើច្បាប់សន្តិសុខជាតិសម្រាប់ទីក្រុងហុងកុង ក្លាយជាកម្មវត្ថុថ្មីមួយទៀតដែលនាំឲ្យអាមេរិក និងចិនទាស់សម្ដីគ្នា បន្ថែមពីលើវិបត្តិ COVID-19 ដែលជាប្រធានបទក្ដៅបច្ចុប្បន្ន។ ទីប្រឹក្សាលោក ដូណាល់ ត្រាំ បានព្រមានបញ្ចប់ឋានៈពិសេសរបស់ទីក្រុងហុងកុងក្នុងបញ្ជីដៃគូពាណិជ្ជកម្មអាមេរិក បើប៉េកាំងចេញច្បាប់បែបនេះមែន។ ជាការឆ្លើយតប ក្រសួងការបរទេសចិនអះអាងថា ចិននឹងវាយបកវិញបើផលប្រយោជន៍ខ្លួនរងការបំពាន។
គ្រាន់តែសេចក្ដីសម្រេចមួយដែលបើកផ្លូវដល់ការបង្កើតច្បាប់សន្តិសុខជាតិសម្រាប់ការអនុវត្តនៅហុងកុងចូលដល់ដៃសភាប្រជាជនចិន អាមេរិក ក៏ចាប់ផ្ដើមនិយាយវាយប្រហាររដ្ឋាភិបាលប៉េកាំងមិនសំចៃមាត់។ នៅថ្ងៃទី២២ ខែឧសភា រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានហៅគម្រោងរបស់ចិន ជាការសម្លាប់ស្វ័យភាពកម្រិតខ្ពស់ដែលប៉េកាំងសន្យាផ្ដល់ឲ្យហុងកុងពេលទទួលយកដែនដីនេះពីអង់គ្លេសនៅឆ្នាំ១៩៩៧ ។
ដល់ថ្ងៃទី២៤ ខែឧសភា លោក Robert O'Brien ទីប្រឹក្សាសន្តិសុខជាតិនៃសេតវិមានប្រធានាធិបតី ដូណាល់ ត្រាំ ក៏បន្តវាយប្រហារចិនធ្ងន់ៗ ហើយគំរាមចាត់វិធានការទៅទៀត បើចិនបន្តគម្រោងរបស់ខ្លួន។ ក្នុងកិច្ចសម្ភាសក្នុងកម្មវិធី Face the Nation របស់ទូរទស្សន៍ CBS លោក O'Brien និយាយថា ចិនកំពុងបំពានសន្ធិសញ្ញាឆ្នាំ១៩៨៤ ដែលក្នុងនោះខ្លួនសន្យារក្សាសេរីភាព និងសិទ្ធិស្វ័យភាពរបស់ហុងកុង។
«ខ្ញុំមើលមិនឃើញថា ហុងកុងនឹងនៅតែជាមជ្ឈមណ្ឌលហិរញ្ញវត្ថុរបស់អាស៊ីឡើយ ប្រសិនបើបក្សកុម្មុយនីស្តចិនបន្តអនុវត្តច្បាប់សន្តិសុខជាតិ ហើយក្ដោបក្ដាប់ហុងកុង។» នេះជាការព្រមានរបស់ទីប្រឹក្សាលោក ត្រាំ ក្នុងន័យគំរាមដកឋានៈដៃគូពាណិជ្ជកម្មពិសេសពីហុងកុង។
ទីក្រុងប៉េកាំង បង្ហាញការមិនសប្បាយចិត្តយ៉ាងខ្លាំងនឹងការលើកឡើងរបស់មន្ត្រីសេតវិមាន។ អ្នកនាំពាក្យក្រសួងការបរទេសចិន Zhao Lijian និយាយថា ចិនបានដាក់លិខិតតវ៉ាទៅកាន់អាមេរិកចំពោះការលើកឡើងរបស់លោក O'Brien ពាក់ព័ន្ធស្ថានការណ៍ក្រុងហុងកុង។ លោក Zhao ថែមទាំងចោទវ៉ាស៊ីនតោនថា កំពុងព្យាយាមបង្កបញ្ហាដល់សន្តិសុខចិនផងដែរ។
ក្នុងសន្និសីទសារព័ត៌មានថ្ងៃទី២៥ ខែឧសភា មន្ត្រីក្រសួងការបរទេចិនដដែលនេះ ក៏ព្រមានអាមេរិកវិញថា ចិននឹងចាត់វិធានការតបវិញមិនខាន បើអាមេរិកប៉ះពាល់ប្រយោជន៍ចិនដោយសារបញ្ហាហុងកុងនោះ។
បាតុកម្មបានផ្ទុះនៅចុងសប្ដាហ៍មុននេះ ដោយមានការចូលរួមពីមនុស្សរាប់ពាន់នាក់។ យ៉ាងណាមិញ ទីក្រុងប៉េកាំង តាំងចិត្តរួចហើយពីការបង្កើតច្បាប់សន្តិសុខជាតិដែលអនុវត្តនៅហុងកុង ហើយដែលស្របតាមមាត្រា២៣ នៃច្បាប់មូលដ្ឋានហុងកុងផងនោះ។ រដ្ឋមន្ត្រីការបរទេសចិន វ៉ាង យី ក្នុងសន្និសីទសារព័ត៌មានថ្ងៃទី២៤ ខែឧសភា អះអាងថា ចិននឹងមិនពន្យារពេលអនុម័តសេចក្ដីព្រាងច្បាប់មួយនេះឡើយ ព្រោះសន្តិសុខនៅហុងកុងកំពុងជួបបញ្ហា៕
Tag:
អាមេរិក
ចិន
ហុងកុង
© រក្សាសិទ្ធិដោយ thmeythmey.com
