កីឡាជាតិ
ជាតិ
តើហាត់ប្រាណ ឬលេងកីឡាយ៉ាងដូចម្តេច ដើម្បីកុំឲ្យប៉ះពាល់ដល់សុខភាព និងអាយុជីវិត?
លោកវេជ្ជបណ្ឌិត ស្តើង ជា ប្រធានគណៈកម្មការវេជ្ជសាស្ត្រកីឡាកម្ពុជាពេលផ្តល់បទសម្ភាសដល់សារព័ត៌មានថ្មីៗ
×![]()
យើងសង្កេតឃើញថា បច្ចុប្បន្នប្រជាពលរដ្ឋកម្ពុជា មានការយល់ដឹងច្រើនពីបញ្ហាសុខភាព ដោយពួកគេបាននាំគ្នាហាត់ប្រាណ និងលេងកីឡាក្រោមទម្រង់ផ្សេងៗ។ ប៉ុន្តែអ្វីដែលគួរឲ្យកត់សម្គាល់ពួកគេភាគច្រើនអនុវត្តពុំទាន់ស្របតាមវិធីសាស្ត្រ ឬក្បួនខ្នាតវិទ្យាសាស្ត្រកីឡានៅឡើយទេ។ តើហាត់ប្រាណ ឬលេងកីឡាយ៉ាងដូចម្តេច ដើម្បីកុំឲ្យប៉ះពាល់សុខភាព និងអាយុជីវិត? 
លោកវេជ្ជបណ្ឌិត ស្តើង ជា ប្រធានគណៈកម្មការវេជ្ជសាស្ត្រកីឡាកម្ពុជាអមគណៈកម្មាធិការជាតិអូឡាំពិកកម្ពុជាបានលើកឡើងថា ដើម្បីកុំឲ្យមានហានិភ័យខ្ពស់កើតឡើងក្នុងការហាត់ប្រាណ និងលេងកីឡា ទាំងអ្នកហាត់ប្រាណ និងកីឡាករត្រូវធ្វើចលនាកម្តៅសាច់ដុំ(Warm Up) និងសម្រួលសាច់ដុំ មុននិងក្រោយហាត់ប្រាណ និងលេងកីឡា។
បើតាមលោកវេជ្ជបណ្ឌិតរូបនេះ អ្នកមានបញ្ហាសុខភាព ឬអ្នកមានជំងឺរ៉ាំរ៉ៃក៏អាចហាត់ប្រាណ ឬលេងកីឡាបានដែរ។ ប៉ុន្តែដើម្បីបញ្ចៀសនូវហានិភ័យ លោកវេជ្ជបណ្ឌិតបានផ្តល់ដំបូន្មានថា អ្នកមានបញ្ហាសុខភាពឬមានជំងឺរ៉ាំរ៉ៃត្រូវទៅរកសេវាពិគ្រោះជាមួយអ្នកជំនាញ ឬវេជ្ជបណ្ឌិត មុនសម្រេចចិត្តហាត់ប្រាណ ឬលេងកីឡា។
«ជាទូទៅអ្នកមានបញ្ហាសុខភាព និងអ្នកឈឺរ៉ាំរ៉ៃអាចលេងកីឡាបានដូចគ្នា។ ប៉ុន្តែយើងត្រូវលេងយ៉ាងដូចម្តេច? ចំពោះអ្នកមានសុខភាពល្អការលេងត្រូវតាមក្បួនវិទ្យាសាស្ត្រកីឡា គឺយើងមុននឹងចូលលេងត្រូវកម្តៅសរីរាង្គ ហើយពេលបញ្ចប់ការលេងត្រូវសម្រួលសរីរាង្គឡើងវិញ។ ចំពោះអ្នកឈឺទាំងធ្ងន់ និងស្រាល អាចលេងបានទាំងអស់។ ប៉ុន្តែដើម្បីចៀសវាងហានិភ័យ អ្នកមានជំងឺគួរទៅពិគ្រោះជាមួយអ្នកជំនាញ ឬវេជ្ជបណ្ឌិត»។ លោក ស្តើង ជា បានប្រាប់ពីវិធីសាស្ត្រដូច្នេះ ក្នុងបទសម្ភាសជាមួយសារព័ត៌មានថ្មីៗនៅថ្ងៃទី២៥ ឧសភា ឆ្នាំ២០២០។
ប្រធានគណៈកម្មការវេជ្ជសាស្ត្រកីឡាកម្ពុជារូបនេះបានបន្ថែមថា ជាទូទៅការធ្វើ Warm Up ឬ Cool Down មានរយៈពេលពី៥ទៅ១០នាទី តែវាប្រែប្រួលទៅតាមប្រភេទកីឡា។ ការធ្វើចលនាកម្តៅសាច់ដុំ និងសម្រួលសាច់ដុំមុននិងក្រោយហាត់ប្រាណ ឬលេងកីឡាអាចជួយកាត់បន្ថយបញ្ហារបួស ឬរលាកសាច់ដុំ សរសៃ និងសន្លាក់បានច្រើន។ ប៉ុន្តែបើអ្នកហាត់ប្រាណ ឬលេងកីឡាមិនបានធ្វើបែបនេះ អាចប្រឈមនឹងបញ្ហារបួសស្រាល ធ្ងន់ ឬអាចបាត់បង់ជីវិតក៏ថាបាន។
លោក ស្តើង ជា បានពន្យល់យ៉ាងដូច្នេះថា៖«ការកម្តៅសាច់ដុំ គឺដើម្បីឲ្យសរីរាង្គយើងវាដឹងខ្លួន ដូចជាសាច់ដុំ សន្លាក់ និងសរសៃដឹងថា វាជិតមានការងារធ្វើហើយ និងឲ្យឈាមវារត់បានល្អ។ រីឯសម្រួលសាច់ដុំ ក៏អ៊ីចឹងដែរ គឺដើម្បីបណ្តេញឡាក់ទិកអាស៊ីតនៅក្នុងសាច់ដុំ យើងរលាកសាច់ដុំដោយសារចំហេះឡាក់ទិកអាស៊ីត ដែលនៅសល់ ហើយម្យ៉ាងទៀត ដើម្បីឲ្យឈាមវារត់ចូលមកស្មើឡើងវិញ»។
មានអ្នកហាត់ប្រាណ និងលេងកីឡាជាច្រើនរូប ដែលបានរងរបួស និងបាត់បង់អាយុជីវិតក្នុងអំឡុងពេលហាត់ប្រាណ និងលេងកីឡា។ បញ្ហានេះមិនមែនកើតមានឡើងនៅតែកម្ពុជានោះទេ សូម្បីប្រទេសជឿនលឿននៅលើពិភពលោកក៏ជួបប្រទះបញ្ហានេះដែរ។ នេះបើតាមការអះអាងរបស់លោក ស្តើង ជា ដែលបានបន្ថែមថា អ្នកបាត់បង់ជីវិតភាគច្រើនដោយសារការគាំងបេះដូង៕
Tag:
ស្តើង ជា
© រក្សាសិទ្ធិដោយ thmeythmey.com
