ពីនេះ ពីនោះ
តើមហាជននិយាយអ្វីខ្លះពីការលក់ផ្ទះស្ថាបត្យករល្បី លោក វណ្ណ ម៉ូលីវណ្ណ ក្នុងតម្លៃ៧លានដុល្លារ?
×![]()
ដោយ: ថ្មីៗ
រឿងកូវីដកាន់តែឃ្លាតឆ្ងាយពី សុធីរ និងសំណាង ហើយក្នុងរយៈពេលចុងក្រោយនេះ។ ក្លើទាំងពីរនាក់ ងាកមកចាប់អារម្មណ៍ការជជែកគ្នារបស់មហាជន ជុំវិញការដាក់លក់គេហដ្ឋានរបស់ស្ថាបត្យករល្បីលោក វណ្ណ ម៉ូលីវណ្ណ ក្នុងតម្លៃទឹកប្រាក់៧លានដុល្លារអាមេរិក។ លោក វណ្ណ ម៉ូលីវណ្ណ បានទទួលមរណភាពកាលពីឆ្នាំ២០១៧។
សំណាង៖ អា សុធីរ! អញលឺគេថា ផ្ទះរបស់លោកតា វណ្ណ ម៉ូលីវណ្ណ ត្រូវបានគេដាក់លក់៧លានដុល្លារ ព័ត៌មានហ្នឹងមែនឬទេ?
សុធីរ៖ ព័ត៌មានពិតមែនតើ!
សំណាង៖ គួរឲ្យស្តាយណាស់វើយ!
សុធីរ៖ ម៉េចបានស្តាយ?
សំណាង៖ ព្រោះវាជាស្នាដៃដែលបង្កប់ដោយតម្លៃវប្បធម៌ និងស្ថាបត្យកម្មខ្មែរ មិនអាចកាត់ថ្លៃបាន។ ចុះអ្ហែងយល់ថាម៉េច?
សុធី៖ តម្លៃវប្បធម៌ ឬស្ថាបត្យកម្មវាធំហើយ តែគ្រួសារត្រូវការថវិកាទៅហើយ។ ដូច្នេះ គ្រួសារត្រូវតែដាក់លក់។
សំណាង៖ ពេលប្រកាសដាក់លក់ដូច្នេះ តើមហាជនអត្ថាធិប្បាយយ៉ាងម៉េចខ្លះដែរ?
សុធីរ៖ អើ! អ្នកខ្លះ សម្តែងការសោកស្តាយដោយនិយាយថា គ្រួសារមិនគួរលក់ទេ ព្រោះ វាជាកេរដំណែលរបស់គ្រួសារ របស់ឪពុកម្តាយ របស់ជីដូនជីតា។ល។ អ្នកខ្លះទៀតថា រដ្ឋគួរទិញ ទុកធ្វើជាសារៈមន្ទី ជាបណ្ណាល័យ ជាអគារប្រវត្តិសាស្ត្រ ជារមណីយដ្ឋានទេសចរណ៍។ល។
សំណាង៖ តម្លៃ៧លានដុល្លារថ្លៃឬទេ អា សុធីរ?
សុធីរ៖ អ្ហែងសួរអញអ៊ីចឹង អញពិបាកឆ្លើយណាស់។ តម្លៃសរុប៧លានដុល្លារ លើទំហំដីជាង៩០០ម៉ែត្រក្រឡា។ បើគិតជាម៉ែត្រក្រឡា មានន័យថា មួយម៉ែត្រក្រឡាតម្លៃជាង៧០០០ដុល្លារ។ បើផ្អែកលើតម្លៃអចលនទ្រព្យ វាអាចមានតម្លៃថ្លៃគួរសមដែរ។ តែបើបូកបញ្ចូលតម្លៃវប្បធម៌ សិល្បៈ និងស្ថាបត្យកម្ម វាមិនថ្លៃទេ។ តម្លៃថ្លៃ ឬថោក អាស្រ័យទៅលើអ្នកទិញ។ តើគេទិញហើយ វ៉ៃផ្ទះចោលសង់ខុនដូរ ឬទិញហើយយកផ្ទះធ្វើជាសារមន្ទីរវប្បធម៌ស្ថាបត្យកម្ម ឬយ៉ាងណា?
សំណាង៖ បើតាមយោបល់របស់អ្ហែងគួរធ្វើយ៉ាងម៉េច?
សុធីរ៖ បើតាមយោបល់អញផ្ទាល់ គឺថាគ្រួសារគួរលក់ក្នុងតម្លៃថោកល្មមជូនទៅរដ្ ឋ(រាជធានីភ្នំពេញ)។ រួចមក រាជធានីភ្នំពេញ រក្សាទុកផ្ទះហ្នឹងធ្វើជាទីតាំងសារមន្ទី ឬទីតាំងទេសចរណ៍ប្រវត្តិសាស្ត្រ ឬទីតាំងអ្វីផ្សេង អាស្រ័យលើការសម្រេចរបស់រាជធានី។ បន្ទាប់មក រាជធានីភ្នំពេញ អាចលក់សំបុត្រចូលទស្សនាជូនភ្ញៀវជាតិ អន្តរជាតិ ហើយប្រាក់ចំណូលទាំងអស់ ត្រូវបង្វិលចូលរដ្ឋវិញ។ មធ្យោបាយនេះ គ្រួសារក៏ចំណេញ រាជធានីភ្នំពេញក៏ចំណេញ ពលរដ្ឋខ្មែរ បរទេស និងមនុស្សជាតិទាំងមូល ក៏ចំណេញ ពីកេរដំណែលប្រវត្តិសាស្ត្រមួយនេះដែរ៕
© រក្សាសិទ្ធិដោយ thmeythmey.com
