ភ្នំពេញ ថ្ងៃទី២២ ឧសភា ឆ្នាំ២០២០៖ ក្រុមហ៊ុនសែលកាត មានកិត្តិយសជាខ្លាំង ដែលបានក្លាយជាក្រុមហ៊ុនខ្មែរតែមួយគត់ ដែលបានជាប់នៅក្នុងបញ្ជីរបស់ទស្សនាវត្តី CIO Bulletin ជា “30 Most Valuable Companies to Watch 2020”។
តាមសេចក្តីប្រកាស ចុះផ្សាយនៅក្នុងសប្តាហ៍នេះ ដែលមានបំណងលើកកម្ពស់ដល់«ការកសាងអនាគតភ្លឺស្វាង និងភាពជោគជ័យសម្រាប់ថ្នាក់ដឹកនាំធុរកិច្ច តាមរយៈការប្រើប្រាស់ជាយុទ្ធសាស្ត្រនៃចំណេះដឹង និងជំនាញគ្រប់គ្រងផ្នែកព័ត៌មានវិទ្យា» គឺជាការឆ្លុះបញ្ចាំងឱ្យឃើញច្បាស់ នូវកិច្ចខិតខំប្រឹងប្រែង និងដំណើរវិវត្តន៍ទៅមុខ របស់ក្រុមហ៊ុនទូរគមនាគមន៍ ដែលគ្រប់គ្រងដោយជនជាតិខ្មែរទាំងស្រុងតែមួយគត់ នៅក្នុងប្រទេសកម្ពុជា។
លោក អៀន វ៉ាត់សុន Ian Watson នាយកប្រតិបត្តិក្រុមហ៊ុនសែលកាត បានមានប្រសាសន៍ថា៖«ការទទួលស្គាល់នេះ គឺជាសមិទ្ធផលដ៏អស្ចារ្យបំផុតមួយ ព្រោះថាក្រុមហ៊ុនសែលកាត តែងផ្តោតលើការកសាងកេរ្តិ៍ឈ្មោះ ក្នុងនាមជាក្រុមហ៊ុននាំមុខគេ ផ្នែកឌីជីថល នៅក្នុងប្រទេសកម្ពុជា និងជាក្រុមហ៊ុនទាន់សម័យ ផ្នែកឌីជីថលល្អបំផុតប្រចាំអាស៊ីអាគ្នេយ៍ ដែលពោរពេញទៅដោយភាពច្នៃប្រឌិតថ្មីៗ»។
នៅក្នុងខ្លឹមសារអត្ថបទ អំពីក្រុមហ៊ុនសែលកាត លោកនាយកប្រតិបត្តិ បានចូលរួមបកស្រាយនូវយុទ្ធសាស្ត្រអាជីវកម្ម និងការផ្តល់ជូននូវផលិតផលសម្បូរបែប ដើម្បីបំពេញសេចក្តីត្រូវការរបស់អតិថិជនប្រមូលផ្តុំ ដែលមានភាពស្មោះស្ម័គ្រ និងឋិតនៅក្នុងក្រុមចម្រុះគ្នា នៅក្នុងប្រទេសកម្ពុជា ។
ផលិតផលលេចធ្លោ របស់ក្រុមហ៊ុនសែលកាត រួមមាន Osja Exchange និង Big Love ដែលជាគម្រោងផ្តល់ជូនអតិថិជនយ៉ាងគាប់ចិត្ត នូវនាទីសម្រាប់ហៅចេញ និងទិន្នន័យអ៊ីនធឺណីតសម្រាប់ប្រើប្រាស់ ក្នុងតម្លៃមួយដ៏សមរម្យបំផុត។ នាពេលថ្មីៗនេះ សែលកាត ក៏បានផ្តល់ជូននូវកញ្ចប់សេវាកម្មថ្មី ដែលមានដូចជា Cellcard 4U និងកម្មវិធីលេងហ្គេមទូរស័ព្ទតាមអនឡាញ ដូចជា Orange Esports PUBG Mobile ជាដើមផងដែរ។ គម្រោងទាំងនេះ បានចូលរួមជួយប្រយុទ្ធប្រឆាំងនឹងផលប៉ះពាល់ នៃការរីករាលដាលនៃជំងឺកូវីដ-១៩ តាមរយៈការអនុញ្ញាតឱ្យបងប្អូនពលរដ្ឋខ្មែរ អាចរក្សាទំនាក់ទំនងល្អជាមួយមនុស្សជុំវិញ និងរីករាយកម្សាន្ត ដោយចំណាយក្នុងតម្លៃដ៏សមរម្យបំផុត ជាមួយបណ្តាញទូរស័ព្ទលឿនជាងគេបំផុត នៅក្នុងប្រទេសកម្ពុជា។
ដើម្បីឱ្យមានភាពរីកចម្រើន និងសម្រេចបាន នូវចក្ខុវិស័យរបស់ក្រុមហ៊ុនសែលកាត លោកWatson ក៏បានដាក់ចេញនូវផែនការ ពង្រីកវប្បធម៌នៃការបំពេញការងារ ដែលអនុញ្ញាតឱ្យមានការពិភាក្សាដោយសេរី និងប្រកបដោយផ្លែផ្កា នៅក្នុងក្រុមហ៊ុន ក៏ដូចជាការពង្រីកនូវផែនការ Personal Development Plans ជូនដល់បុគ្គលិកទាំងអស់ ដើម្បីជួយជម្រុញពួកគេឱ្យមានភាពរីកចម្រើនផ្ទាល់ខ្លួន និងដើម្បីជួយក្រុមហ៊ុន ឱ្យសម្រេចនូវការប្រើប្រាស់សក្តានុពល បានពេញលេញ។
ក្នុងនាមជាប្រតិបត្តិករទូរស័ព្ទចល័ត ឈានមុខគេនៅកម្ពុជា ក្រុមហ៊ុនសែលកាត បានទទួលពានរង្វាន់ជាច្រើន ដែលក្នុងនោះរួមមានទាំងពានរង្វាន់អន្តរជាតិ ប្រចាំតំបន់ និងក្នុងស្រុក ពីស្ថាប័នផ្សព្វផ្សាយឈានមុខគេ និងអង្គភាពឧស្សាហកម្មសកល ចំនួន ២៥ ដោយត្រូវបានទទួលស្គាល់ថា ជាបណ្តាញទូរស័ព្ទចល័តនាំមុខគេ នៅក្នុងព្រះរាជាណាចក្រកម្ពុជា។
បច្ចុប្បន្ននេះ ក្រុមហ៊ុនសែលកាត ក៏បានផ្តោតជាសំខាន់ផងដែរ ទៅលើការជំរុញឌីជីថលនីយកម្ម នៅក្នុងប្រទេសកម្ពុជា តាមរយៈការរៀបចំ ផ្តល់ជូននូវបច្ចេកវិទ្យា 5G ឱ្យបានឆាប់រហ័សនៅក្នុងឆ្នាំ២០២០ ដល់អតិថិជនគោលដៅសំខាន់ៗ ស្ថាប័នរដ្ឋាភិបាល និងវិស័យសហគ្រាស។
(អត្ថបទពាណិជ្ជកម្ម)