កញ្ចប់ថវិកាជាង២៣,២៧ពាន់លានដុល្លារថ្មីសន្លាងមួយ ត្រូវបានលើកបង្ហាញក្នុងសភាសិង្ហបុរីដោយឧបនាយករដ្ឋមន្ត្រី Heng Swee Keat នៅថ្ងៃទី២៦ ខែឧសភា។ កញ្ចប់ថវិកានេះមានគោលដៅផ្ដោតលើការបង្កើតការងារ ហើយជួយបុគ្គលិកនិងអាជីវកម្មឆ្លងកាត់គ្រាលំបាកអំឡុងពេលជំងឺរាតត្បាតសកល COVID-19 ។
ថ្លែងនៅមុខសមាជិកសភាសិង្ហបុរី លោកឧបនាយករដ្ឋមន្ត្រី Heng Swee Keat គូសបញ្ជាក់ថា កញ្ចប់ថវិកាហៅថា Fortitude (អំណត់ធ្មត់) ដែលជាកញ្ចប់ថវិកាទី៤របស់សិង្ហបុរីក្នុងឆ្នាំ២០២០នេះ មានគោលដៅជួយបណ្ដាអាជីវកម្មនិងបុគ្គលិកសម្របខ្លួន ផ្លាស់ប្តូរ និងឆក់យកកាលានុវត្តភាព ដើម្បីងើបឡើងវិញខ្លាំងជាងមុន។
«ការផ្តោតស្នូលនៃកញ្ចប់ថវិកានេះ គឺ ការងារ។ កញ្ចប់ថវិកានេះ នឹងបន្តជួយគាំទ្របុគ្គលិកនិងអាជីវកម្មដែលនៅរងប៉ះពាល់ដោយចំណាត់ការគម្លាតសុវត្ថិភាពនិងការបិទព្រំដែន»។ លោក Heng ដែលក៏ជារដ្ឋមន្ត្រីហិរញ្ញវត្ថុសិង្ហបុរី បញ្ជាក់បែបនេះ។ តាមទូរទស្សន៍សិង្ហបុរី Channel News Asia លោកសង្កត់ធ្ងន់ថា រដ្ឋាភិបាលមានបំណងផ្ដល់ឱកាសឲ្យបុគ្គលិកនិងអាជីវកម្មឆ្លងកាត់ព្យុះភ្លៀងនេះរួមគ្នាក្នុងឥរិយាបទប្រកបដោយថាមពល។
ការបញ្ចេញកញ្ចប់ថវិកានេះ ធ្វើឡើងខណៈសិង្ហបុរីត្រៀមលក្ខណៈបើកសេដ្ឋកិច្ចឡើងវិញក្នុងដំណាក់កាលទី៣ ក្រោយការរឹតបណ្ដឹង COVID-19 (circuit breaker) ជិត២ខែ។ ទាក់ទិនបញ្ហានេះ លោកHeng អះអាងថា ខណៈសិង្ហបុរីបើកប្រទេសឡើងវិញជាបណ្ដើរៗ រដ្ឋាភិបាលនឹងបន្តជួយគាំទ្របន្ថែមដល់អាជីវកម្ម ដែលពុំទាន់ត្រៀមខ្លួនរួចរាល់ក្នុងការបើកដំណើរការជាថ្មី និងជួយដល់បុគ្គលិកដែលទាន់អាចបន្តការងារពួកគេបាន។ ត្រង់នេះលោកសង្កត់ធ្ងន់ដូច្នេះថា៖«រឿងសំខាន់បំផុតនោះគឺការបើក (ប្រទេស) ឡើងវិញប្រកបដោយសុវត្ថិភាព ហើយនេះត្រូវធ្វើឡើងដោយប្រុងប្រយ័ត្ន»។
កញ្ចប់ថវិកាថ្មីទំហំជាង២៣ពាន់លានដុល្លារនេះ គឺជាកញ្ចប់ថវិកាទី៤ហើយរបស់រដ្ឋាភិបាលសិង្ហបុរីក្នុងឆ្នាំ២០២០។ បូករួមជាមួយកញ្ចប់ថវិកា៣ផ្សេងទៀតដែលបានអនុវត្តរួចរាល់ សិង្ហបុរីចាយលុយ៦៥,៥៣ពាន់លានដុល្លារដើម្បីគាំទ្រប្រជាជនខ្លួនក្នុងកិច្ចប្រឹងប្រែងប្រយុទ្ធប្រឆាំង COVID-19 ។ នេះបើតាមការអះអាងរបស់លោក Heng។ ថវិកានេះ ស្មើជិត២០ភាគរយនៃផលិតផលក្នុងស្រុកសរុបប្រចាំឆ្នាំ (GDP) របស់ប្រទេសសិង្ហបុរី។
នាយករដ្ឋមន្ត្រីសិង្ហបុរី លោក លី សៀនឡុង តាមរយៈបណ្ដាញសង្គមហ្វេសប៊ុក នៅថ្ងៃទី២៦ ខែឧសភា បានរំលឹកជាថ្មីថា ការសន្សំនិងការបង្កើតការងារ នឹងក្លាយជាចំណុចអាទិភាពរបស់រដ្ឋាភិបាល ហើយវាក៏នឹងជួយគាំទ្រដល់ទីភ្នាក់ងារជួរមុខ គ្រួសារសិង្ហបុរី និងសហគមន៍ ព្រមទាំងជួយអ្នកទន់ខ្សោយនិងត្រូវការជំនួយចាំបាច់ផងដែរ។ លោកសង្កត់ធ្ងន់ដូច្នេះថា៖«គ្មាននរណាម្នាក់ នឹងត្រូវមើលរំលងឡើយ»។
បើតាមលោកឧបនាយករដ្ឋមន្ត្រី Heng រដ្ឋាភិបាល នឹងបង្កើតការងារបន្ថែមជាង៤ម៉ឺនកន្លែងក្នុងវិស័យសាធារណៈនិងឯកជន ហើយរដ្ឋាភិបាលត្រៀមលុយ១,៤១ពាន់លានដុល្លារសម្រាប់រឿងនេះ។ ម្យ៉ាងទៀត ខណៈជំងឺរាតត្បាតសកល COVID-19 ពន្លឿនសន្ទុះនៃការវិវត្តផ្នែកឌីចីថល និងការថមថយក្នុងការគាំទ្រសកលភាវូបនីយកម្ម ក៏ដូចជាការផ្លាស់ប្តូរក្នុងសង្វាក់ផ្គត់ផ្គង់សកល សិង្ហបុរី នឹងត្រៀមថវិកា៣៥២លានដុល្លារដើម្បីជួយគាំទ្រអាជីវកម្មក្នុងការអភិវឌ្ឍផ្នែកឌីចីថលពួកគេ។ តួយ៉ាង អាជីវកម្ម អាចទទួលលុយរហូតដល់ ៣៥២៦ដុល្លារ បើពួកគេអនុវត្តការបង់ប្រាក់តាមប្រព័ន្ធអនឡាញជាដើម។
ទន្ទឹមនេះ លោក Heng ក៏បានប្រកាសចំណាត់ការជួយគាំទ្រអាជីវកម្ម ជាពិសេស សហគ្រាសតូចនិងមធ្យម (SMEs) ជាមួយការបង់ថ្លៃជួលទីតាំងអាជីវកម្មផងដែរ។ នេះគឺរាប់បញ្ចូលការផ្ដល់លុយជំនួយប្រមាណ១,៤១ពាន់លានដុល្លារទូទាត់ថ្លៃជួលទីតាំងអាជីវកម្មរបស់ SME ។ ដោយឡែក លុយ៥៦៤លានដុល្លារទៀត នឹងត្រូវទុកសម្រាប់ផ្ដល់ជូនប្រជាជនដែលបាត់បង់ការងារ ឬប្រាក់ចំណូលធ្លាក់ចុះ។
សូមបញ្ជាក់ដែរថា សិង្ហបុរីកំពុងត្រៀមលក្ខណៈសម្រាប់វិបត្តិសេដ្ឋកិច្ចអាក្រក់បំផុតពុំធ្លាប់កើតមាន។ក្រសួងពាណិជ្ជកម្មនិងឧស្សាហកម្មសិង្ហបុរី បានទម្លាក់ការព្យាករកំណើនសេដ្ឋកិច្ចឆ្នាំ២០២០ ខណៈសេដ្ឋកិច្ចបន្តរងគ្រោះដោយសារជំងឺរាតត្បាតសកល COVID-19 ។ បើតាមក្រសួង GDP សិង្ហបុរី រំពឹងធ្លាក់ចុះចន្លោះ ៤ និង៧ភាគរយ ដែលថយចុះពីការព្យាករលើកមុនចន្លោះពី១ និង ៤ភាគរយ៕