អន្តរជាតិ
តុលាការកាណាដា សម្រេចបន្តនីតិវិធីសំណុំរឿងបត្យាប័នមន្ត្រី Huawei
× តុលាការជាន់ខ្ពស់កាណាដា នៅថ្ងៃទី២៧ ខែឧសភា សម្រេចបន្តនីតិវិធីសំណុំរឿងបត្យាប័នមន្ត្រីជាន់ខ្ពស់ក្រុមហ៊ុន Huawei អ្នកស្រី ម៉ឹង វ៉ាន់ចូវ (Meng Wanzhou) ដោយអះអាងថា អ្នកស្រី ម៉ឹង ពិតជាមានកំហុសមែន។ ការសម្រេចចិត្តនេះ ជារឿងគួរឲ្យខកចិត្តសម្រាប់អ្នកស្រី ម៉ឹង ដែលជំទាស់ដំណើរការធ្វើបត្យាប័នអ្នកស្រីទៅកាន់អាមេរិក ជាទីដែលអ្នកស្រីត្រូវបានចោទថា កុហកធនាគារ។ ទំនាក់ទំនងចិន និងកាណាដា នឹងកាន់តែល្អក់កករថែមទៀតដោយសាររឿងនេះ។
ការតស៊ូតាមផ្លូវច្បាប់របស់អ្នកស្រី ម៉ឹង វ៉ាន់ចូវ ប្រធានផ្នែកហិរញ្ញវត្ថុរបស់ក្រុមហ៊ុនបច្ចេកវិទ្យាចិន Huawei ក្នុងតុលាការកាណាដា បានរងការខកចិត្ត ក្រោយតុលាការជាន់ខ្ពស់កាណាដាបន្តសំណុំរឿងធ្វើបត្យាប័នអ្នកស្រីទៅកាន់អាមេរិក។ តុលាការកាណាដារកឃើញថា ការចោទប្រកាន់របស់អាមេរិកលើអ្នកស្រី ម៉ឹង ពាក់ព័ន្ធការកុហកធនាគារលើទំនាក់ទំនងជាក្រុមហ៊ុនមួយដែលរកស៊ីជាមួយអ៊ីរ៉ង់ បំពេញលក្ខខណ្ឌដែលអនុញ្ញាតឲ្យធ្វើបត្យាប័នបាន។
«ដូចនេះ ការតវ៉ារបស់អ្នកស្រី ម៉ឹង ត្រូវបានបដិសេធ។» នេះជាការប្រកាសរបស់អ្នកស្រី Heather Holmes ចៅក្រមតុលាការកំពូលខេត្ត British Columbia របស់កាណាដា ដោយសំដៅដល់បណ្ដឹងជំទាស់របស់អ្នកស្រី ម៉ឹង។ ការកុហកធនាគារពីទំនាក់ទំនងបែបនេះ គឺជារឿងខុសច្បាប់ទាំងនៅអាមេរិក និងនៅកាណាដាផងដែរ។ ជាមួយការសម្រេចចិត្តនេះ អ្នកស្រី ម៉ឹង នឹងបន្តរស់នៅក្នុងផ្ទះជាមួយការឃ្លាំមើលតឹងរ៉ឹង ខណៈសំណុំរឿងបន្តទៅមុខ។
អំឡុងសវនាការខែមករា តុលាការកាណាដា បានទទួលរបាយការណ៍ថា អ្នកស្រី ម៉ឹង កុហកធនាគារ HSBC ពីទំនាក់ទំនងរវាង Huawei និងក្រុមហ៊ុនចំណុះឈ្មោះ Skycom ដែលមានមូលដ្ឋាននៅអ៊ីរ៉ង់ ដើម្បីទទួលបានលុយវិនិយោគជិតមួយពាន់លានដុល្លារ។ ការរកស៊ីបែបនេះ គឺខុសច្បាប់អាមេរិកដែលហ៊ានការធ្វើជំនួញជាមួយអ៊ីរ៉ង់។ រឿងនេះ ក៏នាំដល់ការឃាត់ខ្លួនអ្នកស្រី ម៉ឹង នៅកាណាដា និងបង្កើតជាសំណុំរឿងសាំញាំដល់សព្វថ្ងៃ។
នីតិវិធីលើសំណុំរឿងនេះ នឹងបន្តនៅខែមិថុនា ដោយភាគីការពារក្ដី នឹងតតាំងពីភាពស្របច្បាប់នៃការឃុំខ្លួនវិញ។ សវនាការនឹងបន្តដល់ខែកញ្ញាខាងមុខ ហើយបើមានការប្ដឹងជំទាស់អ្វីទៀតនោះ សវនាការ នឹងអូសបន្លាយច្រើនឆ្នាំទៀតមិនខាន។
ការសម្រេចចិត្តរបស់តុលាការកាណាដា ក៏ទំនងបញ្ចប់ក្ដីសង្ឃឹមលើការស្ដារទំនាក់ទំនងជាមួយចិន ដែលតែងតែទទូចឲ្យមានការដោះលែងមន្ត្រីជាន់ខ្ពស់ Huawei ដោយអះអាងថា ជាការប៉ុនប៉ងរបស់អាមេរិកក្នុងការបន្ទច់បង្អាក់ Huawei ។ ប៉ុន្តែរដ្ឋាភិបាលកាណាដា ហាក់មិនអើពើនឹងសម្ដីរបស់ចិនឡើយ។ កាលពីសប្ដាហ៍មុន នាយករដ្ឋមន្ត្រី ចាស្ទីន ទ្រូដូ និយាយថា រដ្ឋាភិបាលលោក ទុកឲ្យតុលាការសម្រេចចិត្តលើករណីនេះ។
ការចាប់ខ្លួនអ្នកស្រី ម៉ឹង ក៏នាំឲ្យមានការឃាត់ខ្លួនជនជាតិកាណាដាពីរនាក់នៅទឹកដីចិនវិញដែរ។ ទីក្រុងអូតាវ៉ា បានស្នើឲ្យចិនដោះលែងជនជាតិខ្លួន ដោយហៅការចាប់ខ្លួននេះជាការសងសឹក ប៉ុន្តែប៉េកាំងបានចោទអ្នកទាំងពីរពីបទលួចព័ត៌មានសម្ងាត់រដ្ឋ។ រដ្ឋមន្ត្រីការបរទេសកាណាដា Francois-Philippe Champagne និយាយនៅថ្ងៃទី២៧ ខែឧសភា ថា កាណាដាបន្តធ្វើទំនាក់ទំនងជាមួយចិនដើម្បីឈានដល់ការដោះលែងជនជាតិកាណាដាទាំងពីរដែលជាប់ឃុំជាង៥០០ថ្ងៃហើយ៕
Tag:
អាមេរិក
ចិន
កាណាដា
Huawei
© រក្សាសិទ្ធិដោយ thmeythmey.com