វៀតណាមបោះតង់៨៣ទីតាំងនៅជាប់ព្រំដែនខេត្តតាកែវ

COVID-19

ជាតិ

វៀតណាមបោះតង់៨៣ទីតាំងនៅជាប់ព្រំដែនខេត្តតាកែវ

28, May 2020 , 4:02 pm

រូបភាព

លោក អ៊ូច ភា អភិបាលខេត្តតាកែវ

ដោយ: រំដួល ចិត្រា (Romdoul Chetra)

ភ្នំពេញ៖ វៀតណាមបោះតង់៨៣ទីតាំងនៅជាប់ព្រំដែនខេត្តតាកែវ ក្រោមហេតុផលទប់ស្កាត់ការឆ្លងដែនខុសច្បាប់ និងបង្ការការឆ្លងជំងឺកូវីដ១៩។

លោក គុយ គួង អ្នកនាំពាក្យក្រសួងការបរទេស ដែលទទួលបានព័ត៌មាននេះដែរ បានបញ្ជាក់ថា មានករណីវៀតណាមបោះតង់ពិតមែន ប៉ុន្តែពួកគេបោះនៅក្នុងទឹកដីវៀតណាមទេ មិនចូលទឹកដីកម្ពុជាឡើយ។ លោក បានសង្កត់ធ្ងន់ថា បើសិនជាមានការបោះតង់ឈ្លានពានចូលដីកម្ពុជានោះ រដ្ឋាភិបាលកម្ពុជា នឹងចេញសេចក្តីថ្លែងការណ៍ជាមិនខាន។

ភាគីវៀតណាមបានបោះតង់យោធាចំនួន ៨៣ទីតាំង នៅក្នុងទឹកដីភាគីវៀតណាមជាប់ខេត្តតាកែវ ដែលស្ថិតនៅចម្ងាយប្រហែល ៣០ម៉ែត្រពីបង្គោលព្រំដែន។ លោក អ៊ូច ភា អភិបាលខេត្តតាកែវ បានប្រាប់សារព័ត៌មានថ្មីៗយ៉ាងខ្លីថា វៀតណាមបានបោះតង់នៅចំណុចនោះពិតមែន មុននឹងលោកបិទទូរសព្ទក្រោមហេតុផលថា រវល់ប្រជុំ។

កាលពីខែមីនាកន្លងមក យោធាវៀតណាម ក៏បានបោះតង់៣១កន្លែង នៅតាមបណ្តោយព្រំដែនកម្ពុជា-វៀតណាម ក្នុងខេត្តកណ្តាលដែរ។ លុះដល់ថ្ងៃទី២៤ ខែឧសភា ឆ្នាំ២០២០ ទើបភាគីវៀតណាម យល់ព្រមរុះរើចេញវិញ ក្រោយពីរដ្ឋាភិបាល បានធ្វើកំណត់ទូតទៅភាគីវៀតណាម។

អត្ថបទទាក់ទង

អភិបាលខេត្តកណ្តាល៖ យោធាវៀតណាម រើតង់ទាំង៣១កន្លែង ចេញវិញអស់ហើយ

ព្រះមហាក្សត្រ ប្រកាសឱ្យប្រើសន្ធិសញ្ញាបំពេញបន្ថែម ស្តីពីបង្គោលព្រំដែនកម្ពុជា-វៀតណាម

កាលពីថ្ងៃទី៥ តុលា ឆ្នាំ២០១៩ រដ្ឋាភិបាលកម្ពុជា និងវៀតណាម បានខុះហត្ថលេខាលើច្បាប់ស្តីពីសន្ធិសញ្ញាបំពេញបន្ថែម១៩៨៥ និង២០០៥ ដោយមានភ្ជាប់ទាំងខ្លឹមសារច្បាប់ក្នុងអត្ថបទទាំងស្រុង។ សន្ធិសញ្ញាបំពេញបន្ថែម ដែលរដ្ឋាភិបាលកម្ពុជា-វៀតណាម ចុះហត្ថលេខានៅឆ្នាំ២០១៩នេះ គឺទទួលស្គាល់បង្គោលព្រំដែនដែលភាគីទាំងពីរ បានបោះរួចរាល់ចំនួន ៨៤ភាគរយ។ ចំណែកសល់១៦ភាគរយទៀត ភាគីទាំងពីរបន្តពិភាក្សា និងដោះស្រាយបន្តទៀត។

ព្រះករុណាព្រះបាទសម្ដេចព្រះបរមនាថ នរោត្តម សីហនុ ព្រះមហាក្សត្រ ក៏បានចេញព្រះរាជក្រមប្រកាសឱ្យប្រើច្បាប់ស្តីពីការអនុម័តយល់ព្រមលើសន្ធិសញ្ញាទាំងពីរនេះ កាលខែធ្នូ ឆ្នាំ២០១៩ទៀតផង៕