COVID-19
អន្តរជាតិ
លោក Claude Goasguen អតីតរដ្ឋមន្ត្រីបារាំងម្នាក់ទៀតស្លាប់ដោយសារ COVID-19 Claude Goasguen
× លោក Claude Goasguen សមាជិកសភា និងជាអតីតរដ្ឋមន្ត្រីម្នាក់របស់បារាំង បានទទួលមរណភាពក្នុងអាយុ៧៥ឆ្នាំ ដោយសារ COVID-19 នាថ្ងៃទី២៨ ខែឧសភា។ នេះបើតាមការផ្សាយរបស់ Le Monde។ លោកជាអតីតរដ្ឋមន្ត្រីទីពីររបស់បារាំង ដែលបានបាត់បង់ជីវិតដោយសារជំងឺរាតត្បាតសាកលមួយនេះ បន្ទាប់ពីលោក Patrick Devedjan។
លោក Claude Goasguen បានក្លាយជារដ្ឋមន្ត្រីទទួលបន្ទុកកំណែទម្រង់រដ្ឋ វិមជ្ឈការ និងពលរដ្ឋ នាអំឡុងឆ្នាំ១៩៩៥ ក្រោមរដ្ឋាភិបាលរបស់លោក Alain Juppe និងលោកប្រធានាធិបតី Jacques Chirac។ លោកធ្លាប់ធ្វើជាទីប្រឹក្សាក្រុងប៉ារីសពីឆ្នាំ១៩៨៣ ដល់ឆ្នាំ២០២០ និងជាអភិបាលនៃសង្កាត់ទី១៦ក្រុងប៉ារីសពីឆ្នាំ២០០៨ ដល់ឆ្នាំ២០១៧។ ជាមួយគ្នានេះ លោក Goasguen ធ្វើជាសមាជិកសភាគណបក្ស LR ចាប់ពីឆ្នាំ១៩៩៣មក។
បើតាម Le Monde លោក Goasguen ស្ថិតក្រោមការតាមដានសុខភាពដោយសារ COVID-19 ចាប់តាំងពីចុងខែមីនា មក។ ២២ថ្ងៃក្រោយការព្យាបាល លោកមានស្ថានភាពធូរស្បើយ ប៉ុន្តែក្រោយមានបញ្ហាបេះដូង ហើយបណ្តាលឲ្យលោកស្លាប់នៅមន្ទីរពេទ្យ Corentin-Celton d’Issy-Les-Moulineaux។
លោក Claude Goasguen ជាអតីតរដ្ឋមន្ត្រីទីពីររបស់បារាំង ដែលបានស្លាប់ដោយសារ COVID-19 បន្ទាប់ពីលោក Patrick Devedjan ដែលបានទទួលមរណភាពក្នុងអាយុ៧៤ឆ្នាំ កាលពីយប់ថ្ងៃទី២៨ ខែមីនា៕
© រក្សាសិទ្ធិដោយ thmeythmey.com